កុំឲ្យគេមើលងាយ ត្រូវធ្វើជានារីដែលអាចពឹងពាក់លើសមត្ថភាពខ្លួនឯង

2018-09-23 06:30:28
ចំនួនមតិ 0 | ចំនួនចែករំលែក 0

ទទួលស្គាល់ថា មនុស្សស្រីនៅមានភាពទន់ខ្សោយជាងបុរស បើប្រៀបធៀបទៅនឹងកម្លាំង ប៉ុន្តែបើនិយាយពីសមត្ថភាពវិញ គឺមិនខុសគ្នានោះទេ។ ហេតុនេះហើយ មនុស្សស្រី គួរដឹងគន្លឹះសំខាន់ៗ៥យ៉ាងបន្ថែមទៀត ដើម្បីពង្រឹងនិងបង្កើនភាពរឹងមាំសម្រាប់ខ្លួនឯង ដោយពុំចាំបាច់ពឹងពាក់តែលើអ្នកដទៃ។

១. មានទំនួលខុសត្រូវ

ប្រសិនបើអ្នកពិតជាចង់ពឹងពាក់លើខ្លួនឯងមែន អ្វីដែលត្រូវធ្វើចម្បងនោះគឺទំនួលខុសត្រូវ។ ឧទាហរណ៍ថា អ្នកចាត់ចែងនិងគ្រប់គ្រង លើការចាយវាយ ដូច្នេះត្រូវធ្វើវាឲ្យបាន មិនចាយលើសកំណត់ ឬចេញទៅខាងក្រៅដោយការអូសទាញពីមិត្តភ័ក្តិ...។ ម្យ៉ាងវិញទៀត បើអ្វីៗមិនរលូនដូចគម្រោងការ ត្រូវរកដំណោះស្រាយដោយខ្លួនឯងសិន កុំប្រញាប់រត់ទៅពឹងអ្នកផ្សេងពេក។

២. ចេះសម្រេចចិត្តដោយជំហរផ្ទាល់ខ្លួន

មានតែអ្នកទេ ដែលមានសិទ្ធិជ្រើសរើសផ្លូវដើរ សម្រាប់ថ្ងៃនេះនិងអនាគត។ ជោគវាសនា ស្ថិតនៅក្នុងកណ្តាប់ដៃរបស់អ្នក ត្រូវចេះសម្រេចចិត្តដោយជំហរផ្ទាល់ខ្លួន ធ្វើអ្វីដែលគិតថាល្អ។ ជម្រើសរបស់ខ្លួនឯង ទោះបីជាខុសក៏អស់ចិត្ត ប្រសើរជាងខុសដោយផ្អែកលើ ការសម្រេចរបស់អ្នកដទៃដែរ។

៣. រៀនជំនាញក្រៅសាលា

ជំនាញក្រៅសាលា មានដូចជា ចម្អិនម្ហូប ជួសជុលសម្ភារក្នុងផ្ទះ គ្រឿងអគ្គិសនីជាដើម។ ពេលខ្លះ បញ្ហាតិចតូច មិនចាំបាច់រំខានហៅគេឲ្យជួយគ្រប់រឿង ព្រោះអ្នកដឹងថាត្រូវធ្វើបែបណា ថែមទាំងមិនប្រកាន់ថា វាជាការងាររបស់មនុស្សប្រុសនោះទេ។

៤. មានចំណេះវិជ្ជា

ចំណេះវិជ្ជាពិតជាសំខាន់ណាស់ ក្នុងការជួយអ្នកឲ្យឈានទៅដល់គោលដៅដែលខ្លួនប្រាថ្នា។ ជាពិសេស ក្លាយជាមនុស្សស្រីចេះដឹងម្នាក់ អ្នកនឹងត្រូវបានគេគោរពឲ្យតម្លៃ មិនហ៊ានមើលងាយ។ ភាពវ័យឆ្លាត ការតស៊ូ មិនធ្វើឲ្យអ្នកទាល់ច្រក មិនខ្លាចនូវឧបសគ្គគ្រប់បែបយ៉ាងក្នុងជីវិត។

៥. មើលថែរក្សាសុខភាព និងបន្តអភិវឌ្ឍន៍ទៅមុខ

មានសមត្ថភាព ប៉ុន្តែសុខភាពទ្រុឌទ្រោមក៏គ្មានន័យអ្វីដែរ។ ត្រូវញ៉ាំអាហារដែលមានប្រយោជន៍ចំពោះរាងកាយ ហាត់ប្រាណជាប្រចាំ ដើម្បីឲ្យសុខភាពរឹងមាំ កម្លាំងខ្លាំងខ្លា។ ពេលដែលរាងកាយពោរពេញដោយថាមពលហើយ ត្រូវព្យាយាមស្វែងរកអ្វីថ្មីៗ បង្កើនចំណេះដឹង និងអភិវឌ្ឍន៍ទៅមុខបន្តទៅមុខទៀត។