បើមានអ្នកមកសួរថា «ម៉េចអត់ទាន់មានគូដូចគេ» ឆ្លើយតបនូវចម្លើយចាក់ដោតទាំងនេះ

2018-10-25 05:00:00
ចំនួនមតិ 0 | ចំនួនចែករំលែក 0

នារីជាច្រើនតែងជួបប្រទះសំណួរដ៏សែនឈឺក្បាលពីអ្នកស្គាល់គ្នា ព្រោះតែមិនមានគូស្នេហ៍ ឬបានរៀបការដូចអ្នកស្របាលៗគ្នា។ ឈប់ព្រួយទៀតទៅ ប្រសិនបើមានអ្នកសួរថា "ហេតុអ្វីមិនទាន់មានគូដូចគេ?” អ្នកអាចឆ្លើយប្រាប់អ្នកទាំងនោះនូវចម្លើយចាក់ដោតចិត្តដូចខាងក្រោម៖

១.ជីវិតគូមិនមែនចេះតែជ្រើសរើសមកទេ តែត្រូវប្រើពេលសិក្សា និងស្វែងយល់ពីគ្នាឲ្យបានច្បាស់លាស់ ទើបទៅថ្ងៃក្រោយគ្មានវិប្បដិសារី។

២.ទុកពេលឲ្យខ្លួនឯងបានស្គាល់ពិភពខាងក្រៅឲ្យអស់ចិត្តសិន ចាំសម្រេចចិត្តទទួលយកពិភពមួយផ្សេងទៀត។ នៅពេលអ្នកបានស្គាល់ខាងក្រៅច្រើន នោះអ្នកនឹងទទួលបានគំនិតល្អប្រសើរជាងមុន ហើយអាចរៀបចំជីវិតគ្រួសារបានល្អប្រសើរ។

៣.សុខចិត្តរៀបការយឺតពេល ក៏មិនទទួលយកអាពាហ៍ពិពាហ៍ខុសដែរ។

៤.គ្រួសារអាចឆាប់រកបាន ប៉ុន្តែថែរក្សាគឺជារឿងដ៏សែនពិបាក។ ដូចនេះទុកពេលឲ្យខ្លួនឯងស្វែងយល់រឿងរ៉ាវសំខាន់ៗជាមុនសិន ទើបអាចរៀបចំគ្រួសារឲ្យមានសុភមង្គលបាន។

៥.ពេលវេលាសំខាន់ក្នុងជីវិតមិនមែនមានតែរឿងស្នេហាមួយទេ ការសិក្សា ការងារ គ្រួសារ សុទ្ធតែសំខាន់ដូចគ្នា។ ម្ល៉េះហើយធ្វើរឿងទាំង ៣ នោះឲ្យជោគជ័យសិន ចាំមានស្នេហាក៏មិនហួសពេលដែរ។

៦.មនុស្សម្នាក់ៗមានចិត្តគំនិតផ្សេងពីគ្នា មិនប្រាកដថាអ្នកចង់បានស្នេហា ហើយអ្នកដទៃចង់បានដូចខ្លួនដែរទេ។ ជាពិសេសរឿងរៀបការសំខាន់ខ្លាំងណាស់ ត្រូវគិតគូរឲ្យបានម៉ត់ចត់ ទើបមិនខកបំណងទៅថ្ងៃមុខ។

៧.ធ្វើឲ្យជីវិតរស់នៅម្នាក់ឯងមានភាពរីករាយពិតប្រាកដសិន ចាំទទួលយកមនុស្សម្នាក់ទៀតមកក្នុងជីវិត។ មិនមែនខ្លួនឯងមួយថ្ងៃៗក្រៀមក្រំមិនឈប់ ហើយរកគ្នាមកក្រៀមក្រំជាមួយដែរទេ៕

ចុចអាន៖វ័យដែលគេមានគូស្រករអស់ទៅហើយ ខ្ញុំវិញរកម្នាក់យល់ចិត្តក៏គ្មាន

អត្ថបទ៖ ទ្រី រ៉ាវី