បើបានជួបមិត្ត ៥ប្រភេទនេះហើយជីវិតអ្នកពិតជាសំណាងខ្លាំងណាស់

2018-06-19 05:53:36
ចំនួនមតិ 0 | ចំនួនចែករំលែក 0

តើអ្នកធ្លាប់ចំណាយពេលទៅលើមនុស្សខុស ឬត្រូវមិត្តសម្លាញ់អ្នកចាក់ពីក្រោយខ្នងទេ? បើមិនជួបមិត្តប្រភេទនេះ អ្នកក៏មិនអាចដឹងថាមិត្តណាល្អ ឬមិត្តណាអាក្រក់ដែរ។ មិត្តខ្លះអាចរាប់អានរហូត រីឯមិត្តខ្លះទៀតរាប់អានបានតែមួយភ្លែតក៏ដោយសារតែការគិតនិងគោលដៅខុសគ្នា។ ហេតុនេះហើយទើបកញ្ញាចង់បង្ហាញពីមិត្ត៥ប្រភេទដែលគួរសេពគប់និងជួយឱ្យជីវិតអ្នកកាន់តែប្រសើរ៖

១. អ្នកស្រមើស្រមៃច្រើន (The Dreamer)

មិត្តអ្នកខ្លះប្រហែលជាចូលចិត្តស្រមើស្រមៃខុសពីការពិត តែមិត្តប្រភេទនេះអាចនឹងជួយឱ្យជីវិតអ្នកប្រសើរជាងមុនក៏ដោយសារតែការស្រមៃនេះហើយ។ មិត្តប្រភេទនេះជួយអ្នកឱ្យស្រមៃពីអ្វីដែលអ្នកចង់ធ្វើ និងចង់បានទោះបីជាវាមិនអាចទៅរួច។ ការស្រមៃទាំងនោះជួយអ្នកឱ្យមានសង្ឃឹម និងគំនិតច្នៃប្រឌិតហើយគិតថាគ្រប់យ៉ាងគឺអាចទៅរូចមិនរាថយ។

២. អ្នកជំរុញ (The Driver)

ក្រោយពីអ្នកស្រមៃពីគោលដៅរបស់អ្នកហើយ មិត្តប្រភេទនេះនឹងជួយឱ្យការស្រមៃរបស់អ្នកក្លាយជាការពិត។ គេនឹងជួយអ្នកឱ្យទៅដល់គោលដៃ និងប្រាប់អ្នកពីរបៀបទៅឱ្យដល់គោលដៅនោះ។ គេអាចជាអ្នកប្រឹក្សាយោបល់ និងជាគ្រូបង្រៀនអ្នកពីឧបសគ្គដែលអ្នកជួប។

៣. អ្នកលើកទឹកចិត្ត (The Motivator)

នៅពេលដែលអ្នកជួបឧបសគ្គអ្នកប្រាកដជាត្រូវការមិត្តប្រភេទនេះ។ នៅពេលអ្នកមានអារម្មណ៍ថាចង់បោះបង់មិត្តប្រភេទនេះនឹងជួយលើកទឹកចិត្តអ្នកឱ្យសម្រេចគោលដៅ។ អ្នកនឹងមានក្តីសង្ឃឹមឡើងវិញ។

៤. អ្នកគាំទ្រ (The Supporter)

នេះគិតជាមិត្តពិតប្រាកដ ហើយជាមិត្តដ៏ល្អបំផុត។ មិត្តប្រភេទនេះធ្វើឱ្យអ្នកមានអារម្មណ៍សប្បាយចិត្ត និងធូរស្រាលពេលនៅជិត។ អ្នកអាចចែករំលែករឿងគ្រប់យ៉ាងជាមួយគេ ហើយគ្រប់ពេលគឺមានគេនៅជិត។ គេក៏ជួយអ្នកស្រេចក្តីស្រមៃអ្នក ពេលខ្លះគេក៏នៅក្បែរអ្នកហើយរីករាយ សាទរនៅពេលឃើញអ្នកជោគជ័យ។

៥. អ្នកប្រឆាំង (The Devil's Advocate)

ក្នុងជីវិតអ្នកមិនត្រូវមានតែអ្នកគាំទ្ររហូតទេ ព្រោះពេលខ្លះគោលដៅឬការសម្រេចចិត្តអ្នកអាចនឹងខុស។ ហេតុនេះហើយអ្នកត្រូវការមិត្តប្រភេទនេះដើម្បីប្រឆាំង និងប្រាប់អ្នកពីអ្វីដែលខុសអ្វីដែលត្រូវ។ មិត្តប្រភេទនេះអាចនឹងមាត់អាក្រក់បន្តិច តែគ្រប់យ៉ាងគឺចង់ឱ្យអ្នកល្អ ៕

ចុចអាន៖

ប្រភព៖ success ប្រែសម្រួល៖ តាន់ ច័ន្ទលក្ខិណា