១២មេរៀនចាក់ដោតដួងចិត្តពីអ្នកប្រឡូកការងារជិត១០ឆ្នាំ

2018-09-27 23:00:00
ចំនួនមតិ 0 | ចំនួនចែករំលែក 0

បន្ទាប់ពីប្រឡូកក្នុងវិស័យការងារបាន១០ឆ្នាំ អ្នកធ្វើការម្នាក់បានចេញមុខរៀបរាប់ពីរឿងពិតមួយចំនួនដោយផ្អែកតាមបទពិសោធន៍របស់ខ្លួន។

រូបតំណាង

**១.** វិធីឡើងប្រាក់ខែឲ្យបានលឿនបំផុតគឺ ការផ្លាស់ប្ដូរក្រុមហ៊ុន មិនមែនរង់ចាំការឡើងតំណែងនៅកន្លែងចាស់ទេ។

២. គ្រួសារគឺជាអ្វីដែលសំខាន់បំផុត។ ក្រុមហ៊ុនមិនស្រឡាញ់អ្នកស្មើគ្រួសាររបស់អ្នកទេ។ បើថ្ងៃនេះអ្នកធ្វើការធ្ងន់ហើយឈឺ ពីរខែទៀតក្រុមហ៊ុននឹងជួលបុគ្គលិកថ្មីធ្វើការជំនួសអ្នកភ្លាម ដូច្នេះត្រូវចេះបែងចែកពេលវេលាផ្ទាល់ខ្លួន និងពេលវេលាការងារឲ្យបានល្អ។

៣. កុំធ្វើការរហូតដល់លែងគិតពីសុខភាពខ្លួនឯង។ គ្មានជោគជ័យណា អាចមកជំនួសសុខភាពយើងដែលបាត់បង់ទៅបានទេ។ នេះគឺជាចំណុចសំខាន់បំផុត។

៤. អ្នកដែលតែងតែនិយាយឲ្យអ្នកលះបង់គ្រប់យ៉ាង, លះបង់ខ្លួនជាមួយការងារ, Office គឺជាផ្ទះ, ធ្វើការឲ្យដល់យប់ៗ ។ល។ ឬនិយាយរឿង company loyalty/spirit/team work ម្ដងហើយម្ដងទៀត គឺជាអ្នកដែលបោកអ្នកប្រើដើម្បីភាពរីកចម្រើនរបស់ខ្លួនឯងប៉ុណ្ណោះ។

រូបតំណាង

៥. អ្នកដែលឡើងតំណែងលឿនដោយសារចេះធ្វើបទបង្ហាញ + ធ្វើ Slide Powerpoint + ពូកែសង្ខេបរាយការណ៍ការងារ តែមិនចេះធ្វើការមានច្រើនណាស់។ អ្នកអាចនៅពីលើពួកគេបានលុះត្រាតែចេះធ្វើការពូកែ ហើយ Present ការងារពូកែផង។

៦. គួរសន្សំលុយតាំងពីឆ្នាំចូលធ្វើការដំបូងៗ ព្រោះឆ្នាំដំបូងនៃការធ្វើការអ្នកអាចនឹងសប្បាយនឹងការចាយលុយរហូតភ្លេចសន្សំ។

៧. ខ្ញុំធ្លាប់ធ្វើការដល់លះបង់គ្រប់យ៉ាង ចោលផ្ទះ ចោលគ្រួសារ ចោលមិត្តភ័ក្ដិ ដើម្បីអតិថិជន ដើម្បីក្រុមហ៊ុន។ ទីបំផុតខ្ញុំក៏បានដឹងថាផលតបស្នងដែលទទួលបានមិនថាជាលុយ ញ៉ាំបាយ Free ឬផឹកស្រា Free ក៏មិនអាចស្មើនឹងអ្វីដែលខ្ញុំបាត់បង់ទៅបានដែរ។

៨. សមត្ថភាពក្នុងការស្វះស្វែងរករៀនសូត្ររកចំណេះដឹងដោយខ្លួនឯង និងហ៊ានសាកល្បងរកខុសរកត្រូវ នឹងជួយឲ្យអ្នករីកចម្រើនបានឆ្ងាយជាងពួកអ្នកដែលសំកុកចាំអ្នកដទៃមកបង្រៀន។

៩. មិត្តរួមការងារទាំង “មិត្តភ័ក្ដិ” និង “អ្នកស្គាល់គ្នា” សូមកុំរំពឹងថាគ្រប់គ្នានឹងស្មោះត្រង់ជាមួយអ្នក។

១០. ត្រូវព្យាយាមរៀនអ្វីថ្មីៗ បន្ថែមពីលើអ្វីដែលពាក់ព័ន្ធនឹងការងារអ្នកឲ្យបានច្រើន។ អាចជាអ្វីដែលអ្នកគិតថាមិនពាក់ព័ន្ធនឹងការងារ ជួនកាលអ្នកអាចត្រូវការប្រើវានៅពេលណាមួយក៏ថាបាន។

១១. ភាសាអង់គ្លេសសំខាន់ណាស់។ បើអ្នកធ្វើការពេញម៉ោង វានឹងអាចធ្វើឲ្យអ្នកមានប្រាក់ខែកាន់តែច្រើន ប៉ុន្តែបើអ្នកជាម្ចាស់មុខជំនួញ វានឹងអាចធ្វើឲ្យអ្នកកាន់តែមានដូចគ្នា។

១២. ត្រូវប្រើថ្ងៃឈប់សម្រាក Annual Leave ឲ្យអស់ កុំបាច់ក្រែងចិត្ត ព្រោះវាជាសិទ្ធិរបស់អ្នក។

ផ្អែកតាមបទពិសោធន៍របស់អ្នកវិញ តើចំណុចណាខ្លះដែលអ្នកធ្លាប់ឆ្លងកាត់ និងគិតថាត្រឹមត្រូវ?

ចុចអាន៖

ប្រភព៖ chonburipost ប្រែសម្រួល៖ ស្វាយ វ៉ាន់ថន