រឿង៦យ៉ាង គួរដឹងឱ្យហើយទាន់ខ្លួននៅក្មេង ទើបមិនហួសពេល

2018-06-30 03:56:46
ចំនួនមតិ 0 | ចំនួនចែករំលែក 0

ជីវិតអាចផ្លាស់ប្ដូរពីល្អទៅអាក្រក់ ពីអាក្រក់ទៅល្អ ចៀសមិនផុត។ វាជារឿងធម្មតា អ្នកអាចបាត់បង់ការងារ បាត់បង់ផ្ទះ ឬអ្នករាប់អាន ប៉ុន្តែមិនត្រូវបាត់បង់តម្លៃសម្រាប់ខ្លួនឯងឡើយ។ មានរឿងជាច្រើនដែលអ្នកគ្រប់គ្នាគួរយល់ដឹងឱ្យហើយ ទាន់ខ្លួននៅក្មេង មានពេលវេលាច្រើន ដើម្បីកុំឱ្យហួសពេលនៅពេលអាយុកាន់តែច្រើន។

១. លុយមិនអាចដោះស្រាយបញ្ហាបានគ្រប់យ៉ាងនោះទេ៖

លុយគឺឧបករណ៍ដោះដូរមួយដែលអាចឱ្យអ្នកទិញអ្វីដែលត្រូវបានគ្រប់ពេល ប៉ុន្តែមិនមែនបានន័យថា វាអាចដោះស្រាយបានគ្រប់យ៉ាងនោះទេ។ អ្នកមិនអាចប្រើលុយទិញទំនាក់ទំនងដែលប្រេះស្រាំទៅហើយបាននោះទេ។ លុយក៏មិនបានទៅជួយព្យាបាលរបួសក្នុងចិត្តបានដែរ មិនអាចទិញពេលវេលា សុភមង្គល និងការស្រលាញ់ពិតប្រាកដបានឡើយ។ ដូច្នេះកុំពឹងផ្អែកតែលើវាមួយមុខពេក ហើយកុំឱ្យលុយនោះក្លាយជាអាវុធដើម្បីសម្លាប់អ្នកមិនឱ្យមើលអ្វីផ្សេងបានឱ្យសោះ។

២. ចំណេះដឹងគ្មានដែនកំណត់ឡើយ ហើយវាមានន័យលើសពីសញ្ញាប័ត្រដែលអ្នកមាន៖

មនុស្សភាគច្រើនគិតថា ការកាន់សញ្ញាប័ត្រមួយសន្លឹកដែលបញ្ជាក់ពីការរៀននៅសាលាដ៏ល្បីនៅលើពិភពលោកគឺជាអ្វីដែលអ្នកណាក៏ចង់បាន អ្នកណាក៏សរសើរ ហើយវាជាចុងបញ្ចប់នៃពាក្យថា "រៀន"។ ប៉ុន្តែការពិត ចំណេះដឹងមិនមានដែនកំណត់ច្បាស់លាស់ឡើយ។ ការរៀននៅសាលាអាចបញ្ចប់បាន តែការរៀនក្នុងជីវិតពិតនឹងនៅបន្តរហូត ដរាបណាអ្នកនៅមានជីវិត។

៣. រូបភាពអ្នកនៅក្នុងភ្នែកអ្នកដទៃបែបណា មិនចាំបាច់ត្រូវខ្វល់នោះទេ៖

ជាង២០ឆ្នាំមកហើយ ដែលអ្នកអាចរស់បាន អាចគិតគូរពីដំណើរជីវិតបាន ដូច្នេះមិនបាច់ដេកព្រួយថា អ្នកណាមកគិតអ្នកក្នុងរូបភាពបែបណា ឬឱ្យគេមកកំណត់គោលដៅជីវិតឱ្យនោះឡើយ។

៤. សុខភាពជាទ្រព្យសម្បត្តិដែលមិនអាចកាត់ថ្លៃបាន៖

ការមានលុយ គឺជាក្ដីសុខមួយដែលគ្រប់គ្នាចង់បាន។ ប៉ុន្តែសុខភាពទៅវិញទេ ដែលគ្រប់គ្នាត្រូវការពិតប្រាកដ។ កាលណាមានសុខភាព អ្នកអាចមានកម្លាំងធ្វើអ្វីគ្រប់យ៉ាង រួមទាំងការរកលុយ ព្រោះជំងឺខ្លះអាចបានត្រឹមតែប្រើលុយព្យាបាលឱ្យធូរស្បើយ តែមិនអាចជាសះស្បើយទេ។

៥. អ្នកមិនអាចផ្គាប់ចិត្តមនុស្សគ្រប់គ្នាបានឡើយ៖

តារាកំប្លែងអាមេរិក Bill Cosby ធ្លាប់សរសេរថា "ខ្ញុំមិនដឹងពីវិធីធ្វើយ៉ាងណាឱ្យជោគជ័យនោះទេ តែខ្ញុំដឹងថា បរាជ័យដ៏ធំមួយរបស់មនុស្សគឺការព្យាយាមផ្គាប់ចិត្តអ្នកដទៃ"។ មែនហើយ ជីវិតយើងម្នាក់ៗមិនចាំបាច់ទាល់តែឱ្យគេមកចូលចិត្ត ឬស្រលាញ់យើងគ្រប់គ្នានោះទេ។ មនុស្សមានការគិតរៀងៗខ្លួន ដូច្នេះគ្រាន់តែច្បាស់ខ្លួនឯងថា យើងចង់ធ្វើអ្វី ចង់ដើរផ្លូវណា ហើយវាមិនប៉ះពាល់ផលប្រយោជន៍អ្នកដទៃទៅបានហើយ។ ចង់អ្នកណាចូលចិត្ត ឬមិនចូលចិត្តក៏ជារឿងរបស់គេទៅ។

៦. អ្នកផ្សេងមិនអាចមានអ្វីដែលយើងមានឡើយ៖

អ្នកណាក៏មានចំណុចពិសេសរៀងៗខ្លួន។ គេមានរបស់ដែលយើងគ្មាន ឯយើងក៏មានរបស់ដែលគេមិនអាចមានដូចគ្នា។ ដូច្នេះកុំចាំបាច់យកខ្លួនទៅប្រៀបធៀប ហើយកើតទុក្ខនឹងរឿងគេធ្វើអី សំខាន់ធ្វើឱ្យខ្លួនយើងពេញចិត្តអ្វីដែលកំពុងមានពេលនេះសិនទៅបានហើយ៕

ចុចអាន៖

អត្ថបទ៖ សរ សុគន្ធី