បើមិនចង់ចម្លងជំងឺចូលក្នុងខ្លួន ដាច់ខាតកុំប្រើរបស់ទាំងនេះរួមគ្នា

2018-12-28 09:15:00
ចំនួនមតិ 0 | ចំនួនចែករំលែក 0

ភាគច្រើនអ្នកបានដឹងហើយថា ការប្រើកាសស្តាប់ចម្រៀងអាចបង្កបង្កើតបាក់តេរីក្នុងត្រចៀក។ ចុះទម្រាំប្រើរួមគ្នាទៀត វានឹងអាចចម្លងបាក់តេរី ធ្វើឲ្យត្រចៀកមានបញ្ហាមិនខាន។ ដើម្បីការពារសុខភាព និងមិនចម្លងមេរោគផ្សេងៗចូលទៅក្នុងខ្លួន មានរបស់របរជាច្រើនទៀត ដាច់ខាតកុំប្រើរួមគ្នា ទោះបីស្និទ្ធគ្នាយ៉ាងណាក៏ដោយ។

១. កន្ត្រៃកាត់ក្រចក

យើងមិនអាចមើលនឹងភ្នែកទទេឃើញឡើយ ប៉ុន្តែម្រាមដៃនិងក្រចករបស់មនុស្ស ផ្តុំទៅដោយបាក់តេរី វីរុស និងផ្សិត ដែលអាចចម្លងពីមនុស្សម្នាក់ទៅម្នាក់ទៀត ដោយការប្រើកន្ត្រៃកាត់ក្រចករួមគ្នា។ ជាពិសេស វាអាចចម្លងវីរុសម្យ៉ាងឈ្មោះថា HPV (human papillomavirus) ។

២. ក្រវិល

មានសរសៃឈាមជាច្រើននៅផ្នែកត្រចៀក ដូច្នេះហើយវាងាយនឹងបញ្ជូនមេរោគ ប្រសិនបើអ្នកខ្ចីក្រវិលមិត្តភ័ក្ដិមកពាក់ ដោយមិនបានសម្លាប់ជាមួយអាកុលជាមុន។

៣. ក្រេមលាបមាត់

មិនថាជាក្រេមពណ៌ឬក្រេមរលោងទេ បើអ្នកលាបដដែលគ្នា វីរុសអ៊ប៉ស (herpes) ដែលមាននៅលើបបូរមាត់ នឹងបញ្ជូនពីមនុស្សម្នាក់ទៅមនុស្សម្នាក់។

៤. ដង្កៀបដករោមចិញ្ចើម

បើអ្នកប្រើដង្កៀបរបស់អ្នកដទៃ ដករោមចិញ្ចើមតែ២-៣សរសៃ គឺគ្មានបញ្ហានោះទេ ប៉ុន្តែក្នុងករណីមានចេញឈាម វាពិតជាគ្រោះថ្នាក់ខ្លាំងបំផុត ដូចជាអាចចម្លងជំងឺថ្លើមប្រភេទសេ និងមេរោគអេដស៍ជាដើម។

៥. ឡេលាបក្លៀក

ឡេលាបក្លៀកដែលមានក្បាលមូល អាចនាំបាក់តេរីចូលទៅក្នុងរន្ធក្លៀក នៅពេលអ្នកទើបកោររួច។ ឡេលាបក្លៀកខ្លះមានក្លិនក្រអូបពិតមែន ប៉ុន្តែគ្មានតួនាទីការពារបាក់តេរីឡើយ។ មុនទិញគួរពិនិត្យមើលឲ្យបានត្រឹមត្រូវ ជ្រើសរើសធាតុផ្សំដែលមានដាក់ថា ការពារបាក់តេរី (antibacterial ) ហើយហាមប្រើប្រាស់រួមគ្នាដាច់ខាត ទោះបីជាក្រុមគ្រួសារក៏ដោយ។

៦. កន្សែងជូតខ្លួន

ភាគល្អិតតូចៗដែលជាមេរោគបានតោងជាប់កន្សែងជូតខ្លួន ពេលអ្នកព្យួរវានៅក្នុងបន្ទប់ទឹកឬនៅកន្លែងគ្មានខ្យល់គ្មានពន្លឺ។ ប្រសិនបើអ្នកធំក្លិនផ្អួរ មានន័យថាកន្សែងនោះពោរពេញដោយបាក់តេរី អាចចម្លងមេរោគ បណ្តាលឲ្យកើតមុន រោលស្បែក...។ ដើម្បីការពារមិនឲ្យមានគ្រោះថ្នាក់ គួរបោកគក់ហាលឲ្យស្ងួត បន្ទាប់ពីប្រើប្រាស់៤-៥ដង និងប្រើតែម្នាក់ឯងបានហើយ។

៧. សាប៊ូដុំដុសខ្លួន

បាក់តេរី និងវីរុសផ្សេងៗ នឹងនៅទុំជាប់នឹងសាប៊ូដុំ បន្ទាប់ពីអ្នកដុសខ្លួនហើយ។ ដើម្បីកាត់បន្ថយពីហានិភ័យនានា គួរប្រើសាប៊ូទឹកដែលប្រសើរជាង។

៨. សំណាញ់ដុសខ្លួន

សំណាញ់ដុសខ្លួនមិនងាយស្ងួតនោះទេ បន្ទាប់ពីអ្នកប្រើវារួច ហើយវាជាបណ្តុំនៃបាក់តេរីមិនចាញ់កន្សែងជូតខ្លួនប៉ុន្មានទេ។ ត្រូវដាក់ហាលវាឲ្យស្ងួត និងប្រើប្រាស់ម្នាក់ឯងជានិច្ច។

៩. ជក់ផាត់មុខ

មិនមែនត្រឹមតែជក់ផាត់មុខទេ ដែលមិនត្រូវប្រើរួមគ្នា និយាយរួមទៅ ឲ្យតែរបស់ណាត្រូវប្រើប៉ះនឹងធាតុរាវក្នុងរាងកាយដូចជា ទឹកភ្នែក ទឹកមាត់ ឈាម ឬមុន ហាមប្រើដដែលគ្នា ជាពិសេសរបស់ដាក់ឲ្យសាកល្បងនៅតាមហាងនានា។

១០. កាសស្តាប់ចម្រៀង

ពិតណាស់ កាសស្តាប់ចម្រៀង អាចបង្កបាក់តេរីក្នុងត្រចៀក ជាពិសេសពេលអ្នកប្រើវាក្នុងអំឡុងពេលហាត់ប្រាណបែកញើស។ បើអ្នកចង់ខ្ចីកាស ពីនរណាម្នាក់ ត្រូវប្រាកដថាអ្នកបានយកសំឡីជូតជាមួយអាកុលជាមុនសិន។ ****ដើម្បីការពារសុវត្ថិភាពរបស់អ្នក សូមមានការប្រុងប្រយ័ត្នទាំងអស់គ្នាណា។**

ប្រភព៖ Brightside ប្រែសម្រួល៖ ដេត ឈុនអ៉ី