អាហារ៦យ៉ាងនេះមិនល្អសម្រាប់កូនតូចដូចអ្វីដែលឪពុកម្តាយគិតទេ

2018-08-06 01:47:05
ចំនួនមតិ 0 | ចំនួនចែករំលែក 0

ឪពុកម្តាយភាគច្រើនចាប់ផ្តើមឱ្យកូនញ៉ាំអាហារដែលមានជាតិស្ករច្រើនតាំងពីនៅតូច។ មានអាហារខ្លះឪពុកម្តាយគិតថាល្អបំផុតសម្រាប់កូនតូចហើយព្យាយាមឱ្យកូនញ៉ាំរាល់ថ្ងៃ។ តែផ្ទុយទៅវិញ អាហារទាំង៦យ៉ាងនេះធ្វើឱ្យប៉ះពាល់ដល់កូនតូចៗដោយមិនដឹងខ្លួន៖

១. ទឹកផ្លែឈើ

ឪពុកម្តាយភាគច្រើនឱ្យកូនញ៉ាំទឹកផ្លែឈើដូចជាទឹកក្រូចជាដើមដោយគិតថាវាសម្បូរទៅដោយវីតាមីនគ្រប់មុខ។ ប៉ុន្តែអ្នកត្រូវគិតថាទឹកផ្លែឈើដែលកូនអ្នកញ៉ាំនោះមិនមែនមានតែផ្លែឈើសុទ្ធទេ វាក៏មានជាតិស្ករនៅក្នុងនោះដែរ។ ជាតិស្ករទាំងនោះជ្រាបចូលទៅក្នុងឈាម ហើយវាក៏អាក្រក់ចំពោះមេតាប៉ូលីសនៃកាបូនអ៊ីដ្រាត។ យោងទៅតាម The American Academy of Pediatrics បានណែនាំថាគួរតែឱ្យកូនញ៉ាំផ្លែឈើស្រស់ជាជាងញ៉ាំទឹកផ្លែឈើដប។

២. យ៉ាអ៊ួរ

ដើម្បីជ្រើសរើសយ៉ាអ៊ួរដែលល្អ អ្នកត្រូវមើលការណែនាំឱ្យបានច្បាស់មុននឹងឱ្យកូនញ៉ាំ។ អ្នកមិនត្រូវទិញយៅអ៊ួរណាដែលមិនបានក្លាស្សេឱ្យបានត្រឹមត្រូវទេ។ ហើយអ្នកគួរតែឱ្យកូនញ៉ាំយ៉ាអ៊ួរធម្មជាតិប្រសើរជាងញ៉ាំទឹកដោះគោកំប៉ុង។ ចំពោះយ៉ាអ៊ួរដែលមានរសជាតិផ្លែឈើ អ្នកមិនគួរឱ្យកូនញ៉ាំទេព្រោះវាសម្បូរទៅដោយជាតិស្ករ កាល់ឡូរីដែលអាចធ្វើឱ្យធាត់និងងាយកើតជំងឺទឹកនោមផ្អែម។ គួរតែឱ្យញ៉ាំរសជាតិដើមទើបល្អ។

៣. Cereals

Cerealsគឺជាអាហារមួយប្រភេទដែលងាយស្រួលញ៉ាំដោយគ្រាន់តែលាយជាមួយនឹងទឹកដោះគោ ហើយឪពុកម្តាយភាគច្រើនឧស្សាហ៍ឱ្យកូនញ៉ាំព្រោះវាងាយស្រួល ហើយសម្បូរជីវជាតិបំប៉ន។ ប៉ុន្តែតាមពិត សារធាតុបំប៉នទាំងនោះត្រូវបានកាត់បន្ថយតាមរយៈការផលិតពីរោងចក្រមានតែកាបូនអ៊ីដ្រាតទេដែលនៅសល់។ ហេតុនេះហើយ នៅពេលដែលកូនអ្នកញ៉ាំហើយនឹងឆាប់ឃ្លានវិញ។ អ្នកគួរតែបន្ថែមគ្រាប់ធញ្ញជាតិ ឬផ្លែឈើស្រស់។

៤. ទឹកឃ្មុំ

កូនក្មេងក្រោមអាយុ២ឆ្នាំមិនគួរញ៉ាំទឹកឃ្មុំនោះទេ ព្រោះថាកូនអ្នកអាចនឹងរងប្រតិកម្ម។ ជាពិសេសវាអាចមានបាក់តេរីដែលធ្វើឱ្យកូនអ្នកឆ្លងជំងឺដែលហៅថា Botulism Poisoning។

៥. ទំពាំងបាយជូរ

ទំពាំងបាយជូរមានផ្ទុកវីតាមីននិងសារធាតុរ៉ែដែលក្មេងត្រូវការ។ ប៉ុន្តែវាក៏មានហេតុផលដែលមិនគួរឱ្យកូនអ្នកញ៉ាំដែរគឺក្មេងអាចងាយនឹងឈ្លក់ហើយលេបគ្រាប់។ ហេតុនេះហើយជំនួសដោយការញ៉ាំទំពាំងបាយជូរ អ្នកគួរតែឱ្យកូនញ៉ាំចេកវិញប្រសើរជាង។

៦. វីតាមីនគ្រាប់

វីតាមីនមានច្រើនប្រភេទច្រើនយ៉ាង។ ហើយអ្វីដែលជាបញ្ហានោះគឺឪពុកម្តាយឱ្យកូនញ៉ាំវីតាមីនជំនួយដោយផ្អែកលើចំណេះដឹងដែលគាត់មាននិងបទពិសោធន៍ដោយមិនពិគ្រោះជាមួយអ្នកជំនាញនិងគិតពីផលអវិជ្ជមាន។ អ្នកគួរឱ្យកូនញ៉ាំវីតាមីនតែនៅពេលដែលមានវេជ្ជបញ្ជាពីពេទ្យ មិនមែនញ៉ាំស្ទើរតែរាល់ថ្ងៃនោះទេ។ យកល្អគួរតែកូនតូចញ៉ាំផ្លែឈើស្រស់ដែលសម្បូរវីតាមីនវិញ៕