បុរសពិតមិនសំដៅលើសាច់ដុំ ភាពរឹងមាំទាំងនេះ ទើបជាអ្វីដែលមនុស្សស្រីប្រាថ្នា

2018-06-27 07:00:00
ចំនួនមតិ 0 | ចំនួនចែករំលែក 0

បុរសរឹងមាំ បុរសពិត ដែលស្រីៗតែងមានចម្ងល់នោះ តើសំដៅលើអ្វី? ភាគច្រើនដែលបានឭ គឺគេសំដៅលើបុរសណាដែលមានរូបរាងកាយមាំ មាឌធំ មានសាច់ដុំកង់ៗអីជាដើម។ ប៉ុន្តែនៅក្នុងទំនាក់ទំនងស្នេហាបុរសពិតមិនសំដៅលើសាច់ដុំជាសំខាន់អីនោះទេ តែចង់មានន័យថាគាត់អាចធ្វើរឿង ១០ យ៉ាងដូចខាងក្រោមចំពោះមនុស្សខ្លួនស្រលាញ់ នោះទើបជាសេចក្តីប្រាថ្នារបស់នារីគ្រប់រូបយ៉ាងពិតប្រាកដ។

១. បុរសពិតចេះស្រលាញ់ ហើយក៏ចេះគោរពឲ្យតម្លៃមិនថាក្នុងកាលៈទេសៈបែបណា

គាត់មិនមែនស្រលាញ់តែរូបរាង ស្រលាញ់តែពេលតុបតែងខ្លួន ឬសម្លឹងឃើញចង់បានអ្វីមួយពីនាងនោះទេ។ ផ្ទុយទៅវិញ គាត់ស្រលាញ់នូវអត្តចរិតដ៏ល្អថ្លៃថ្នូរ ព្រមទាំងមានការគោរពឲ្យតម្លៃនូវអ្វីដែលជាខ្លួននាង។

២. បុរសពិត គឺមានតែនាងម្នាក់ក្នុងបេះដូង

គាត់មិនភូតភរកុហក ប៉ុន្តែស្មោះស្ម័គ្រនឹងស្នេហា ហើយក៏ចង់ឲ្យនាងស្មោះត្រង់នឹងគាត់វិញដូចគ្នា។ គាត់ដឹងថាស្នេហាមិនមែនងាយ ដូចពាក្យប្រុសព្រានបានតែនិយាយផ្អែម យករួចតែខ្លួននោះទេ។ វាតែងលាយលំជាមួយ ភាពលំបាក ការពុះពារគ្រប់បែបយ៉ាង ដើម្បីថែរក្សាស្នេហាមួយឲ្យរឹងមាំឋិតថេរ។ គាត់ក៏ជាមនុស្សម្នាក់ ដែលមិនធ្វើឲ្យនាងសង្ស័យច្រើន និងអាចទុកចិត្តខ្លាំងបំផុត។

៣. បុរសពិត អាចការពារនាងបាន ទាំងរូបរាងកាយ និងអារម្មណ៍ផ្លូវចិត្ត

គាត់ការពារមិនឲ្យអ្នកណាមកបៀតបៀន និងអាចធ្វើឲ្យនាងមានសុវត្ថិភាពពេញលេញពេលនៅជិតគាត់។ មិនមែនការពារត្រឹមតែរូបរាងកាយ ប៉ុន្តែចេះលួងលោមពេលនាងពិបាកចិត្ត និងជាទីបង្អែកដែលនាងអាចពឹងពាក់បាន។

៤. បុរសពិត ធ្វើឲ្យនាងលង់ស្នេហ៍កាន់តែខ្លាំងឡើងៗ ទោះនៅជាមួយគ្នាយូរប៉ុនណាក៏ដោយ

គាត់ចេះថ្នាក់ថ្នម មានមន្តស្នេហ៍ មានភាពរ៉ូមែនទិក ហើយពេលនៅក្បែរគាត់ តែងនិយាយកំប្លែង និយាយពីនេះពីនោះឲ្យសើច និងអាចផ្តល់ស្នាមញញឹមដ៏ពិតប្រាកដសម្រាប់នាង។

៥. បុរសពិត មានភាពដឹកនាំខ្ពស់នៅក្នុងខ្លួន

គាត់អាចដឹកនាំទាំងខ្លួនឯង គ្រួសារ និងស្នេហា។ ពេលមានបញ្ហានៅក្នុងទំនាក់ទំនងស្នេហា គាត់មិនដេកចាំ ឲ្យនាងមកនិយាយរកមុនទេ ប៉ុន្តែគាត់ព្យាយាមរកដំណោះស្រាយណាមួយខ្លួនឯង បើនៅតែមិនអាចដោះស្រាយបាន គាត់ក៏មិនខ្លាចក្នុងការពឹងអ្នកណា ដែលទុកចិត្តបំផុត ដើម្បីសុំជាយោបល់ល្អៗនោះដែរ។

៦. បុរសពិត មានជំហរក្នុងការសម្រេចចិត្ត

គាត់ដឹងថាធ្វើជាមនុស្សប្រុសត្រូវហ៊ានសម្រេចចិត្ត មិនស្ទាក់ស្ទើរ មិនឲ្យនាងសម្រេចតែម្នាក់ឯង។ ការសម្រេចចិត្តរបស់គាត់ គឺផ្អែកលើតម្រូវការទាំងសងខាង មិនអាត្មានិយម សមហេតុផល និងអាចកែអ្វីៗឲ្យល្អប្រសើរឡើងវិញ។

៧. បុរសពិត មានទំនួលខុសត្រូវខ្ពស់

ពេលធ្វើខុស គាត់ហ៊ានទទួលស្គាល់កំហុស ដោយមិនព្យាយាមបន្ទោសនេះបន្ទោសនោះ។ គាត់មិនដែលគិតថា ខ្លួនឯងអន់នោះទេ គ្រាន់តែនិយាយសុំទោសមួយម៉ាត់ ព្រោះនេះបញ្ជាក់ថាគាត់មានទំនុកចិត្ត ហ៊ានទទួលការពិត និងកែប្រែកំហុស។

៨. បុរសពិត តែងនិយាយរឿងក្នុងចិត្ត ប្រាប់ដល់នាង

គាត់មិនលាក់ទុកក្នុងចិត្តតែឯង ពេលគាត់មិនយល់ស្របជាមួយគំនិតនាង គាត់តែងនិយាយចេញមកតាមសម្រួល ដោយមិនគំហកដាក់នាង។

៩. បុរសពិត តែងរកវិធីការពារស្នេហា

មិនថានៅចំពោះមុខ គ្រួសារ មិត្តភ័ក្តិ ឬអ្នកដទៃឡើយ ប្រសិនបើមាននរណាសួរសំណួរមិនសមរម្យ ឬមើលងាយទំនាក់ទំនងស្នេហា គាត់មិនអាចនៅស្ងៀមបណ្តោយឲ្យគេនិយាយតាមតែចិត្តនោះទេ។ គាត់ព្យាយាមតវ៉ា រក្សាការពារកិត្តិយសដល់ស្នេហារបស់គាត់។

១០. បុរសពិត មិនមែនស្រលាញ់អ្នកតែមួយថ្ងៃ ប៉ុន្តែជារៀងរហូត

គាត់អាចបន្តជីវិតគូរស់នៅជាមួយអ្នក បង្កើតកូនបង្កើតចៅ មានគ្រួសារមួយដ៏មានសុភមង្គលពេញមួយជីវិត៕