ស្រលាញ់គ្នាដោយមិនយករឿងឈឺក្បាលដាក់ក្នុងខ្លួន គួរទន្ទិញពាក្យទាំងនេះក្នុងចិត្ត

2019-04-24 06:50:00
ចំនួនមតិ 0 | ចំនួនចែករំលែក 0

បើស្រលាញ់បុរសណាម្នាក់ ត្រូវស្រលាញ់បេះដូងនិងទឹកចិត្តរបស់គាត់ មិនមើលអ្វីផ្សេងសំខាន់ជាងនេះ។

ពេលស្រលាញ់បុរសណាម្នាក់ កុំខ្វល់ខ្វាយរវល់តែសួរខ្លួនឯងថា ហេតុអ្វីបានជាអ្នកស្រលាញ់គាត់ គ្រាន់តែដឹងថាអ្នកមានចិត្តស្រលាញ់ មានអារម្មណ៍ល្អពេលទាក់ទងគ្នាទៅគឺគ្រប់គ្រាន់ហើយ។

ពេលស្រលាញ់បុរសណាម្នាក់ កុំបារម្ភពីឧបសគ្គដែលអាចនឹងកើតនាថ្ងៃខាងមុខ ប៉ុន្តែត្រូវចាត់ទុកឧបសគ្គទាំងនោះ ជាឱកាសដើម្បីឲ្យអ្នកទាំងពីរជម្នះវាឲ្យបាន។

ពេលស្រលាញ់បុរសណាម្នាក់ កុំខ្ជះខ្ជាយពេលគិតចង់ឲ្យគេធ្វើអ្វីមួយដើម្បីខ្លួនឯង ប៉ុន្តែគួរអង្គុយគិតរកវិធីល្អៗ ដើម្បីបានប្រយោជន៍ទាំងសងខាង។

ពេលស្រលាញ់បុរសណាម្នាក់ កុំប្រចណ្ឌច្រើនពេក ហើយតែងសង្ស័យថាគេមានថ្មីចោលអ្នកនៅថ្ងៃណាមួយ។ បើរឿងមិនទាន់កើតឡើងផង រវល់តែរវើរវាយ ច្បាស់ជានៅជាមួយគ្នាមិនសុខឡើយ។ មានភស្តុតាងគ្រប់គ្រាន់ចាំចោទប្រកាន់ ដកខ្លួនបើកបេះដូងទទួលយកអ្នកថ្មីទៀតក៏មិនទាន់ហួសពេលដែរ។

ពេលស្រលាញ់បុរសណាម្នាក់ កុំខ្វល់ពីអតីតកាលរបស់គាត់ច្រើនពេក បើបច្ចុប្បន្នគាត់ល្អ គួរត្រេកអរទៅ ព្រោះអតីតបានកន្លងហើយ។

ពេលស្រលាញ់បុរសណាម្នាក់ យើងជាស្រីមិនមែនមានន័យថាត្រូវយកឈ្នះគេគ្រប់ពេលទេ បើខ្លួនអ្នកមានកំហុស គួរចេះទទួលស្គាល់ផង។

ពេលស្រលាញ់បុរសណាម្នាក់ កុំព្យាយាមចង់ផ្លាស់ប្តូរគេទាំងស្រុង ព្រោះចរិតមនុស្សពីកំណើតមិនអាចកែប្រែងាយៗឡើយ សំខាន់ត្រូវចេះនិយាយនិងរកវិធីជួយសម្រួលឲ្យប្រសើរជាងនេះ ទើបមានប្រសិទ្ធភាព។

ពេលស្រលាញ់បុរសណាម្នាក់ មិនត្រូវទន់ជ្រាយដាច់ខាត ពុំដូច្នោះទេ ទំនាក់ទំនងរបស់អ្នកនឹងរលាយសាបសូន្យដោយមិនដឹងខ្លួន។

ពេលស្រលាញ់បុរសណាម្នាក់ មិនចាំបាច់និយាយពាក្យ "ស្រលាញ់" រាល់ថ្ងៃពេកក៏បាន ព្រោះទង្វើនឹងបញ្ជាក់អត្ថន័យគ្រប់បែបយ៉ាង។

ពេលស្រលាញ់បុរសណាម្នាក់ កុំសម្លឹងតែសំបកក្រៅឲ្យសោះ ឲ្យតម្លៃទឹកចិត្ត ភាពស្មោះត្រង់ដែលគាត់មានចំពោះអ្នក ទើបមិនខកចិត្តទៅថ្ងៃក្រោយ។

ពេលស្រលាញ់បុរសណាម្នាក់ មិនត្រូវមើលឃើញពីគុណវិបត្តិច្រើនជាងគុណសម្បត្តិឡើយ។

ពេលស្រលាញ់បុរសណាម្នាក់ គួរទុកពេលវេលាផ្ទាល់ខ្លួនឲ្យគាត់ខ្លះផង កុំចង់ចាប់ចងជើងមិនឲ្យសេរីភាពសោះ។

ពេលស្រលាញ់បុរសណាម្នាក់ ត្រូវខ្វល់ខ្វាយពីសុខទុក្ខរបស់គាត់ ចេះលើកទឹកចិត្តពេលគាត់ជួបវិបត្តិ មិនធ្វើហីៗទុកគាត់ឈឺខ្លាំងទើបសួរនាំ។

ពេលស្រលាញ់បុរសណាម្នាក់ កុំខ្លាចនឹងនិយាយពាក្យថា "ស្រលាញ់” ទៅកាន់គាត់ ព្រោះឱកាសល្អមិនមែនសុទ្ធតែអាចកើតឡើងគ្រប់ពេលទេ។

ពេលស្រលាញ់បុរសណាម្នាក់ ត្រូវជឿជាក់ទុកចិត្តលើគាត់ ច្រើនជាងសួរដេញដោល ស្រែកឡែតៗ ឥតហេតុផល។

ពេលស្រលាញ់បុរសណាម្នាក់ ត្រូវយល់ថាអ្នកមានសុភមង្គល មានក្តីសុខជាងពេលដែលនៅម្នាក់ឯង។

ពេលស្រលាញ់បុរសណាម្នាក់ គឺងាយស្រួលជាងពេលដែលអ្នកត្រូវដកគាត់ចេញពីបេះដូង។

ស្នេហាបានបង្រៀនមនុស្សច្រើនណាស់ បើអ្នកមិនបានជួបផ្ទាល់ទេ គឺគ្មានថ្ងៃយល់ឡើយ។ ស្នេហាធ្វើឲ្យអ្នកមានភាពចាស់ទុំ ឲ្យអ្នកយល់ពីបញ្ហាកាន់តែច្រើន និងបំពេញចន្លោះក្នុងជីវិត។ បន្ទាប់ពីបានអានរួច សង្ឃឹមថាអត្ថបទខាងលើអាចជួយការពារមិនឲ្យអ្នកជួបរឿងឈឺក្បាលស្មុគស្មាញច្រើន ពេលបង្កើតស្នេហាជាមួយមនុស្សដែលខ្លួនស្រលាញ់ពិតប្រាកដ៕

ចុចអានបន្ត៖

ប្រភព៖ eatrices ប្រែសម្រួល៖ ដេត ឈុនអ៉ី