ជិតដល់វ័យ៣០ឆ្នាំ ស្រីៗគួរធ្វើកិច្ចការច្រើនយ៉ាង មិនមែនផ្ដោតតែលើរឿងស្នេហា

2018-10-05 06:00:00
ចំនួនមតិ 0 | ចំនួនចែករំលែក 0

មុនឈានចូលដល់វ័យខ្ទង់៣០ឆ្នាំ ស្រីៗព្រួយបារម្ភជាងគេ គឺសម្រស់ប្រែប្រួល ខ្វល់ខ្វាយពីរឿងអនាគត ការបង្កើតគ្រួសារ ខ្លាចគេហៅមីងជាដើម។ វ័យខ្ទង់៣០ឆ្នាំនេះទៀតសោត ជាអាយុដែលល្អបំផុតនៅក្នុងជីវិត ព្រោះអ្នកមានគំនិតចាស់ទុំ ថែមទាំងយល់កាន់តែច្បាស់ ពីពិភពលោកដ៏ធំធេងមួយនេះ។ មានកិច្ចការជាច្រើន ដែលអ្នកគួរធ្វើ មិនមែនផ្ដោតតែលើរឿងស្នេហានោះទេ ដើម្បីធ្វើឲ្យជីវិតស្រស់ស្រាយ និងមានមោទនភាពដែលបានបំពេញកាតព្វកិច្ចសម្រាប់ខ្លួនឯង។

មិនខ្ជះខ្ជាយពេលវេលាជាមួយមនុស្សណាដែលឥតប្រយោជន៍តទៅទៀត ហើយចំណាយពេលមានតម្លៃដើម្បីអភិវឌ្ឍខ្លួនឯងវិញ។
មុនចំណាយលុយ ដើរផ្សារទិញទំនិញ ត្រូវគិតគូរឲ្យបានវែងឆ្ងាយ ដឹងថាអ្វីចាំបាច់ អ្វីឥតប្រយោជន៍។
ថែរក្សានូវអ្វីដែលលុយមិនអាចទិញបាន គឺសុខភាពជារឿងចម្បង។
ប្រើប្រាស់ហេតុផល ដើម្បីដោះស្រាយបញ្ហា មិនមែនបណ្ដោយទៅតាមអារម្មណ៍ ឬភាពឆេវឆាវ។
ជីវិតខ្លីណាស់ រាប់អានតែមិត្តភ័ក្តិ ត្រូវមើលឲ្យបានម៉ត់ចត់ កុំយកខ្លួនបៀតជាមួយអ្នកណាដែលមានមុខពីរ។

មិនដេកកើតទុក្ខ ពេលរឿងរ៉ាវមិនសមបំណង ចេះទទួលស្គាល់ការពិត និងព្យាយាមបន្ត។
អ្នកដទៃមានអ្វីជារឿងរបស់គេ កុំធ្វើការប្រៀបធៀប សមត្ថភាពរបស់មនុស្សម្នាក់ៗខុសៗគ្នា។
ធ្វើការងារដែលអ្នកពេញចិត្ត បើបង្ខំខ្លួនឯង គ្មានថ្ងៃរីកចម្រើនឡើយ។
មុនធ្វើអ្វីមួយ ផ្លាស់ប្តូរពីគំនិត "ទៅមិនរូច” ហើយជំនួសមកវិញដោយពាក្យ "អាចធ្វើបាន" ។

មានទំនួលខុសត្រូវលើការងារ ប៉ុន្តែមិនមែនធ្វើរហូតភ្លេចបាយភ្លេចទឹកនោះទេ។ បែងចែកពេលវេលា ឲ្យបានច្បាស់លាស់ រវាងមិត្តភ័ក្តិ ក្រុមគ្រួសារ និងមនុស្សដែលអ្នកស្រលាញ់។
ជ្រើសរើសរបបអាហារ ដែលផ្តល់ប្រយោជន៍ចំពោះសុខភាព។
អានសៀវភៅឲ្យបានច្រើន ជាជាងធ្វើរឿងឥតបានការ។
មិនអូសបន្លាយកិច្ចការណា ដែលចាំបាច់ត្រូវបញ្ចប់។
មិនចងគំនុំ និងចេះផ្តល់ឱកាសឲ្យមនុស្សប្រព្រឹត្តកំហុសបានកែខ្លួន។
មានពេលវេលាមួយសមរម្យ ធ្វើដំណើរកម្សាន្តម្នាក់ឯង ដើម្បីស្គាល់រសជាតិថ្មី និងសម្រាកលំហែកាយ។

មិនឈឺក្បាលវិលមុខ ជាមួយគំនិត ពាក្យរិះគន់ទាំងឡាយ ដែលចេញពីមាត់មនុស្សអវិជ្ជមាន។
រៀនពីកំហុសដែលបានកើតឡើងក្នុងអតីតកាល ការពារនិងធ្វើឲ្យល្អឡើងវិញ ក្នុងបច្ចុប្បន្នកាលនិងអនាគតកាល។
ពេលឃើញអ្នកដទៃជោគជ័យ ចូលរួមត្រេកអរ មិនមែនច្រណែនឈ្នានីស។
រាល់ថ្ងៃ ក្រោកឡើងបើកភ្នែក ដោយអារម្មណ៍រីករាយ គិតរឿងល្អៗ ធ្វើអ្វីដែលសប្បាយចិត្ត៕