អាថ៌កំបាំងបះសក់នៅក្នុងរោងកុនដែលអ្នកគួរដឹង មុនឈានជើងចូល

2019-04-10 07:22:37
ចំនួនមតិ 0 | ចំនួនចែករំលែក 0

ការទៅមើលកុននាពេលបច្ចុប្បន្នបានក្លាយជាការកម្សាន្តដ៏ពេញនិយមសម្រាប់មនុស្សគ្រប់វ័យ។ យ៉ាងណាក៏ដោយ ទោះឧស្សាហ៍ទៅមើលកុនញឹកញាប់យ៉ាងណាក៏មិនមែនគ្រប់គ្នាសុទ្ធតែដឹងពីអាថ៌កំបាំងមួយចំនួននៅក្នុងរោងកុននោះឡើយ ព្រោះគ្មានបុគ្គលិករោងកុនណាទម្លាយចេញទាំងអស់។

កាលពីចុងឆ្នាំទៅ នារីម៉ាឡេស៊ីម្នាក់បានបង្កការភ្ញាក់ផ្អើលយ៉ាងខ្លាំងនៅពេលខ្លួនទៅមើលកុន ហើយប្រទះឃើញម្ជុលដ៏ធំត្រូវបានចាក់នៅលើកៅអីរបស់ខ្លួន។ ដោយសារតែភិតភ័យ និងមិនចង់ឲ្យអ្នកក្រោយជួបរឿងដូចខ្លួន នាងបានបង្ហោះលើបណ្ដាញសង្គមដើម្បីជៀសវាងបញ្ហាដដែលកើតឡើង។ យ៉ាងណាក្ដី នេះមិនមែនជារឿងតែមួយគត់ដែលកើតឡើងក្នុងរោងកុនឡើយ គឺនៅមានចំណុចជាច្រើនទៀតដែលអ្នកមិនដឹង។

១. គ្រប់រោងកុនសុទ្ធតែមានកាមេរ៉ា Infrared

ក្រៅពីកាមេរ៉ាធម្មតាដែលអាចថតពេលភ្លឺ រោងកុនធំៗក៏មានដាក់កាមេរ៉ា Infrared ដែលអាចចាប់បានរូបភាពពេលងងឹតផងដែរ ដើម្បីការពារសកម្មភាពមិនសមស្រប ក៏ដូចជាដើម្បីការពារទ្រព្យសម្បត្តិរបស់ខ្លួន។ ដូចនេះហើយ ប្រសិនបើអ្នកមានបំណងខ្មៅងងឹតអ្វីក្នុងរោងកុន កុំឆោតធ្វើឲ្យសោះ។

២. ពោតលីងអាចលក់សល់ថ្ងៃ

យោងតាមការស្រាវជ្រាវរបស់អ្នកកាសែតបង្កប់ ពោតលីងទោះបីជាទុកច្រើនថ្ងៃក៏មិនប្រែប្រួលរសជាតិនោះដែរ។ ជាមួយគ្នានេះដែរ ប្រសិនបើក្នុងមួយថ្ងៃពោតលក់អត់អស់ វានឹងត្រូវបានខ្ចប់ ហើយថ្ងៃបន្ទាប់នឹងត្រូវបានកម្ដៅ និងលក់បន្តទៀត ដោយមិនបានបោះចោលនោះឡើយ។

៣. យ៉ាងហោចណាស់ក្នុង១អាទិត្យ បុគ្គលិកត្រូវអញ្ជើញគូស្នេហ៍ចេញពីរោងកុនម្ដង

គូស្នេហ៍ដែលមានសកម្មភាពស្អិតរមួតជ្រុលហួសហេតុក្នុងរោងកុន តែងបង្កការប៉ះពាល់ដល់អ្នកជុំវិញ។ ជានិច្ចកាល ពួកគេតែងត្រូវអញ្ជើញចេញក្រៅ ដែលនិយាយឲ្យត្រង់គឺត្រូវគេដេញចេញក្រៅ និងមានឈ្មោះក្នុងបញ្ជីខ្មៅ ដែលថ្ងៃក្រោយមិនអាចទិញសំបុត្របានទៀត។ តាមនោះដែរ ករណីនេះកើតឡើងយ៉ាងតិចម្ដង ក្នុង១សប្ដាហ៍៕