ចង់ស្រកគីឡូដោយមិនប៉ះពាល់សុខភាព គួរសាកវិធីសាស្ត្រជនជាតិជប៉ុនវិញ

2018-11-04 02:00:00
ចំនួនមតិ 0 | ចំនួនចែករំលែក 0

ចង់ស្រកគីឡូមិនមែនមានន័យថាអ្នក ត្រូវតែតមអត់អាហារនោះទេ។ ធ្វើបែបនោះ វាអាចបណ្តាលឲ្យឈឺក្រពះ រហូតដល់ប៉ះពាល់សុខភាពធ្ងន់ធ្ងរក៏មានដែរ។ ក្រៅពីការធ្វើលំហាត់ប្រាណ អ្នកគួរតែងាកមកផ្តោតពីរបៀបញ៉ាំតាមជនជាតិជប៉ុនវិញម្ដង ដើម្បីទទួលបានរាងស្អាត ស្រកគីឡូដោយមិនប៉ះពាល់ដល់សុខភាព។

១. ការជ្រើសរើសរបបអាហារឲ្យបានត្រឹមត្រូវ

ជនជាតិជប៉ុនត្រូវបានគេឲ្យឈ្មោះថា ជាជនជាតិដែលមានសុខភាពល្អ និងមានអាយុវែងជាងគេ។ នេះក៏ព្រោះតែ ពួកគេចេះជ្រើសរើសរបបអាហារត្រឹមត្រូវ ដោយការញ៉ាំបន្លែ សារាយសមុទ្រ និងសាច់ត្រីរៀងរាល់ពេលបាយ។ អាហារទាំងនោះគឺត្រជាក់ ហើយអាចជួយឲ្យអ្នកស្រកគីឡូយ៉ាងមានប្រសិទ្ធភាព។ ម្យ៉ាងវិញទៀតជនជាតិជប៉ុនកម្រញ៉ាំអាហារ Fast Food ដែលសម្បូរជាតិស្ករ និងជាតិខ្លាញ់ច្រើន នាំឲ្យដុះក្បាលពោះពិបាកស្រោចស្រង់ឡើងវិញណាស់។

២. ញ៉ាំស៊ុបមុនអាហារពេលល្ងាច

មុនញ៉ាំអាហារពេលល្ងាច ជប៉ុនតែងតែញ៉ាំស៊ុបមួយចាន ដែលជាតិកាឡូរីតិច។ ស៊ុបអាចជួយឲ្យអ្នកមានកម្លាំង មានអារម្មណ៍ល្អ និងមិនញ៉ាំលើសកម្រិតនៅពេលល្ងាច ហើយវាជាទម្លាប់ដ៏ល្អបំផុតសម្រាប់អ្នកចង់តម ឲ្យមានរាងស្អាត។

៣. ញ៉ាំចេកមុនពេលបាយ

ចេកតែងតែមាននៅក្នុងបញ្ជីសម្រកទម្ងន់ ហេតុនេះហើយជនជាតិជប៉ុនមិនដែលភ្លេចញ៉ាំចេកមួយផ្លែមុនពេលបាយ ព្រោះវាអាចជួយគ្រប់គ្រងថាមពល មានជាតិកាឡូរីតិច មិនធ្វើឲ្យធាត់។

៤. ញ៉ាំយឺតៗ ទំពាមួយៗ

ទោះបីជាជីវិតរបស់ជនជាតិជប៉ុនមានភាពរវល់ ឬកើតទុក្ខយ៉ាងណា ក៏គេមិនដែលអត់អាហារដែរ។ ជាពិសេស រាល់ពេលដែលញ៉ាំម្តងៗ ប្រជាជនជប៉ុនតែងញ៉ាំយឺតៗ ទំពាឲ្យបានម៉ត់ល្អ ដើម្បីកុំឲ្យប៉ះពាល់ដល់ក្រពះ។ មួយវិញទៀតឮការទំពាយឺតៗ អាចជួយឲ្យរាងកាយ ស្រូបយកជីវជាតិបានយ៉ាងល្អ។

៥. ផ្តោតអារម្មណ៍ពេលកំពុងញ៉ាំអាហារ

ជប៉ុន មានទម្លាប់មួយ គឺពេលដែលញ៉ាំអាហារ គេមិនគិត បារម្ភ ខ្វាយខ្វល់ ឬធ្វើរឿងអ្វីផ្សេងដូចជាមើលទូរទស្សន៍ ចុចទូរសព្ទអីនោះឡើយ ព្រោះវាមិនល្អសម្រាប់ក្រពះ និងពោះវៀន ហើយថែមទាំងអាចធ្វើឲ្យអ្នកញ៉ាំលើសកម្រិតទៀតផង។ ទន្ទឹមនឹងការតមអាហារនេះដែរ ត្រូវគួបផ្សំជាមួយការហាត់ប្រាណឲ្យបានទៀងទាត់ ដើម្បីទទួលបានលទ្ទផល និងរូបរាងដូចប្រាថ្នា៕