៩យ៉ាងទារកខ្លាច! ចង់ឲ្យកូនកើតមកពេញលក្ខណៈ អ្នកម្ដាយគ្រប់រូបត្រូវចៀសវាង

2018-03-22 07:58:29
ចំនួនមតិ 0 | ចំនួនចែករំលែក 0

រយៈពេល ៩ខែ ទារកនៅក្នុងផ្ទៃរបស់ម្ដាយមានការវិវត្តឡើងរៀងរាល់ថ្ងៃ។ ប៉ុន្តែខណៈដែលពួកគេមានការចម្រើនលូតលាស់ មានរឿង ៩យ៉ាងដែលពួកគេខ្លាច ឬផ្ដល់ផលប៉ះពាល់ដល់ការលូតលាស់របស់គេ ហើយអ្វីដែលពួកគេខ្លាចនោះ អាចជាទម្លាប់ក្នុងជីវិតរស់នៅរបស់ម្ដាយ។ ដូច្នេះថ្ងៃនេះ យើងមកស្វែងយល់ទាំងអស់គ្នាថាតើក្នុងខែនីមួយៗទារកខ្លាចអ្វីខ្លះ?

ខែទី១៖ ខ្លាច “សីតុណ្ហភាពខ្ពស់”

សម្រាប់អ្នកម្ដាយដែលទើបមានផ្ទៃពោះ ស៊ុតដែលទើបចាប់កំណើតគឺខ្លាចសីតុណ្ហភាពខ្ពស់ (ក្ដៅ) បំផុត ដូច្នេះអ្នកម្ដាយសូមចៀសវាងសីតុណ្ហភាពក្ដៅៗ ហើយអ្វីដែលរឹតតែមិនគួរនោះគឺទៅសូណា ឬងូតទឹកក្ដៅ។ ប្រុងប្រយ័ត្នកុំឲ្យក្ដៅខ្លួនខ្លាំង ដើម្បីការពារកុំឲ្យមានគ្រោះថ្នាក់ដល់ប្រព័ន្ធប្រសាទទារក។

ខែទីពីរ៖ ខ្លាច “ថ្នាំ”

នៅពេលទារកអាយុ ២ខែ គឺនឹងចាប់ផ្ដើមលេចជារូបរាងកាយ អ្នកម្ដាយក៏នឹងចាប់ផ្ដើមមានអាការចាញ់កូនតាមបែបផ្សេងៗដូចជា ចង់ញ៉ាំរបស់ជូរ រាងកាយមិនមានកម្លាំងកំហែង ប៉ុន្តែកំឡុងពេលនេះ អ្នកម្ដាយមិនគួរញ៉ាំថ្នាំដោយគ្មានវេជ្ជបញ្ជាដាច់ខាត ដើម្បីការពារកុំឲ្យទារកមានសភាពរាងកាយទន់ខ្សោយ ឬមិនពេញលក្ខណៈ។

ខែទីបី៖ ខ្លាច “បារី និងស្រា”

កំឡុងពេលនេះ បេះដូងរបស់ទារកចាប់ផ្ដើមលោត ហើយថែមទាំងមានការលូតលាស់លឿនខ្លាំង។ អ្នកម្ដាយភាគច្រើនអាចនឹងមានអាការចាញ់ ដោយក្អួតចង្អោរពេលព្រឹក ប៉ុន្តែមិនចាំបាច់ព្រួយបារម្ភទេ គឺគ្រាន់តែជៀសវាងជក់បារី ផឹកស្រា អាហារមានជាតិខ្លាញ់ និងជាតិស្ករច្រើន គឺគ្រប់គ្រាន់ហើយ។

ខែទី៤៖ ខ្លាច “សំឡេងឮៗ”

កំឡុងពេលនេះ អ្នកត្រូវបរិយាកាសជុំវិញដែលល្អឲ្យទារក ហើយចៀសវាងសំឡេងរំខានឮៗខ្លាំងពេក ទើបកូនមានការចម្រើនលូតលាស់ល្អ។

ខែទី៥៖ ខ្លាច “សារធាតុចិញ្ចឹមមិនគ្រប់គ្រាន់”

នៅពេលទារករីកលូតលាស់បាន ៥ខែហើយ គឺនឹងចាប់ផ្ដើមមានរោម/សក់។ កំឡុងពេលនេះ អ្នកម្ដាយត្រូវបរិភោគអាហារប្រចាំថ្ងៃឲ្យបានច្រើនជាងមុន ប្រមាណ ៣០០កាឡូរី។

ខែទី៦៖ ខ្លាច “សំឡេងរំខាន”

ក្នុងខែនេះ ទារកនឹងចាប់ផ្ដើមលូតលាស់អវយវៈផ្នែកខាងក្នុង ហើយនឹងចាប់ផ្ដើមមានប្រតិកម្មតបតជាមួយនឹងសំឡេងខាងក្រៅ ជាពិសេសសំឡេងរំខាន ដូច្នេះអ្នកគួរចៀសវាងទីកន្លែងដែលមានសំឡេងរំខានច្រើន។

ខែទី៧៖ ខ្លាច “សំពាធផ្នែកអារម្មណ៍”

ទារកក្នុងខែនេះនឹងអាចបើកភ្នែកបានក្នុងរយៈពេលមួយភ្លែតៗ និងអាចកម្រើកដៃកម្រើកជើងបាន។ នេះជាពេលវេលាដែលទារកនឹងអាចទទួលផលប៉ះពាល់ពីអារម្មណ៍របស់ម្ដាយ បានងាយ ដូច្នេះបើអ្នកម្ដាយស្ត្រេសខ្លាំងពេក គឺនឹងមានផលមិនល្អដល់ការរីកលូតលាស់របស់ទារក។

ខែទី៨៖ ខ្លាច “ម្ដាយហត់នឿយ”

ចូលដល់ខែនេះ អវយវៈផ្សេងៗក្នុងរាងកាយរបស់ទារកគឺលូតលាស់ពេញលេញហើយ។ ក្នុងកំឡុងពេលនេះ បើអ្នកម្ដាយហត់នឿយខ្លាំងពេក នោះនឹងអាចផ្ដល់ផលប៉ះពាល់ដល់ទារក ដូច្នេះហើយគួរចៀសវាងធ្វើការងារដែលត្រូវប្រើកម្លាំងបាយ កាត់បន្ថយការងារផ្ទះ និងការហាត់ប្រាណដែលត្រូវប្រើកម្លាំងច្រើន។

ខែទី៩៖ ខ្លាច “ម្ដាយមានទុក្ខកង្វល់"

ពេលឃើញថាកូនជិតកើតហើយ អ្នកម្ដាយជាច្រើននឹងចាប់ផ្ដើមខ្វាយខ្វល់ចិត្ត ខ្លាចថានឹងមិនអាចបង្កើតកូនចេញមកបានដោយសុវត្ថិភាព។ បើអ្នកមានអារម្មណ៍បែបនេះច្រើន គួរតែទៅប្រឹក្សាជាមួយគ្រូពេទ្យដើម្បីឲ្យបានធូរស្រាលចិត្តវិញ ៕

ចុចអាន៖

ប្រភព៖ tnews ប្រែសម្រួល៖ ស្វាយ វ៉ាន់ថន