កុំធ្វើជាមនុស្សបញ្ញើក្អែក តែចូរធ្វើជាមនុស្សអ័រគីដេ

2018-10-26 04:16:16
ចំនួនមតិ 0 | ចំនួនចែករំលែក 0

អ័រគីដេ និងបញ្ញើក្អែក

រុក្ខជាតិទាំងពីរនេះមានលក្ខណៈស្រដៀងគ្នា ដោយសុទ្ធតែជារុក្ខជាតិដែលតោងទាមរុក្ខជាតិដទៃដើម្បីខ្លួនបានលូតលាស់។ តែអ្វីដែលខុសគ្នានោះគឺ៖

ដើមអ័រគីដេ

ឫសរបស់វាគ្មានពិស មិនដណ្ដើមអាហារពីដើមដែលខ្លួនតោង និងចេញផ្កាស្រស់ស្អាត។ ពូជអ័រគីដេខ្លះមានតម្លៃថ្លៃ ជាទីប្រាថ្នារបស់អ្នកផងទាំងពួង ដែលអាចចាត់ទុកថាជារុក្ខជាតិដ៏មានមន្តស្នេហ៍។

ដើមបញ្ញើក្អែក

ឫសមានពិស ដណ្ដើមជីវជាតិទាំងអស់ពីដើមឈើដែលខ្លួនតោង ហើយក៏គ្មានផ្កាអ្វីឲ្យមើលទៅល្អមើលដែរ។ វាជារុក្ខជាតិអភ័ព្វ គ្មានអ្នកគាប់ប្រាថ្នា ដោយសារពិសរបស់វានេះឯង ពោលនៅពេលដែលវាទៅតោងដើមឈើណាហើយ ដើមឈើនោះនឹងត្រូវស្ងួតខ្សោះ រហូតដល់ងាប់។

មនុស្សមានចរិតជាដើមអ័រគីដេ ជាមនុស្សមានមន្តស្នេហ៍

ជាកូនអ្នកណា ក៏ជាកូនល្អគាប់សម្រាប់ឪពុកម្ដាយ

ជាសិស្សអ្នកណា ក៏គ្រូបាអាចារ្យក៏អាណិតស្រលាញ់

ជាសង្ឃវត្តណា ក៏នាំតែការរីកចម្រើនដល់វត្តនោះ ជាសង្ឃដែលកសាងប្រយោជន៍ ប្រតិបត្តិពុទ្ធវិន័យ សុភាពរៀបរយ នាំកិត្តិយស និងកេរ្តិ៍ឈ្មោះដល់វត្ត។

មនុស្សសន្ដានបញ្ញើក្អែក គឺជាមនុស្សមានពិស

ជាកូនអ្នកណា ក៏ធ្វើឲ្យឪពុកម្ដាយក្ដៅក្រហាយ បង្កបញ្ហា បំផ្លិចបំផ្លាញទ្រព្យសម្បត្តិ វង្សត្រកូល

ជាសិស្សអ្នកណា ក៏ធ្វើឲ្យគ្រូបាអាចារ្យរអា ធ្វើឲ្យខូចកេរ្តិ៍ឈ្មោះសាលារៀន។

បើជាសង្ឃ ក៏ជាសង្ឃដែលគ្មានការគោរពច្បាប់ធម៌វិន័យ មិនចាប់អារម្មណ៍ធម៌អាថ៌ មិនមានរបៀបរៀបរយ បង្កតែរឿងដែលនាំឲ្យអាប់ឱនដល់វត្ត និងពុទ្ធសាសនា។

ឃើញបែបនេះ ចូរជ្រើសរើសទៅថា អ្នកចង់ក្លាយជាមនុស្សចរិតអ័រគីដេ ឬមនុស្សសន្ដានបញ្ញើក្អែក ៕