កុំជឿពាក្យថា«ស្រឡាញ់»ចេញពីមាត់គេ តែត្រូវជឿលើភ្នែក និងបេះដូងអ្នកវិញ

2019-03-18 02:36:22
ចំនួនមតិ 0 | ចំនួនចែករំលែក 0

មនុស្សស្រីឲ្យតែបានស្ដាប់ពាក្យផ្អែមគឺជឿគេងប់ខ្លួនតែម្ដង។ គ្រប់ពេលគេតែងផ្ញើសារមកផ្អែមល្ហែមបំផុត ហើយពាក្យដែលគេថាស្រឡាញ់ប្រពន្ធក៏មិនដែលភ្លេចនិយាយដែរ ប៉ុន្តែមានមនុស្សប្រុសជាច្រើននិយាយថាស្រឡាញ់ប្រពន្ធនៅនឹងមុខប្រពន្ធ តែខាងក្រោយវិញមានស្រីរាប់មិនអស់។

រូបតំណាង

ពីព្រោះតែពាក្យថា «បងស្រឡាញ់អូន»នេះហើយ ទើបខ្ញុំមិនដែលចង់បោះបង់ចំណងអាពាហ៍ពិពាហ៍នេះ។ បន្ទាប់ពីគាត់ញ៉ាំអាហារថ្ងៃត្រង់រួច គាត់ក៏ត្រឡប់មកនិយាយពាក្យនេះម្ដងទៀត ពេលនោះហើយជាពេលដែលខ្ញុំលាក់ការឈឺចាប់ខ្ញុំទាំងប៉ុន្មានទុកក្នុងទ្រូង។

កន្លះខែមកទៀតខ្ញុំបានឃើញសារដ៏ផ្អែមល្ហែម ក្លិនទឹកអប់ដ៏ក្រអូបរបស់មនុស្សស្រី។ តើខ្ញុំអាចធ្វើអីបានទៅ?

ខ្ញុំមិនដឹងថាខ្ញុំអាចអត់ធ្មត់ខ្លាំងបានប៉ុណ្ណាទៀតនោះទេ ខ្ញុំអភ័យលើសពីអភ័យទៅឲ្យគេ។ មិត្តភក្តិស្ដីឲ្យខ្ញុំថាហេតុអីនៅទ្រាំបែបនេះ? គ្រួសារខ្ញុំបន្ទោសខ្ញុំយ៉ាងខ្លាំង ហើយបានឲ្យខ្ញុំដាក់ពាក្យលែងលះគ្នា។ តែគ្រប់យ៉ាងគឺជាកំហុសខ្ញុំព្រោះខ្ញុំមិនអាចធ្វើវាបាន។ ខ្ញុំពិតជាមិនអាចឲ្យគាត់ទៅក្នុងដៃមនុស្សស្រីផ្សេងនោះទេ។ ប្រហែលខ្ញុំអាត្មានិយមសុខចិត្តឱបគេជាប់ទ្រូងជាងទទួលបានការស្រឡាញ់ពិតពីគេ។

ស្រីទី១របស់គេគឺជាក្មេងស្រីដែលទើបនឹងបញ្ចប់ការសិក្សាថ្នាក់បរិញ្ញាបត្រ។ គាត់ផ្គត់ផ្គង់នាងតាំងពីតិចតួចរហូតក្លាយទៅជាអាជីពទៅហើយ។ ពេលគ្រួសារយើងចាប់ផ្ដើមមានបញ្ហារឿងលុយកាក់ ជីវិតគ្រួសារយើងក៏ចាប់ផ្ដើមរកាំរកូសគ្មានថ្ងៃស្រាន្ត។

ខ្ញុំធ្លាប់ស្ដាប់រឿងដែលគេនិយាយពីប្ដីមានស្រី តែខ្ញុំមិនយល់ពីទំហំនៃការឈឺចាប់នោះទេព្រោះខ្ញុំមិនមែនជាអ្នកនៅក្នុងរឿងនោះ តែពេលនេះខ្ញុំយល់វាច្បាស់ណាស់។ វាឈឺលើសពីអ្វីដែលខ្ញុំធ្លាប់រំពឹងទុក។

រូបតំណាង

គាត់បានសុំទោសខ្ញុំ ហើយនិយាយថាគាត់ពិតជាស្រឡាញ់ខ្ញុំខ្លាំងណាស់ អ្នកផ្សេងគ្រាន់តែជាអ្នកកំដរអារម្មណ៍គាត់ពេលគាត់ត្រូវការតែប៉ុណ្ណោះ។ គាត់ពិតជាមិនចង់បែកបាក់ជាមួយខ្ញុំទេ ហើយគាត់ក៏ផ្ដាច់ការទាក់ទងជាមួយនាង។ ដោយអំណាចចិត្តដែលខ្ញុំនៅស្រឡាញ់គាត់ខ្ញុំក៏បានអភ័យទោសឲ្យគាត់ ហើយគ្រួសារយើងក៏ត្រឡប់មកល្អដូចពីមុន។

ពេលវេលាកាន់តែដើរទៅមុខ ទើបតែ ៣ខែសោះគាត់ក៏ចាប់ផ្ដើមម្ដងទៀត។ ខ្ញុំបានតាមទាន់នៅលើខ្លួនគាត់មានក្លិនទឹកអប់បារាំង ស្នាមក្រែមនៅលើអាវ។ គាត់ពិតជាឃោរឃៅពេកហើយចំពោះខ្ញុំ។ ថ្ងៃនោះខ្ញុំបានទទួលសារមួយពីលេខទូរស័ព្ទគាត់ដោយបានសរសេរថា« នាងប្រាកដជាដឹងហើយមែនទេ ខ្ញុំគិតថានាងឆ្លាតគ្រប់គ្រាន់ណាស់ ហើយក៏យល់ពីក្លិនទឹកអប់ និងស្នាមក្រែមនោះច្បាស់ដែរ។ មិនអីចឹងហី?»

ឃើញសារនេះហើយខ្ញុំស្ទើរតែក្លាយជាមនុស្សឆ្កួតទៅហើយ។ ខ្ញុំក៏យកសារនេះហើយឲ្យគាត់មើល តែគាត់បានបដិសេធ។ ព្រោះតែពាក្យថា «បងស្រឡាញ់អូន» ខ្ញុំក៏ទុកឱកាសឲ្យគាត់បកស្រាយ។

គាត់ប្រាប់ថាអ្នកធ្វើការជាមួយគាត់ចង់ធ្វើបាបគាត់ យកទូរស័ព្ទពេលគាត់កំពុងប្រជុំធ្វើបែបនេះតែប៉ុណ្ណោះ ។

ម្ដងទៀតគឺខ្ញុំបានទទួលសាររូបភាពដែលគាត់បានឱបចង្កេះនាងយ៉ាងត្រេកត្រអាលបំផុត។ ទឹកភ្នែកខ្ញុំហូរដូចគេយកឡាមមកវះទ្រូងខ្ញុំរាប់រយឆ្នូតអីចឹង។ ខ្ញុំទន់ខ្លួនដួលដល់ដី ភ្នែកបើកទាំងផ្សារដូចហូរឈាមចេញពីភ្នែក ហើយនឹកឃើញនូវពាក្យដែលគាត់តែងថា«បងស្រឡាញ់អូន»។ ខ្ញុំកោតណាស់ ហេតុអីគាត់និយាយពាក្យនេះចេញពីមាត់កើត? នឹកដល់ពាក្យនេះខ្ញុំហួសចិត្តចង់តែសើចព្រោះប្រហែលពាក្យនេះគាត់ប្រើជាមួយមនុស្សស្រីជាច្រើនរួចមកហើយ។

រូបតំណាង

គាត់មកដល់ផ្ទះឃើញរូបនេះ គាត់ក៏បាននិយាយគ្រាន់តែជាមិត្តរួមការងារតែប៉ុណ្ណោះព្រោះពេលនោះគឺជប់លៀងរាំរែកសប្បាយ ដូច្នេះពេលខ្លះក៏ស្និទ្ធគ្នាដោយមិនបានចាប់អារម្មណ៍។

ខ្ញុំលឺពាក្យទាំងនោះហើយអ្វីក៏ខ្ញុំនិយាយមិនចេញបានត្រឹមតែស្រក់ទឹកភ្នែកចោលឥតអំពើ។ មកដល់ពេលនេះខ្ញុំពិតជាអាណិតខ្លួនឯងណាស់។ ហេតុអីខ្ញុំល្ងង់ដល់ថ្នាក់នេះ? ខ្ញុំឆ្កួតដោយសារតែពាក្យស្រឡាញ់របស់គេរហូតលែងខ្វល់ពីទំហំនៃការឈឺចាប់របស់ខ្លួនឯង។

អ្វីដែលខ្ញុំចង់និយាយទៅកាន់មនុស្សស្រីដទៃទៀតគឺ ត្រូវជឿពាក្យថាស្រឡាញ់ជាមួយនឹងភ្នែករបស់អ្នក បេះដូងរបស់អ្នក កុំជឿវាដោយសារត្រចៀកអ្នកអី។ ពាក្យដែលចេញមកពីមាត់មនុស្សប្រុសគឺគ្មានន័យអីទាំងអស់ នៅពេលគេមិនបានបង្ហាញទង្វើឲ្យអ្នកឃើញ៕

ចុចអាន៖ធ្លាប់ទេ ឈឺចាប់ព្រោះស្រលាញ់មនុស្សដែលខ្លួនមិនគួរស្រលាញ់? អ្នកមានវិបត្តិស្នេហ៍គួរតែអាន

ប្រភព៖ Guu ប្រែសម្រួល៖ ផេង ផលធិតា