បុរសនៅជិតខ្លួនកំពុងមានចិត្តលើអ្នកខ្លាំង បើបង្ហាញសញ្ញា ៥ នេះ

2019-03-15 11:00:00
ចំនួនមតិ 0 | ចំនួនចែករំលែក 0

មាត់មិននិយាយ តែទង្វើនិងកាយវិការអាចបញ្ជាក់យ៉ាងច្បាស់។ មនុស្សប្រុសដែលមានចិត្តលួចស្រលាញ់អ្នក ពេលខ្លះគ្មានភាពក្លាហានគ្រប់គ្រាន់នឹងសារភាពចេញមក ប៉ុន្តែបើសង្កេតឃើញមានសញ្ញា៥យ៉ាងនេះ មិនបាច់និយាយក៏គេមើលដឹងគ្រប់គ្នាដែរ។

១. យកចិត្តទុកដាក់

គាត់យកចិត្តទុកដាក់ មិនថាអ្នកធ្វើអ្វីក៏ដោយ គិតពីអ្នកគ្រប់ពេល គ្រប់ទីកន្លែង។ គាត់ជួយអ្នកសឹងគ្រប់រឿង ប៉ុន្តែជួយក្នុងន័យលើសពីមិត្តរាប់អានធម្មតា ហើយវាពិសេសលើសពីការជួយអ្នកដទៃផ្សេងទៀត។

២. ចូលចិត្តមកកៀកៗអ្នក

ទីណាមានអ្នក ទីនោះនឹងឃើញមានវត្តមានរបស់គាត់ជានិច្ច។ មិនមែនជាការតាមដានអីនោះទេ ប៉ុន្តែជាអារម្មណ៍រំភើបនៅមិនសុខ តែងចង់ឆ្លៀតពេលទៅកម្មវិធីដែលអ្នកចូលរួម ដើម្បីបានឃើញមុខ ចូលទៅជិតសន្ទនាពីនេះពីនោះ ថតរូបលេងជាដើម។

៣. បារម្ភពីអ្នក

គ្រាន់តែអ្នកមិនស្រួលខ្លួន ឈឺក្បាលតិចតួច ក៏គាត់បារម្ភខ្វល់ខ្វាយខ្លាំងដែរ។ ទោះមិនបានជួបមុខ ឲ្យតែបានឆាតទៅសួរ ដឹងសុខទុក្ខអ្នកយ៉ាងណា ទើបគាត់ស្ងប់ចិត្ត។ ពេលមិនបានឃើញអ្នកមួយថ្ងៃ ទឹកមុខដូចជាមិនសូវស្រស់ស្រាយខ្លាំង អារម្មណ៍ហាក់មិនសូវល្អដូចសព្វដង។

៤. ធ្វើឲ្យអ្នកមានស្នាមញញឹម

កាលណាគាត់ឃើញអ្នកមិនសប្បាយចិត្ត ឬភ័យខ្លាចអ្វីមួយ គាត់តែងតែចូលទៅជិតដើម្បីការពារអ្នក។ និយាយរឿងសប្បាយៗឲ្យអ្នកស្តាប់ ញញឹមជាប់ ព្រោះមិនចង់ឃើញអ្នកកើតទុក្ខ និងចង់កែប្រែស្ថានភាព ឲ្យអ្នករីករាយអារម្មណ៍ល្អឡើងវិញ។

៥. លួចប្រចណ្ឌពេលឃើញអ្នកស្និទ្ធស្នាលជាមួយមនុស្សប្រុសដទៃ

អ្នកទាំងពីរមិនទាន់ត្រូវអ្វីនឹងគ្នាពិតមែន ប៉ុន្តែពេលឃើញអ្នកស្និទ្ធស្នាលជាមួយមនុស្សប្រុសដទៃ ក្នុងបេះដូងរបស់គាត់ច្បាស់ជាពុះកញ្ជ្រោល មានកូនចិត្តលួចប្រចណ្ឌ។ ក្រសែភ្នែកចេះតែលួចសម្លឹង ឬងាកមើលញឹកញាប់ ពេលឃើញអ្នកធ្វើដូចជាមិនចង់និយាយមិនចង់ស្តីរក លួចអន់ចិត្ត។

មានសង្កេតមើលឬនៅ ថាអ្នកក្បែរខ្លួនរាល់ថ្ងៃបានបញ្ជេញសកម្មភាពបែបនេះដែរអត់? បើដូច្នោះមែន មិនបាច់សង្ស័យអីច្រើនគេ គឺម្នាក់ហ្នឹងហើយ ដែលមានចិត្តអ្នក ច្បាស់ក្រឡែត៕