អ្នកសំណាងធំខ្លាំងណាស់ បើអាចបានបុរសមាន ៧ចំណុចនេះជាគូ

2018-12-04 06:32:50
ចំនួនមតិ 0 | ចំនួនចែករំលែក 0

សម័យនេះពិភពលោកកាន់តែចង្អៀត ដោយសារតែបច្ចេកវិទ្យាធ្វើឲ្យមនុស្សអាចជួបគ្នាកាន់តែងាយជាងមុន ស្គាល់គ្នាកាន់តែងាយជាងមុន ទំនាក់ទំនងស្នេហាក៏កើតឡើងងាយជាងមុនដូចគ្នា។ ប៉ុន្តែស្នេហាសម័យនេះមកលឿន ទៅវិញក៏លឿន ធ្វើឲ្យមនុស្សស្រីជាច្រើនឈឺចាប់មិនតិចទេ។ មនុស្សល្អ មនុស្សស្រលាញ់ស្មោះ ហាក់មានចំនួនកាន់តែតិច។ ខាងក្រោមនេះនឹងបង្ហាញពីគុណសម្បត្តិខ្លះៗរបស់បុរសល្អៗ ដែលបើសិននារីណាបានជាគូអនាគតគឺចាត់ទុកថាមានសំណាងខ្លាំងណាស់៖

១. មិនចេះកុហក

មនុស្សស្រីជាច្រើនអ្នកប្រាកដជាធ្លាប់ឈឺចាប់ដោយសារត្រូវសង្សារកុហកមែនអត់? កុហកតាំងពីរឿងតូចៗ ដូចជារឿងលេងហ្គេម រហូតដល់រឿងធំដូចជាលួចមានស្រីតែម្ដង។ មនុស្សប្រុសមួយចំនួនក៏ឲ្យហេតុផលសម្រាប់ការនិយាយកុហកថាមិនចង់ឈ្លោះគ្នា ខ្ជិលឈ្លោះប្រកែក ប៉ុន្តែមិនបានយល់ទេថាការឈ្លោះគ្នាមួយភ្លែតហើយនឹងអាចល្អនឹងគ្នាវិញ ប៉ុន្តែការកុហកនឹងធ្វើឲ្យទំនុកចិត្តទាំងអស់ត្រូវបាត់បង់។ ដូច្នេះហើយបើអ្នកបានជួបប្រុសៗដែលមិននិយាយកុហក មិនថារឿងតូច ឬរឿងធំ សូមថែរក្សាគេឲ្យបានល្អ។

២. យកចិត្តទុកដាក់មិនប្រែប្រួល មនុស្សស្រីគ្រប់គ្នាប្រាកដជាធុញទ្រាន់ហើយមែនអត់ចំពោះមនុស្សប្រុសដែលមហាល្អនៅពេលដំបូងៗ បែបយកចិត្តទុកដាក់គ្រប់យ៉ាង មើលថែគ្រប់ជំហាន ប៉ុន្តែដល់បានមួយរយៈក៏ចាប់ផ្ដើមចេញធាតុពិត ចាប់ផ្ដើមទុកមនុស្សស្រីរបស់ខ្លួនចោល លែងចាប់អារម្មណ៍។ ដូច្នេះហើយទើបមនុស្សស្រីមិនសូវប្រាថ្នាបុរសដែលផ្អែមល្ហែមខ្លាំងពេកឡើយ សុំត្រឹមតែបុរសម្នាក់ដែលស្រលាញ់ យកចិត្តទុកដាក់នាងធម្មតាប៉ុន្តែមិនថមថយទោះស្រលាញ់គ្នាយូរប៉ុណ្ណាក៏ដោយ។

រូបតំណាង

**៣. សន្យាហើយតែងធ្វើ**

គួរឲ្យស្អប់ណាស់មែនអត់ មនុស្សប្រុសដែលចូលចិត្តសន្យាអ្វីៗដូចអស្ចារ្យណាស់ ប៉ុន្តែដល់ទង្វើជាក់ស្ដែង គឺមិនបាន១%នៃអ្វីដែលខ្លួននិយាយឡើយ។ ប៉ុន្តែកុំទាន់អស់សង្ឃឹមអី ព្រោះក៏នៅមានដែរ មនុស្សប្រុសដែលនិយាយម៉ាត់ណាម៉ាត់ហ្នឹង។ បុរសបែបនេះហើយដែលអ្នកគួរជ្រើសរើសព្រោះគេជាមនុស្សមានទំនួលខុសត្រូវលើអ្វីដែលខ្លួននិយាយ មិនមែនធ្វើឲ្យអ្នករំពឹងខ្ពស់ ហើយខកបំណងនៅពេលក្រោយនោះឡើយ។

៤. ហ៊ានបង្ហាញឲ្យគេដឹងថាស្រលាញ់យើង

មនុស្សប្រុសដែលហ៊ានបង្ហាញក្ដីស្រលាញ់ចំពោះយើង មិនសំដៅលើការឱបថើបទេ ប៉ុន្តែសំដៅលើការយកចិត្តទុកដាក់ផ្សេងៗ ដែលបង្ហាញថាយើងជាមនុស្សសំខាន់របស់គេ ទាំងខាងមុខ និងក្រោយខ្នងអ្នកដទៃ។

៥. យល់ព្រមកែលម្អខ្លួនដើម្បីយើង

ការផ្លាស់ប្ដូរមិនមែនមានន័យថាគេផ្លាស់ប្ដូរគ្រប់យ៉ាងតាមបញ្ជារបស់យើងនោះទេ ប៉ុន្តែសំដៅលើការផ្លាស់ប្ដូរចំណុចខ្លះៗរបស់គេដើម្បីឲ្យចុះសម្រុងជាមួយយើង ដូចជា គេព្រមកាត់បន្ថយពេលលេងហ្គេមដើម្បីមកមើលរឿងស្នេហាជាមួយយើង គេព្រមប្ដូរទម្លាប់បើកឡានលឿនៗនៅពេលជិះជាមួយយើង គេព្រមកាត់បន្ថយពេលវេលាជួបជុំមិត្តភ័ក្ដិដើម្បីចំណាយពេលជាមួយយើង។ល។ រឿងទាំងនេះអាចជារឿងតូចៗក៏ពិតមែន ប៉ុន្តែវាមិនងាយស្រួលឡើយដើម្បីរកបានមនុស្សដែលព្រមកាត់បន្ថយអ្វីដែលគេចូលចិត្តដើម្បីមកធ្វើអ្វីដែលយើងចូលចិត្ត។

៦. ផ្ដល់កិត្តិយសឲ្យយើង

ចំណុចនេះមើលទៅដូចបុរាណបន្តិច ប៉ុន្តែវានៅតែជារឿងសំខាន់ដែលមនុស្សស្រលាញ់គ្នាត្រូវធ្វើដើម្បីគ្នា។ ស្រលាញ់គ្នាត្រូវផ្ដល់កិត្តិយសឲ្យគ្នា ផ្ដល់តម្លៃឲ្យគ្នា។ មនុស្សប្រុសដែលផ្ដល់កិត្តិយសឲ្យយើងក្នុងឋានៈជាមនុស្សដែលគេស្រលាញ់ ដោយមិនបំពានយើងទាំងរាងកាយ និងផ្លូវចិត្ត មិននិយាយស្ដីគំរោះគំរើយ ស្រែកគំហក មិនលាក់បាំង មិនក្បត់ចិត្ត នោះចាត់ទុកថាជាសុភាពបុរសដែលយើងគួរផ្ញើជីវិតបាន។

៧. តាំងចិត្តសាងអនាគតជាមួយយើង

ការពិតទៅគូស្នេហ៍សម័យនេះ នៅពេលស្រលាញ់គ្នាប្រាកដជាមាននិយាយគ្នាហើយ ថាបន្តិចទៀតនឹងបែបនេះ ឆ្នាំក្រោយនឹងធ្វើរឿងនេះ រឿងនោះ... ប៉ុន្តែកុំជឿជាក់លើពាក្យសម្ដីខ្លាំងពេក ប៉ុន្តែចូរជឿលើទង្វើរបស់គេវិញ។ បើអ្នកបានជួបមនុស្សប្រុសដែលមានចរិតមោះមុតក្នុងការកសាងអនាគត និងអាចមើលឃើញច្បាស់ថាយើងក៏មានចំណែកក្នុងអនាគតរបស់គេ នោះមានន័យថាអ្នកមានសំណាងហើយ ៕