រៀនមើលចិត្តមនុស្សឲ្យធ្លុះ ដោយវិធី២យ៉ាង តាមរបៀបចាស់ទុំ

2018-09-25 10:51:08
ចំនួនមតិ 0 | ចំនួនចែករំលែក 0

ចង់បង្កើតមិត្តភាពឬសហការគ្នាជាមួយមនុស្សដទៃ ដំបូងត្រូវពិនិត្យមើល និងស្វែងយល់ពីអត្តចរិតរបស់ពូកគេជាមុនសិន។ តាមគំនិតយោបល់របស់ចាស់ទុំ បានចែករំលែកបទពិសោធន៍ មកដល់ក្មេងៗជំនាន់ក្រោយថា មុនរាប់អាននិងទុកចិត្តនរណាម្នាក់ ត្រូវតែសង្កេតមើលឲ្យបានច្បាស់លាស់ ព្រោះអ្នកមិនមែនរាប់អានគ្នាតែមួយថ្ងៃទេ បើរើសខុស អ្នកនឹងស្តាយក្រោយអស់មួយជីវិត។ នេះជាវិធី២យ៉ាងសំខាន់ៗ ដែលអ្នកគួររៀនសូត្រតាម។

រៀនស្តាប់

ដើម្បីសម្គាល់ពីចរិតមនុស្ស កុំជឿភ្លាមពេលឮចេញពីមាត់ម្ខាង ព្រោះបើគេជាមិត្តនឹងគ្នា គេនឹងនិយាយតែចំណុចល្អ ហើយបើជាសត្រូវ គេនឹងនិយាយអាក្រក់ពីម្នាក់នោះ។ ហេតុនេះហើយ បើចង់ស៊ើបសួរឲ្យបានច្បាស់ មានតែការទំនាក់ទំនងជាមួយសាមីខ្លួនផ្ទាល់ទេ ទើបគ្មានមន្ទិល។

តើគួរចាប់ផ្តើមដូចម្តេច?

ចូលទៅនិយាយសន្ទនាលេងជាមួយគ្នាធម្មតាៗ
រៀនស្តាប់ដោយប្រើតិចនិក សម្របខ្លួន មានន័យថាបើគេនិយាយអ្វី អ្នកត្រូវសា្តប់ដោយយកចិត្តទុកដាក់ ព្យាយាមយល់ស្របជាមួយគំនិតរបស់គេ មិនប្រឆាំង
ត្រូវសម្តែងថាអ្នកមានចំណង់ចំណូលចិត្តស្រដៀងគ្នា ធ្វើបែបនេះអាចបង្កើនភាពស្និទ្ធស្នាល និងឲ្យគេហ៊ាននិយាយអ្វីដែលមានក្នុងចិត្តប្រាប់ដល់អ្នក។
មិនត្រូវនិយាយពីរឿងអាថ៌កំបាំងរបស់អ្នក ប៉ុន្តែអាចនិយាយអ្វីទាក់ទងនឹង គ្រួសារ មិត្តភ័ក្តិ អ្នកជិតខាង ដើម្បីដឹងថាគេមានទំនាក់ទំនងបែបណាជាមួយមនុស្សជុំវិញខ្លួន។

ប្រើពេលវេលា

ជួបគ្នាគ្រាដំបូង មនុស្សអាចនឹងលាក់ចរិតពិត ប៉ុន្តែការប្រើពេលវេលា ស្គាល់គ្នាឲ្យបានយូរ អ្នកនឹងអាចដឹងចិត្តថ្លើមនិងមុខពិតរបស់គេ។ អ្វីដែលគួរប្រុងប្រយ័ត្នលើសពីនេះទៅទៀត មនុស្សខ្លះទោះបីរាប់អានគ្នាយូរ ដល់ទៅ២-៣ឆ្នាំក៏ដោយ នៅតែមានរឿងរ៉ាងស៊ីជម្រៅជាច្រើន ដែលលាក់បាំងមិនចង់ឲ្យអ្នកដឹង។ ហេតុផលទាំងអស់នេះហើយ បានជាអ្នកមិនត្រូវទុកចិត្តអ្នកដទៃទាំងស្រុងឬឆាប់វាយតម្លៃគេពេកទេ។ ទំនាក់ទំនងនៅតែមាន ប៉ុន្តែមិនត្រូវភ្លេចបន្តការសង្កេតចិត្តគ្នាដែរ៕

ចុចអានបន្ត៖