ទាំងនេះជាហេតុផលដែលប្រុសៗ គួរតែស្រលាញ់មនុស្សស្រីចូលចិត្តដើរកម្សាន្ត

2019-01-15 08:00:00
ចំនួនមតិ 0 | ចំនួនចែករំលែក 0

មនុស្សប្រុសដែលនៅលីវ មិនទាន់រកគូបាននឹងគេ រើសច្រើនមិនដឹងមនុស្សស្រីមួយណាទើបស័ក្តិសម កុំនៅស្ទាក់ស្ទើរតទៅទៀត។ ក្នុងចំណោមមនុស្សស្រីល្អៗ បើមានម្នាក់ណាចូលចិត្តដើរលេងកម្សាន្ត ឬធ្វើដំណើរបែបផ្សងព្រេង ជ្រើសរើសម្នាក់នោះចុះមិនខុសទេ។ ពេលមានដៃគូស៊ីចង្វាក់បែបនេះ ជីវិតអ្នកនឹងផ្លាស់ប្តូរ អាចទទួលបានបទពិសោធន៍ថ្មីប្លែក រួមទាំងហេតុផលជាច្រើនទៀតរាប់មិនអស់។

១. នាងជាមនុស្សស្រី រហ័សរហួន ឆ្លាតវ័យ អាចរកអ្វីថ្មីៗជាចំណីអារម្មណ៍ប្លែកៗ និងចូលចិត្តនិយាយសន្ទនាពីនេះពីនោះបង្កភាពសប្បាយរីករាយ។

២. នាងអាចរៀបចំគម្រោងសម្រាប់ដំណើរកម្សាន្ត ចាត់ចែងលុយកាក់បានល្អ កក់សំបុត្រយន្តហោះក្នុងតម្លៃទាប រកកន្លែងស្នាក់នៅដែលស្អាតហើយធូរថ្លៃទៀត ដូច្នេះមិនថាទៅដល់ទីណា អ្នកគ្មានថ្ងៃធុញទ្រាន់នឹងជីវិតឡើយ ពេលបាននៅជាមួយនាង។

៣. នាងពោរពេញដោយថាមពលនិងសកម្មខ្លាំងណាស់ ទោះបីត្រូវដើររុករកហត់ប៉ុណ្ណាក៏មិនត្អូញត្អែរម្ញ៉ិកម្ញ៉ក់ ថែមទាំងអាចជួយជំរុញឲ្យអ្នក មានភាពរឹងមាំ មានកម្លាំងហានក្លាដូចនាងដែរ។

នាងតែងបង្កើតភាពសប្បាយរីករាយ សាងអនុស្សាវរីយ៍ល្អៗ ធ្វើឲ្យទំនាក់ទំនងស្នេហាកាន់តែផ្អែមល្ហែមមានន័យ។

៤. នាងចេះបត់បែនតាមកាលៈទេសៈ និងងាយចុះសម្រុង ដោយសារតែធ្លាប់ឆ្លងកាត់ដំណើរកម្សាន្តជាច្រើនលើក វាបានក្លាយជាមេរៀនជួយឲ្យនាងចេះសម្របខ្លួនបែបនេះ។

៥. នាងមិនមែនជាមនុស្សសម្ភារនិយម ចាត់ទុកថាជាសំណាងដ៏ធំមួយសម្រាប់មនុស្សប្រុស ព្រោះអ្នកមិនចាំបាច់ចំណាយលុយលើរបស់ថ្លៃទំនើបដើម្បីផ្គាប់ចិត្តនោះទេ ត្រឹមស៊ុមដាក់រូបថតពីរនាក់ពេលទៅដើរលេងជុំគ្នា ក៏នាងរំភើបហួសថ្លែងទៅហើយ។

៦. នាងជាមនុស្សពូកែដោះស្រាយបញ្ហា មានសមត្ថភាពគិតអ្វីមួយផ្អែកលើហេតុផលច្បាស់លាស់ត្រឹមត្រូវ និងជាអ្នកប្រឹក្សាយោបល់ដ៏ល្អ មិនខ្លាចក្នុងការតតាំងជាមួយបញ្ហាគ្រប់បែបយ៉ាង។

៧. នាងចេះបើកចិត្តទូលាយ មិនចូលចិត្តប្រកាន់ច្រើន ព្រោះនាងដឹងថា អ្វីក៏ដោយតែងមានចំណុចដូចនិងចំណុចផ្ទុយ ប្រៀបបាននឹងដំណើរកម្សាន្តដែលមានវប្បធម៌ប្រពៃណីខុសៗគ្នាទៅតាមតំបន់ឬប្រទេសនិមួយៗ បែបនេះហើយទើបបានជានាងមិនចង្អៀតចង្អល់ វាយតម្លៃផ្តេសផ្តាស ពេលឃើញដៃគូរបស់ខ្លួនមានចំណុចណាមិនដូចគ្នា។

៨. នាងនឹងត្រូវរ៉ូវជាមួយមិត្តភ័ក្តិរបស់អ្នកដោយមិនរើសអើង ព្រោះនាងរួសរាយ មិនអៀនប្រៀន ចូលចិត្តនិយាយលេងសើច ចូលសង្គមច្រើន ទៅណាមកណាក៏មានគេចូលចិត្តគ្រប់គ្នា។

៩. នាងខិតខំប្រឹងធ្វើការ ដូច្នេះហើយទើបបានជានាងចូលចិត្តដើរកម្សាន្តលំហែកាយឲ្យបានធូរស្រាល ជាពិសេសនាងចេះគ្រប់គ្រងលុយកាក់បានល្អ អាចបែងចែកសម្រាប់សន្សំ និងទុកមួយចំណែកសម្រាប់ដើរលេង មិនរិះពេកហើយក៏មិនខ្ជះខ្ជាយពេកដែរ។

១០. នាងស្រស់ស្អាតគួរឲ្យស្រលាញ់តាមរបៀបខ្លួនឯងមិនចម្លងនរណា ថែមទាំងអាចផ្លាស់ប្តូរជីវិតអ្នកឲ្យទៅជាវិជ្ជមាន ស្រស់ស្រាយ មានពន្លឺ ទោះបីនៅទីណា គ្មានWiFi ឲ្យតែមាននាងនៅជិត អ្នកច្បាស់ជាមានអារម្មណ៍ថាគ្រប់គ្រាន់ និងចង់មានពេលវេលាបែបនេះពេញមួយជីវិត៕