អានមួយៗហើយគិត! គំនិតល្អៗគួរយល់ដឹងមុនពេលចង់រៀបការ

2019-04-24 03:35:00
ចំនួនមតិ 0 | ចំនួនចែករំលែក 0

កូនប្រុស ៖ ប៉ា! ខ្ញុំនឹងរៀបការហើយ

ឪពុក ៖ ឯងត្រូវតែសុំទោសយើងជាមុនសិន...!!

កូនប្រុស ៖ ហេតុអីខ្ញុំត្រូវសុំទោស? តើខ្ញុំបានធ្វើអីខុស?

ឪពុក៖ តើឯងអាចនិយាយពាក្យសុំទោសមកសិនបានអត់?

កូនប្រុស ៖ ហេតុអី? ខ្ញុំបានធ្វើអីខុស ? ហេតុអីត្រូវសុំទោស?

ឪពុក ៖ សុំទោសសិនមក...!!

កូនប្រុស ៖ ហេតុអី? ប៉ាប្រាប់ខ្ញុំសិនមកថាមកពីមូលហេតុអ្វី?

ឪពុក ៖ សុំទោស! និយាយសិនមក...!! ហើយប៉ានឹងប្រាប់ឯង

កូនប្រុស ៖ ខ្ញុំចង់ដឹងថាខ្ញុំបានធ្វើអ្វីខុសជាមុនសិនប៉ា

ឪពុក ៖ សុំទោសសិនមក ….!!

កូនប្រុស ៖ បាទ សុំទោសប៉ា

ឪពុក ៖ ឥឡូវនេះឯងអាចរៀបការបានហើយ។

រូបតំណាង

នេះគឺជាការសាកល្បងមុនពេលរៀបការ។ នៅពេលដែលអ្នកអាចសុំទោសដោយមិនដឹងពីមូលហេតុ អ្នកជាមនុស្សដែលអាចរៀបការបានហើយ។ ជីវិតគ្រួសាររបស់អ្នកត្រូវការភាពស៊ូទ្រាំ ប៉ុន្តែបើសិនជាអ្នកនៅ តែប្រកាន់យកគោលការណ៍ថាបើមិនបានធ្វើខុស នោះមិនចាំបាច់សុំទោសទេ ហើយនឹងមិនសុំទោសដាច់ខាតបើមិនបានដឹងពីមូលហេតុជាមុន នោះមានន័យថាអ្នកមិនទាន់ត្រៀមខ្លួនរួចរាល់សម្រាប់រៀបការ បង្កើតគ្រួសារទេ។

បើថ្ងៃណាមួយអ្នករៀបការជាមួយនរណាម្នាក់ អ្នកគួរចង់ចាំការសាកល្បងដែលឪពុកបានផ្ដល់ឲ្យដូចខាងលើនេះ។ និយាយពាក្យថាសុំទោសមិនមានន័យថាអ្នកជាអ្នកខុសនោះទេ ជួនកាលការសុំទោសគ្រាន់តែជួយឲ្យអារម្មណ៍របស់ភាគីម្ខាងទៀតស្ងប់តែប៉ុណ្ណោះ។ ចងចាំថាគូស្នេហ៍មិនមែនជាគូប្រកួតប្រជែងទេ កុំចង់ឈ្នះចង់ចាញ់គ្នាឲ្យសោះ។

រូបតំណាង

«សុំទោស» ជាទូទៅគឺជាពាក្យដែលអ្នកធ្វើខុសគួរតែនិយាយ។ ប៉ុន្តែសម្រាប់ដៃគូឬគ្រួសារ ជួនកាលអ្នកត្រូវតែនិយាយចេញទៅដោយផ្ទុយការពិតដោយគ្មានមូលហេតុទេ។ ដោយសារតែបើអ្នកនៅតែបង្កជម្លោះយកឈ្នះរៀងខ្លួន តាំងខ្លួនជាអ្នកត្រូវដូចគ្នា លទ្ធផលគឺមានតែខាតបង់ទាំងសងខាងតែប៉ុណ្ណោះ។ តើនេះជាអ្វីដែលមនុស្សគ្រប់គ្នាត្រូវការមែនទេ? ចម្លើយគឺ គ្មាននរណាចង់បានបែបនេះទេ...!!

ប៉ុន្តែពេលខ្លះមិនយល់ដែរ ហេតុអ្វីម្នាក់ៗមិនហ៊ានសុំទោសគ្នា។ ពេលនរណាម្នាក់សុំទោសមុន មិនប្រាកដថាគេជាអ្នកខុសទេ ប៉ុន្តែដោយសារតែគេស្រលាញ់អ្នកខ្លាំងតែប៉ុណ្ណោះ។ គេគ្រាន់តែមិនចង់ឲ្យមនុស្សដែលគេស្រលាញ់ខូចចិត្តដោយសារតែភាពអាត្មានិយមរបស់គេប៉ុណ្ណោះ។ នៅពេលដែលភាគីម្ខាងសុំទោស ភាគីម្ខាងទៀតគួរតែអត់ទោសឲ្យដោយមិនចាំបាច់គិតច្រើនទេ … អាថ៌កំបាំងធ្វើឲ្យជីវិតគ្រួសាររបស់អ្នកកាន់តែប្រសើរគឺការសុំទោសដោយគ្មានហេតុផល៕