អ្នកធ្វើការដែលអាចជោគជ័យទៅអនាគត តែងអនុវត្ត ១០ចំណុចនេះ

2018-10-11 10:33:52
ចំនួនមតិ 0 | ចំនួនចែករំលែក 0

នៅក្នុងជីវិតអ្នកធ្វើការ ពីមួយឆ្នាំទៅមួយឆ្នាំតែងជួបប្រទះឧបសគ្គ និងបញ្ហាជាច្រើន ដែលសុទ្ធជាមេរៀន ធ្វើឲ្យយើងកាន់តែរឹងមាំ។ ក្នុងថ្ងៃនេះកញ្ញាសូមចែករំលែកនូវគំនិតល្អៗសម្រាប់អ្នកធ្វើការទាំងឡាយ ដែលធានាថាអានរួចហើយនឹងមានកម្លាំងចិត្តបន្ថែមក្នុងការរស់នៅនិងធ្វើការឆ្ពោះទៅរកគោលដៅរបស់ខ្លួន។ ចំពោះអ្នកដែលមិនទាន់ធ្វើបានគ្រប់ទាំង ១០ចំណុចខាងក្រោមនេះទេ សូមព្យាយាមម្ដងបន្តិចៗ ប៉ុន្តែកុំចុះចាញ់។

រូបតំណាង

**១. បើរើសបាន ចូររើសយកការងារដែលខ្លួនស្រលាញ់**

មិនប្រាកដថាមនុស្សគ្រប់គ្នាមានសំណាងអាចធ្វើការងារដែលខ្លួនស្រលាញ់នោះទេ ប៉ុន្តែបើអ្នកស្ថិតក្នុងចំណោមអ្នកដែលអាចជ្រើសបាន ចូរជ្រើសរើសធ្វើអ្វីដែលខ្លួនស្រលាញ់ នោះអ្នកនឹងលែងមានអារម្មណ៍ហត់នឿយដោយសារការងារ។

២. មនុស្សដែលមិនដែលធ្វើខុសមានតែមនុស្សដែលមិនធ្វើអ្វីសោះប៉ុណ្ណោះ

ចូរកុំខ្លាចថាខ្លួននឹងធ្វើខុស កុំខ្លាចភាពបរាជ័យ ប៉ុន្តែចូរទទួលយកវា ហើយរៀនសូត្រពីកំហុសឆ្គងទាំងនោះកុំឲ្យកើតឡើងជាថ្មី។

៣. ភាពជោគជ័យចាប់ផ្ដើមពីការធ្វើ

បើអ្នកមានគោលដៅ ឬក្ដីស្រមៃ សូមកុំបណ្ដោយឲ្យវានៅតែជាក្ដីស្រមៃ។ កុំមើលស្រាលសមត្ថភាពរបស់ខ្លួនឯង ចូរចាប់ផ្ដើមរៀបចំផែនការ ហើយបញ្ចេញសកម្មភាពធ្វើដើម្បីឲ្យក្ដីស្រមៃនោះក្លាយជាការពិត។

រូបតំណាង

៤. កម្លាំងចិត្តពីណា ក៏មិនសំខាន់ស្មើកម្លាំងចិត្តពីខ្លួនឯង

នៅថ្ងៃដែលត្រូវជួបនឹងឧបសគ្គ ឬបញ្ហានានា អាចមានមនុស្សជាច្រើនដែលរង់ចាំលួងលោម ឬផ្ដល់កម្លាំងចិត្តឲ្យអ្នក ប៉ុន្តែចូរចាំជានិច្ចថា គ្មានកម្លាំងចិត្តឯណាសំខាន់ជាងកម្លាំងចិត្តពីខ្លួនឯងដែរ ព្រោះផ្លូវចិត្តរឹងមាំ គឺជាអាវុធដ៏សំខាន់ដែលជួយឲ្យអ្នកអាចឆ្លងកាត់ឧបសគ្គនានាបាន។

៥. ការអភិវឌ្ឍខ្លួនមិនបានកើតឡើងដោយសារពាក្យសរសើរទេ

បើទោះបីពាក្យសរសើរគឺជាពាក្យល្អ ដែលអ្នកណាៗក៏ចង់ឮ ប៉ុន្តែក៏សូមកុំខ្លាចពាក្យរិះគន់ ព្រោះពាក្យរិះគន់គឺជាកញ្ចក់ឆ្លុះបង្ហាញពីចន្លោះខ្វះខាតរបស់យើង។ នៅពេលដឹងពីចំណុចខ្សោយខ្លួនឯង ទើបយើងអាចកែលម្អបានចំចំណុច។ ម្យ៉ាងទៀតពាក្យតិទៀនក៏ប្រៀបដូចជាកម្លាំងជំរុញឲ្យយើងខំប្រឹងដើម្បីយកឈ្នះពាក្យមើលងាយទាំងនោះដែរ។

៦. ចូរស្ដាប់ឲ្យច្រើនជាងនិយាយ

ការស្ដាប់គឺជារឿងងាយ ដែលយើងអាចធ្វើបានល្អជាងការនិយាយ ប៉ុន្តែចូរស្ដាប់ឲ្យយល់។ មុននឹងនិយាយការអ្វីត្រូវគិតពិចារណាឲ្យបានល្អិតល្អន់ ហើយកុំរវល់តែនិយាយរហូតភ្លេចស្ដាប់សម្ដីអ្នកដទៃ។

៧. កុំឈប់អភិវឌ្ឍខ្លួនឯង

ព្រោះពិភពនៃការងារពោរពេញទៅដោយការប្រកួតប្រជែង ហើយឱកាសតែងក្លាយជារបស់អ្នកដែលត្រៀមខ្លួនរួចរាល់ជានិច្ច ដូច្នេះហើយ សូមកុំឈប់អភិវឌ្ឍខ្លួនឯងដើម្បីឲ្យខ្លួនឯងរួចរាល់ក្នុងការទទួលយកគ្រប់ឱកាស។

៨. វិន័យគឺជាគុណសម្បត្តិសំខាន់មួយសម្រាប់បុគ្គលជោគជ័យ

ការចេះគ្រប់គ្រងខ្លួនឯងឲ្យមានរបៀប មានវិន័យក្នុងការធ្វើការ នឹងជួយឲ្យអ្នកធ្វើការបានយ៉ាងមានរបៀបរៀបរយ និងមិនពិបាកឡើយក្នុងការទទួលបានជោគជ័យ។ ការមានវិន័យក្នុងផ្នែកផ្សេងៗទៀតនៃការរស់នៅក៏សុទ្ធតែសំខាន់ដូចគ្នា។

រូបតំណាង

៩. មិត្តភាពពិតជាសំខាន់

យើងមិនអាចបដិសេធបានឡើយ ថាមិត្តរួមការងារល្អមានចំណែកជួយឲ្យមនុស្សជាច្រើនកាន់តែមានអារម្មណ៍ចង់ធ្វើការ។ ចូររៀនសូត្រពីរបៀបចុះសម្រុង និងមានទឹកចិត្តជាមួយមិត្តរួមការងារ នោះអ្នកនឹងកាន់តែមានថាមពល និងឱកាសច្រើនក្នុងវិស័យការងារ។

១០. រាងកាយគឺជាឧបករណ៍សំខាន់បំផុតសម្រាប់ការងារ

ចូរកុំខំប្រឹងធ្វើការធ្ងន់ហួសកម្លាំងដើម្បីបានលុយមកមើលជំងឺនៅពេលក្រោយអី។ ចូរចេះប្រើជីវិតឲ្យមានតុល្យភាព ដោយមើលថែសុខភាព និងរាងកាយរបស់ខ្លួនឯងខ្លះ ៕