សញ្ញាបង្ហាញថាអ្នកមានជំងឺគិតច្រើនជ្រុល ល្មមដល់ពេលបន្ធូរចេញខ្លះហើយ
- 2018-06-20 08:29:40
- ចំនួនមតិ 0 | ចំនួនចែករំលែក 0
សញ្ញាបង្ហាញថាអ្នកមានជំងឺគិតច្រើនជ្រុល ល្មមដល់ពេលបន្ធូរចេញខ្លះហើយ
បើរវល់តែយករឿងតូចតាចមកគិតទាំងអស់ ជីវិតប្រចាំថ្ងៃរបស់យើងប្រាកដជាហត់នឿយខ្លាំង។ មិនថានិយាយ ឬធ្វើអ្វីមួយគឺត្រូវគិតបារម្ភមុនជានិច្ច រហូតពេលខ្លះយើងក៏ក្លាយជាមនុស្សគិតច្រើនជ្រុលដោយមិនដឹងខ្លួន ហើយបើសិនមិនព្រមបន្ធូរបន្ថយអារម្មណ៍តានតឹងចាប់ពីពេលនេះទេ បន្តទៅមុខនឹងអាចប្រឈមនឹងជំងឺបាក់ទឹកចិត្ត។ មុននឹងវាឈានដល់កម្រិតធ្ងន់បែបនោះ សូមមកសាកល្បងពិនិត្យខ្លួនឯងជាមួយ កញ្ញា ទាំងអស់គ្នាថាកំពុងមានបញ្ហាគិតច្រើននេះឬក៏អត់៖
៦. ខួរក្បាលចងចាំតែរឿងមិនល្អ
មិនថាពេលវេលាកន្លងផុតទៅយ៉ាងណា ប៉ុន្តែអ្នកនៅតែចងចាំរឿងអាក្រក់ៗទុកក្នុងចិត្ត មិនព្រមឲ្យអ្វីមកលុប ឬបំភ្លេចវាចោលបានឡើយ។ មិនមែនតែមួយរឿងទេ ប៉ុន្តែមានរឿងច្រើនដែលស្ថិតនៅក្នុងខួរក្បាលរបស់អ្នក ហើយឲ្យតែចាប់ផ្ដើមគិតពេលណា ក៏ឈឺក្បាលពេលនោះ។ នេះហើយជាអាការៈស្រេ្តសដែលអ្នកសន្សំបន្តិចម្ដងៗ បើសិនមិនព្រមបំភ្លេចរឿងអាក្រក់ៗខ្លះចោលទេ ជីវិតរបស់អ្នកនឹងកាន់តែអាប់អួរឡើង ហើយប៉ះពាល់ដល់ការងារប្រចាំថ្ងៃថែមទៀត។
៥. បារម្ភថាអ្នកដទៃមើលមកខ្លួនមិនល្អ
វាគឺជាអារម្មណ៍នៅពេលអ្នកមិនជឿជាក់លើខ្លួនឯងទាល់តែសោះ មិនថានិយាយស្ដី ឬធ្វើអ្វីក៏មានអារម្មណ៍ក្រែងៗ ព្រោះខ្លាចថាខ្លួនឯងធ្លោយធ្វើអ្វីមួយមិនទំនងក្នុងភ្នែកអ្នកដទៃ ខ្លាចគេសម្លឹងមើលមកអ្នកដោយខ្សែភ្នែកចម្លែកៗ។ ការពិតទៅអ្នកកំពុងគិតច្រើនជ្រុលទៅវិញទេ ព្រោះមិនថាអ្នកនិយាយ ឬបញ្ចេញកាយវិការអ្វី វាក៏មិនបានធ្វើឲ្យអ្នកដទៃគិតថាអ្នកមិនល្អដែរ ព្រោះអ្នកណាៗក៏ធ្លាប់ធ្វើអ្វីឆ្គង ហើយគេក៏មិនបានយកចិត្តទុកដាក់លើអ្នកដូចអ្វីដែលអ្នកគិតដែរ។
៤. គ្មានក្ដីសុខជាមួយអ្វីដែលខ្លួនកំពុងធ្វើ
បើអ្នកមិនព្រមបញ្ចេញអារម្មណ៍ឲ្យអស់ពីខ្លួន អ្នកក៏នឹងមិនមានក្ដីសុខជាមួយអ្វីដែលខ្លួនកំពុងធ្វើបានឡើយ ព្រោះថាអ្នកកំពុងស្ត្រេសខ្លាំងពេក។ អ្នកខ្លាចថាធ្វើហើយមានលទ្ធផលមិនល្អ មិនត្រូវចិត្តអ្នកដទៃ គិតៗរហូតទាល់តែស្រេ្តស ទាំងគ្មានរឿងអ្វីធ្ងន់ធ្ងរឲ្យត្រូវគិតផង។ ដូច្នេះធ្វើកុំភ័យបារម្ភខ្លាំងពេក សំខាន់ឲ្យតែអ្នកខំប្រឹងធ្វើវាឲ្យអស់ពីសមត្ថភាពសិនទៅគឺគ្រប់គ្រាន់ហើយ។
៣. មានរឿងអីក៏ញញឹម
នៅពេលមានបញ្ហា អ្នកជ្រើសរើសមិននិយាយវាឲ្យអ្នកណាស្ដាប់ឡើយ ព្រោះគិតថាគង់គ្មានអ្នកណាចង់ស្ដាប់ទេ បានត្រឹមតែលាក់បញ្ហាទុកម្នាក់ឯង ដល់ពេលមានអ្នកសួរនាំក៏ចេះតែខំញញឹមព្រោះមិនចង់ឲ្យគេដឹង។ អ្នកចាប់ផ្ដើមលាក់ភាពស្រ្តេសនៅក្នុងចិត្តច្រើនពេកហើយណា៎ ដូច្នេះគួរតែបញ្ចេញវាមកខ្លះ មុននឹងរាងកាយរបស់អ្នកមានបញ្ហាដោយសារសន្សំអារម្មណ៍ស្រ្តេសទុកច្រើនខ្លាំងពេក។
២. បារម្ភច្រើនពេលជួបមនុស្សថ្មីៗ
មិនថាជួបមិត្តថ្មី ឬសង្គមថ្មីៗ អ្នកតែងមានការព្រួយបារម្ភមុនជានិច្ចថាតើគេនឹងចូលចិត្តអ្នកឬអត់ ចង់ស្គាល់អ្នកឬអត់ ចុងក្រោយក៏គិតដល់ស្រ្តេសមែនទែន។ យកល្អ អ្នកគួរចាំដល់ជួបគេសិនទៅ ចាំគិត មិនចាំបាច់គិតតាំងពីមិនទាន់ជួបគេនោះទេ ព្រោះវានឹងធ្វើឲ្យអ្នកមានអារម្មណ៍ថាមានសម្ពាធពេលទៅជួបពួកគេ។
១. លាក់ទុកគ្រប់រឿងរ៉ាវរបស់ខ្លួនជាអាថ៌កំបាំង
នេះព្រោះតែអ្នកខ្លាចថា អ្នកដទៃនឹងដឹងរឿងរបស់អ្នក ហើយគេនឹងទទួលយកមិនបាន។ តែការពិតទៅលើលោកនេះ គ្មានអ្នកណាដែលមិនធ្លាប់ធ្វើខុសពីមុននោះទេ តែវាស្ថិតនៅត្រង់ថាគេចែករំលែករឿងទាំងនោះឲ្យអ្នកដទៃដឹងឮឬក៏អត់។ បើសិនរឿងរ៉ាវរបស់អ្នកក្នុងអតីតកាលមិនបានអាក្រក់ណាស់ណា ហើយចង់និយាយវាឲ្យអ្នកដទៃស្ដាប់ វាក៏មិនខុសឆ្គងអ្វីដែរ។ ការលាក់ទុករឿងដែលមិនអាចនិយាយជាមួយខ្លួនឯង គឺជារឿងល្អហើយ ប៉ុន្តែរឿងខ្លះនិយាយឲ្យអ្នកដទៃស្ដាប់ខ្លះក៏ល្អដែរ ដើម្បីជាការបន្ធូរអារម្មណ៍ ជាជាងសន្សំស្រ្តេសទុកតែម្នាក់ឯង។
ការដែលជាមនុស្សគិតច្រើនគឺពិបាកបញ្ឈប់ណាស់ ប៉ុន្តែវាក៏មិនមែនមានន័យថាឈប់មិនបានដែរ ដោយគ្រាន់តែធ្វើអ្វីៗរាល់ថ្ងៃឲ្យបានល្អបំផុត ឈប់ភ័យបារម្ភពីអ្វីដែលមិនទាន់កើតឡើង ចេះទម្លាក់ចោលនូវរឿងខ្លះ ព្រមទទួលស្គាល់ឲ្យបានថា អ្វីដែលត្រូវកើត វានឹងកើត បើយើងធ្វើអស់ពីសមត្ថភាពហើយ លទ្ធផលចេញមកយ៉ាងម៉េចយើងក៏គួរតែរីករាយនឹងទទួល ៕
ចុចអាន៖
មនុស្សតឹងតែងចំពោះខ្លួនឯងហួសហេតុពេក ភាគច្រើនមានសញ្ញាទាំងនេះ
ឈប់ប្រើពាក្យថា «ជាតិនេះឆាចោល» តែត្រូវងាកមកពិចារណារឿងទាំងនេះវិញ