នៅពេលមានគំនិតចាស់ទុំមែនទែន អ្នកនឹងមានការគិតខុសប្លែកពីមុន ៥យ៉ាងនេះ

2019-01-16 09:00:00
ចំនួនមតិ 0 | ចំនួនចែករំលែក 0

ថ្ងៃនេះ កញ្ញា សូមបង្ហាញពីការយល់ដឹងល្អៗដែលកើតមានចំពោះអ្នកដែលចាប់ផ្ដើមឈានដល់វ័យចាស់ចិត្តចាស់គំនិតបន្ទាប់ពីប្រឡូកក្នុងជីវិតច្រើនគួរសម។ អាចនិយាយបានថា ភាគច្រើន អ្នកដែលមានអាយុចាប់ពី ២៥ឆ្នាំឡើងទៅនឹងចាប់ផ្ដើមមានការគិតចំពោះជីវិតខុសប្លែកពីកាលនៅក្មេង ដែលក្នុងនោះរួមមាន៖

១. អ្នកនឹងដឹងថាអ្នកណាដែលអ្នកគួរយកចិត្តទុកដាក់ ហើយអ្នកណាមិនគួរ

អ្នកចាប់ផ្ដើមប្រឡូកក្នុងពិភពគុនច្រើនគួរសមហើយ ដូច្នេះអ្នកនឹងអាចដឹងថាអ្នកណាដែលអ្នកមិនគួរយកចិត្តទុកដាក់ជាមួយដូចជា អ្នកពូកែនិយាយនិន្ទាពីអ្នក អ្នកដែលរិះគន់បំបាក់អ្នកជាដើម។

២. ពេលវេលារបស់អ្នកកាន់តែមានតម្លៃ

ក្នុងវ័យនេះអ្នកនឹងចាប់ផ្ដើមគិតថា ពេលវេលាអ្នកពិតជាមានតម្លៃណាស់ ដូច្នេះមុនគិត មុនធ្វើអ្វី អ្នកនឹងមានគម្រោងច្បាស់លាស់ ដើម្បីកុំឲ្យខាតពេលវេលា ហើយអ្នកនឹងប្រើពេលវេលារបស់អ្នកយ៉ាងត្រឹមត្រូវ ដោយមិនបង្ហិនវាជាមួយរឿងឥតប្រយោជន៍ច្រើនដូចមុនទៀតហើយ ដូចជាការឈ្លោះគ្នាជាមួយសង្សារ មិត្តភ័ក្ដិ ឬការគិតរឿងគ្មានប្រយោជន៍ជាដើម។

៣. សង្សារលែងសំខាន់ខ្លាំងដូចមុន

នៅពេលវ័យជំទង់ អ្នកអាចគិតថាសង្សារគឺសំខាន់ជាងអ្វីទាំងអស់ សង្សារគឺគ្រប់យ៉ាង ឬថាបើមិនមានសង្សារ គឺអ្នកនឹងខំប្រឹងស្វះស្វែងរកយ៉ាងណាឲ្យបាន។ ប៉ុន្តែដល់វ័យនេះ អ្នកនឹងចាប់ផ្ដើមស្ងប់ស្ងៀមក្នុងរឿងនេះ។ អ្នកអាចនឹងមានអារម្មណ៍ឯកោខ្លះ ប៉ុន្តែក៏អាចរស់នៅម្នាក់ឯងបាន អាចដោយសារជីវិតរបស់អ្នកមានអ្វីដែលត្រូវគិតគូរច្រើនជាងមុន ជាជាងគិតពីរឿងស្នេហាតែម្យ៉ាង។ ម្យ៉ាងទៀត ក្នុងវ័យនេះអ្នកនឹងឈប់គិតពីស្នេហាលេងៗ ឬកំដរអារម្មណ៍ទៀតហើយ បើមានគឺមានលក្ខណៈពិតប្រាកដតែម្ដង។

៤. គ្រួសារគឺសំខាន់បំផុតសម្រាប់អ្នក

ចំណុចដែលអ្នកផ្ដោតសំខាន់នៅពេលនេះ មិនមែនរឿងរៀន រឿងមិត្ត រឿងសង្សារ រឿងដើរលេងដូចមុនទៀតទេ ព្រោះអ្នកអាយុកាន់តែច្រើន ការគិតរបស់អ្នកគឺផ្លាស់ប្ដូរដូចគ្នា។ អ្នកនឹងយល់ការកាន់តែច្រើន និងមើលឃើញក្ដីសុខរបស់មនុស្សនៅជុំវិញខ្លួនច្រើនជាងខ្លួនឯង អ្នកនឹងងាកមកយកចិត្តទុកដាក់មនុស្សក្នុងគ្រួសារកាន់តែច្រើន ជាពិសេសឪពុកម្ដាយ ព្រោះពួកគាត់ក៏កាន់តែចាស់ជាងមុន។

៥. យល់ពីសង្គមការងារ

នៅពេលនៅរៀន អ្វីដែលអ្នកត្រូវធ្វើគឺគ្រាន់តែខំរៀនប៉ុណ្ណោះ ដើម្បីគ្រប់យ៉ាងនឹងបានតាមអ្នករំពឹងទុក។ ប៉ុន្តែនៅពេលឈានជើងចូលជីវិតធ្វើការ អ្នកនឹងមិនអាចស្មានដឹងឡើយថា អ្វីដែលអ្នកខំប្រឹងនឹងហុចផលតាមការរំពឹងទុកឬក៏អត់ ព្រោះការខំធ្វើការមិនមែនជាបច្ច័យតែម្យ៉ាងនោះឡើយដើម្បីឲ្យអ្នកទទួលបានជោគជ័យ ប៉ុន្តែវានៅមានកត្តាជុំវិញជាច្រើនទៀត មិនថាមិត្តរួមការងារ ជំនាញក្នុងការនិយាយ អារម្មណ៍បុគ្គល និងកត្តាជាច្រើនទៀត ៕