ដើរផ្លូវខុសត្រូវបកក្រោយ ស្រលាញ់ខុសមនុស្ស ត្រូវចេះដោះដៃ

2018-07-22 04:20:30
ចំនួនមតិ 0 | ចំនួនចែករំលែក 0

បែកគ្នាច្រើនដងមិនគួរឲ្យខ្លាចទេ អ្វីដែលគួរឲ្យខ្លាចនោះគឺ ទោះដឹងថាស្រលាញ់មនុស្សខុសហើយ តែនៅតែគ្មានវិធីដើម្បីបោះបង់ទៀត។ ស្រលាញ់ខុសមនុស្សគឺនៅពេលដែលអ្នកដឹងថាខ្លួនឯងស្ថិតក្នុងមនោសញ្ចេតនាមួយដែលឯកា និងរសាត់អណ្ដែតជាងពេលនៅម្នាក់ឯងទៅទៀត។ ដូចគេនិយាយមិនខុសមែន សុខចិត្តស្រលាញ់យឺតក៏ប្រសើរជាងស្រលាញ់ខុស។ តែពេលខ្លះយើងមិនអាចយកឈ្នះភាពឯកាបាន នៅតែចង់ឈោងចាប់ដៃ ដែលមិនមែនជាកម្មសិទ្ធិរបស់ខ្លួន នៅតែចង់អោបរង្វង់ដៃដែលជាកម្មសិទ្ធិរបស់អ្នកផ្សេង។

មនុស្សមួយចំនួនក៏ចង់ដោះដៃដែរ តែក្រឡេកមើលផ្លូវដែលពួកគេធ្លាប់ដើររួមគ្នាហើយ ក៏មិនដាច់ចិត្តទៅវិញ។ ដោយសារតែស្ដាយ ស្ដាយនូវយុវភាពដែលបានឆ្លងកាត់ នូវអនុស្សាវរីយ៍ដែលធ្លាប់សាងរួមគ្នា។ អ៊ីចឹងក៏បិទភ្នែកស្រលាញ់បន្តទៀត ដើម្បីឲ្យបេះដូងខ្ទេចថែមបន្តិចទៀត ពីមួយថ្ងៃទៅមួយថ្ងៃ។ បែកគ្នាការពិតទៅមិនមែនជារឿងមិនអាចធ្វើបាន អ្វីដែលសំខាន់នោះគឺតើអ្នកហ៊ានទទួលកំហុសរបស់ខ្លួន ឬដល់ពេលនោះនៅតែប្រកែកថាខ្លួនត្រូវ។ គ្មានអ្នកណាចង់ឲ្យខ្លួនឯកានោះឡើយ អ្វីដែលយើងចង់បានគឺរក្សាសុភមង្គលសម្រាប់ខ្លួនឯង។ តែដល់ពេលណាមួយ បើក្រោកពីដំណេកមិនឃើញស្នាមញញឹមទេ ជំនួសដោយភ្នែកហើមទាំងសងខាងដោយសារយំ មិនមែនភាពរីករាយ តែជាទុក្ខសោកនោះ យើងត្រូវចេះដោះដៃចេញ។ ស្នេហាគឺស្វែងរកសុភមង្គល មិនមែនរករណ្ដៅជីកខ្លួនឯង។ បើអ្នកមិនដោះដៃនៅថ្ងៃនេះ តើអ្នកប្រុងរៀបការ ហើយក្រសោបទុក្ខមួយជីវិតឬយ៉ាងម៉េច? បើនៅទ្រាំទ្រជាមួយស្នេហាដែលស័ក្ដិសមនឹងយើង សុខចិត្តផ្ដល់សេរីឲ្យខ្លួនទៅល្អជាង ព្រោះភាពឯកាណាក៏អាចឆ្លងផុត អ្នកណាក៏នឹងអាចរកសុភមង្គលឲ្យខ្លួនឯងបាន៕