ធ្វើបានចាត់ទុកថាអស្ចារ្យ! ៩មេរៀនជីវិតដែលគ្រប់គ្នាងាយយល់ប៉ុន្តែមិនងាយធ្វើបាន

2018-07-19 08:47:04
ចំនួនមតិ 0 | ចំនួនចែករំលែក 0

ពីមួយថ្ងៃទៅមួយថ្ងៃឃ្លាអប់រំ លើកទឹកចិត្ត ក៏ដូចជាវិធីសាស្ត្រជោគជ័យរាប់រយរាប់ពាន់ឃ្លាបានលេចអណ្ដែតលើបណ្ដាញសង្គមរបស់យើង ហើយឃ្លាខ្លះ ឬអត្ថបទខ្លះ យើងក៏បានអាននិងទន្ទេញរត់មាត់។ ប៉ុន្តែប្រាកដទេថា យើងអាចជោគជ័យបាន? ជាការពិត បើយើងមានតែទ្រឹស្ដីប៉ុន្តែគ្មានការអនុវត្ត នោះវាចាត់ទុកថាមិនបានការដដែល។ ខាងក្រោមនេះ កញ្ញាសូមបង្ហាញពីឃ្លាអប់រំមួយចំនួន មានមនុស្សជាច្រើនយល់បាន ប៉ុន្តែតិចតួចប៉ុណ្ណោះដែលធ្វើបាន។

១. គ្រប់បរាជ័យ គឺមេរៀនដើម្បីឲ្យយើងឈានទៅខាងមុខ។ ដឹងថាបរាជ័យគឺជាមេរៀន ប៉ុន្តែមនុស្សជាច្រើន នៅតែមិនព្រមរៀនពីបរាជ័យហើយបណ្ដោយឲ្យកំហុសដដែលៗកើតឡើង។

២. មនុស្សស្លាប់មិនអាចយកលុយទៅជាមួយបាន ប៉ុន្តែលុយអាចយកសេចក្ដីស្លាប់មកឲ្យមនុស្សបាន។ ដឹងថាលុយមិនអាចទិញគ្រប់យ៉ាង ប៉ុន្តែមនុស្សជាច្រើននៅតែលះបង់អ្វីគ្រប់យ៉ាងដើម្បីលុយ។

៣. មនុស្សមានបុណ្យស្ដាប់មិនឮពាក្យនិន្ទា មនុស្សដែលស្ដាប់ឮតែពាក្យនិន្ទាគឺជាមនុស្សគ្មានបុណ្យ។ ដឹងថាមិនត្រូវខ្វល់ពីសម្ដីមិនល្អរបស់អ្នកដទៃ ប៉ុន្តែមនុស្សជាច្រើននៅតែយកមកគិតឲ្យពិបាកចិត្ត។

៤. មនុស្សមានចិត្តរកវិធីដោះស្រាយ មនុស្សអត់ចិត្តរកលេសដោះសា។

៥. ពាក្យថា “ខ្ជិល” តែមួយម៉ាត់គឺគ្រប់គ្រាន់នឹងបំផ្លាញជីវិតរបស់មនុស្សគ្រប់គ្នាបាន មិនថាអ្នកមានក្ដីស្រមៃយ៉ាងណា ឬមានតំណែងយ៉ាងណាក៏ដោយ។ លះបង់ភាពខ្ជិលបាន ជីវិតអ្នកនឹងលែងលំបាក។

៦. ផ្លូវត្រង់មើលទៅដូចជាសុវត្ថិភាព ប៉ុន្តែការពិតបែរជាគ្រោះថ្នាក់ ផ្លូវកាច់កោងមើលទៅដូចជាគ្រោះថ្នាក់ប៉ុន្តែក៏ហាក់ដូចជាសុវត្ថិភាព។ ប្រៀបដូចផ្លូវជីវិតដែលរលូន ច្រើននាំតែបរាជ័យដល់អ្នកដើរជានិច្ច ព្រោះពួកគេរវល់តែវក់នឹងក្ដីសុខរហូតភ្លេចគិតកសាងភាពរឹងមាំសម្រាប់ខ្លួនឯង។

៧. ធ្វើម៉េចទើបដឹងថាមនុស្សដែលអ្នកកំពុងស្រលាញ់នឹងអាចយកគ្នាជាអនាគតបាន? ចម្លើយនោះគឺ បើស្រលាញ់កាន់តែយូរកាន់តែហត់ គឺបញ្ឈប់ទៅ។

៨. បើសត្រូវធ្វើឲ្យអ្នកខឹងបាន នោះមានន័យថាអ្នកចាញ់ប្រៀបរបស់គេ បើមិត្តធ្វើឲ្យអ្នកខឹងបាន នោះមានន័យថាអ្នកនៅខ្វល់ខ្វាយពីមិត្តភាពដែលកំពុងមាន។

៩. មនុស្សដែលមានក្ដីសុខ អាចមិនមែនមនុស្សដែលមានអ្វីគ្រប់យ៉ាង ប៉ុន្តែគេមានក្ដីសុខជាមួយអ្វីដែលគេមាន ៕

ចុចអាន៖

ប្រភព៖ rugyim ប្រែសម្រួល៖ ស្វាយ វ៉ាន់ថន