កុំបង្ហិនពេលស្រលាញ់បុរស ៦ប្រភេទនេះ ព្រោះចុងក្រោយអ្នកនឹងខាតគ្រប់យ៉ាង

2018-08-28 10:47:41
ចំនួនមតិ 0 | ចំនួនចែករំលែក 0

បើទោះបីភាពសង្ហាអាចទាក់ទាញឲ្យយើងចង់បើកចិត្តទទួលយកមនុស្សប្រុសណាម្នាក់មែន ប៉ុន្តែចុងក្រោយ ចំណុចសំខាន់ដែលធ្វើឲ្យទំនាក់ទំនងរស់បានយូរអង្វែង គឺអត្តចរិត និងនិស្ស័យកំណើតរបស់គេ។ បើពេលនេះអ្នកកំពុងទាក់ទងបុរសណាម្នាក់ ហើយចេះតែគ្មានជំនឿចិត្តថាគួរចំណាយពេលមើលចិត្តគ្នាទៀតឬក៏អត់ ថ្ងៃនេះកញ្ញាសូមចែករំលែកអំពីបុរសចំនួន ៦ប្រភេទដែលអ្នកគួរចៀសវាង ដើម្បីកុំឲ្យទឹកភ្នែកជូតក្បាលជង្គង់ ខាតបង់ទាំងពេលវេលា និងកម្លាំងកាយចិត្តទៅថ្ងៃក្រោយ៖

១. មនុស្សប្រុសឫកធំ ស្រលាញ់និងអំនួតខ្លួនឯងជ្រុល

មនុស្សប្រុសដែលចូលចិត្តអំនួតដែលខ្លួនសង្ហា ឡូយ ឬពូកែនេះ គឺចូលក្នុងចំណោមមនុស្សដែលចូលចិត្តទាមទារចំណាប់អារម្មណ៍អ្នកដទៃគ្រប់ពេល។ មនុស្សប្រភេទនេះច្រើនសម្លឹងរកមនុស្សដែលល្អឥតខ្ចោះម្នាក់ជាគូស្នេហ៍ ហើយនឹងមិនដែលបន្ទោសខ្លួនឯងឡើយនៅពេលខ្លួនធ្វើខុស រួមទាំងមិនអាចទ្រាំបានដែរបើខ្លួនត្រូវគេរិះគន់។ អ្វីដែលសំខាន់គឺគេធ្វើអ្វីគិតតែចិត្តខ្លួនឯងម្នាក់គត់ ដូច្នេះអ្នកគិតទៅមើលថាគួរប្រថុយចិត្តជាមួយគេឬក៏អត់?

២. មនុស្សប្រុសព្រានមានមួយមិនស្កប់ដប់មិនស្កល់

សម្រាប់មនុស្សប្រុសដែលមិនចេះស្កប់ បើទោះបីអ្នកជាសង្សារ ឬប្រពន្ធល្អយ៉ាងណា ក៏គេអាចក្បត់អ្នកបានជានិច្ច ដោយមិនខ្វល់ថាអ្នកមានអារម្មណ៍បែបណានោះទេ។ ដំបូងៗអ្នកអាចមានអារម្មណ៍ថាចង់បង្ក្រាបចរិតរបស់គេ និងលង់នឹងពាក្យសម្ដីលួងលោមរបស់គេ ក៏ប៉ុន្តែត្រូវប្រយ័ត្នព្រោះមនុស្សបែបនេះពូកែសម្ដីខ្លាំង ប៉ុន្តែទង្វើវិញគឺខុសគ្នា៣៦០ដឺក្រតែម្ដង។ ចង់មិនចង់អ្នកអាចនឹងត្រូវរងទុក្ខរហូតរកផ្លូវចេញលែងឃើញ ដូច្នេះបើដឹងចរិតគេច្បាស់ហើយគួរប្រញាប់ដកខ្លួនឲ្យបានលឿនប្រសើរជាង។

៣. គ្មានភាពចាស់ទុំ គ្មានជំនឿចិត្តលើខ្លួនឯង

វាអាចជារឿងធម្មតាដែលយើងមានអារម្មណ៍គ្មានជំនឿចិត្តលើរឿងមួយចំនួន ប៉ុន្តែបើអ្នកកំពុងមើលចិត្តគ្នាជាមួយមនុស្សដែលគ្មានជំនឿចិត្តលើខ្លួនឯងគ្រប់រឿង និងត្រូវសុំយោបល់ និងការយល់ព្រមពីអ្នករហូត វាក៏ចាត់ទុកថាជាសញ្ញាដែលមិនសូវល្អប៉ុន្មានដែរ។ មនុស្សប្រុសដែលមានភាពចាស់ទុំគ្រប់គ្រាន់នឹងអាចជាទ្រូងបង្អែកដ៏រឹងមាំសម្រាប់មនុស្សស្រីដែលខ្លួនស្រលាញ់។ ផ្ទុយទៅវិញបើគេមានចរិតកូនក្មេង គ្មានទំនួលខុសត្រូវ មិនចេះគិតគូរអនាគតខ្លួន និងគ្រួសារនោះ អ្នកដែលនឿយហត់បំផុតនឹងជាអ្នក។

៤. មនុស្សអាត្មានិយម

វាជាសញ្ញាមិនល្អទេបើអ្នកធ្លាក់ក្នុងអន្លង់ស្នេហ៍បុរសប្រភេទនេះ ព្រោះនៅពេលអ្នកត្រូវប្រឈមមុខនឹងបញ្ហា ភាគរយខ្ពស់គឺគេនឹងមិនចាប់អារម្មណ៍ ឬជួយដល់អ្នកនោះឡើយ បើសិនរឿងនោះមិនពាក់ព័ន្ធគេផ្ទាល់។

៥. មិនចាត់ទុកអ្នកសំខាន់

បើគេចូលចិត្តយកអ្នកទៅប្រៀបធៀបជាមួយអ្នកដទៃ ឬចាត់ទុកមិត្តភ័ក្ដិគេសំខាន់ជាងអ្នក អ្នកនឹងកើតអារម្មណ៍តូចចិត្ត ហើយទំនាក់ទំនងអ្នកនឹងរលាយមិនយូរមិនឆាប់ ព្រោះស្នេហាល្អមួយគួរមានទាំងការផ្ដល់ឲ្យ ការទទួលយក និងការចែករំលែក។ បើគេមិនព្រមលះបង់អ្វីសោះដើម្បីទំនាក់ទំនងជាមួយអ្នកទេ នោះក៏មានន័យថាគេមិនបានចាប់អារម្មណ៍ ឬចាត់ទុកអ្នកជាមនុស្សសំខាន់ដែរ។

៦. ពូកែរិះគន់ យកគំនិតខ្លួនឯងជាធំ

ចំពោះមនុស្សដែលចូលចិត្តវិភាគ រិះគន់គ្រប់រឿងសូម្បីតែរឿងតូចៗប៉ុនក្រចកដៃ និងតែងយកគំនិតខ្លួនឯងជាធំ បើចៃដន្យមានរឿងឈ្លោះគ្នាគេនឹងមិនទទួលយកគំនិត និងហេតុផលអ្នកឡើយ ព្រោះគេគិតថាខ្លួនឯងចេះដឹងច្រើនជាង និងយកគំនិតគេជាធំ។ អ្នកអាចនឹងត្រូវគិតសាឡើងវិញថា តើអាចទ្រាំរស់នៅជាមួយមនុស្សបែបនោះមួយជីវិតបានឬទេ ?

ចុចអាន៖

ប្រភព៖ Mthai ប្រែសម្រួល៖ ស្វាយ វ៉ាន់ថន