មេរៀនជីវិត៨ ចាស់ៗចង់ឲ្យក្មេងៗដឹង កុំឲ្យស្ដាយក្រោយដូចគាត់

2018-05-08 06:24:04
ចំនួនមតិ 0 | ចំនួនចែករំលែក 0

សម័យកុំព្យូទ័រគឺជាសម័យកាលរបស់មនុស្សជំនាន់ថ្មី ដូច្នេះហើយសម្ដីមនុស្សចាស់ក៏ហាក់លែងមានឥទ្ធិពលច្រើនដូចមុនដែរសម្រាប់យុវវ័យបច្ចុប្បន្ន។ ប៉ុន្តែតាមការពិត បើយើងក្រឡេកមើលជ្រុងម្ខាងទៀត យើងនឹងឃើញថាមនុស្សចាស់ទាំងឡាយគឺបានឆ្លងកាត់ក្ដៅត្រជាក់ច្រើនមិនតិចទេ ទម្រាំមានអាយុច្រើនយ៉ាងនេះ បើទោះបីបរិយាកាសពីមុននិងបច្ចុប្បន្នមិនដូចគ្នា ប៉ុន្តែមូលដ្ឋាននៃការរស់នៅ ក្ដីស្រលាញ់ និងការដំណើរជីវិតក៏មិនខុសគ្នាណាស់ដែរ។

ដូច្នេះហើយអ្នកស្រាវជ្រាវអាមេរិកមួយរូបឈ្មោះ Dr. Karl Pillemer ក៏បានទៅសម្ភាសប្រជាជនអាមេរិកដែលមានអាយុចាប់ពី ៧០ឆ្នាំឡើងទៅ ចំនួន ១២០០នាក់ ដោយមានសំនួរគោលថា “តាមរយៈបទពិសោធន៍មួយជីវិតអ្នក តើអ្វីគឺជាមេរៀនសំខាន់បំផុតដែលអ្នកចង់បន្សល់ទុកឲ្យកូនចៅ?" ហើយក៏យកមកសរសេរជាសៀវភៅឈ្មោះ “30 Lessons for Living” ប៉ុន្តែថ្ងៃនេះ កញ្ញា សូមកាត់យកត្រឹមចំណុចសំខាន់ៗចំនួន ៩ មកចែកជូនប្រិយមិត្តដូចតទៅ៖

១. ត្រូវជ្រើសរើសអាជីពដែលចិត្តយើងត្រូវការ ជាជាងធ្វើការដើម្បីលុយ មនុស្សចាស់ភាគច្រើនបានពោលថា កំហុសឆ្គងដ៏ធំក្នុងការជ្រើសរើសអាជីពរបស់គាត់គឺ ការជ្រើសរើសអាជីពដោយមើលលើផលប្រយោជន៍ច្រើនជាងអ្វីដែលខ្លួនចូលចិត្ត និងតម្លៃនៃអាជីពនោះ។

២. ត្រូវចេះថែទាំសុខភាព ដោយកាត់បន្ថយ និងបញ្ឈប់ទង្វើនានាដែលបំផ្លាញសុខភាពរាងកាយ មិនថាការជក់បារី ផឹកស្រា ញ៉ាំអាហារដែលមិនល្អ ឬមិនហាត់ប្រាណ។ សកម្មភាពទាំងអស់នេះ មិនបានធ្វើឲ្យយើងបាត់បង់ជីវិតភ្លាមៗទេ ប៉ុន្តែវានឹងធ្វើឲ្យយើងលំបាកពេលចាស់ទៅ។

៣. ទទួលយកឱកាសដែលចូលមក នៅពេលមានឱកាស ឬ Challenge អ្វីចូលមក គឺមិនត្រូវបដិសេធឡើយ ព្រោះភាគច្រើនការបដិសេធនូវឱកាសទាំងនោះច្រើនធ្វើឲ្យយើងសោកស្ដាយនៅពេលក្រោយ ដោយសារមិនបានសាកល្បង។

៤. ជ្រើសរើសគូជីវិតដោយប្រយ័ត្នប្រយែង កុំប្រញាប់សម្រេចចិត្ត ត្រូវប្រើពេលដើម្បីមើលចិត្ត និងស្គាល់មនុស្សដែលយើងនឹងរស់នៅជាមួយសិន។ កុំប្រញាប់សម្រេចចិត្តរស់នៅជាមួយអ្នកណា លុះត្រាតែយើងបានស្គាល់ចរិតពិតរបស់គេសិន។

៥. ដើរលេងឲ្យបានច្រើន មនុស្សចាស់ភាគច្រើនបានពេលដូចគ្នាថា នៅពេលមានឱកាសធ្វើដំណើរទៅឆ្ងាយៗ គឺជាពេលវេលាសំខាន់ និងមានតម្លៃរបស់ជីវិត។

៦. ចង់និយាយអ្វី ត្រូវនិយាយភ្លាមៗ ដើម្បីកុំឲ្យយើងមានអារម្មណ៍ស្ដាយក្រោយដោយមិនបាននិយាយអ្វីដែលយើងចង់និយាយជាមួយមនុស្សជាច្រើន។ យើងមានឱកាសបង្ហាញអារម្មណ៍របស់យើងចំពោះនរណាម្នាក់ គឺនៅពេលគេមានជីវិតរស់នៅតែប៉ុណ្ណោះ។

៧. ពេលវេលាជារបស់មានតម្លៃ ជីវិតរបស់យើងក៏ខ្លីណាស់ដែរ ដូច្នេះកុំចំណាយពេលអង្គុយសោកសៅច្រើនពេក ប៉ុន្តែត្រូវធ្វើអ្វីដែលសំខាន់ និងមានតម្លៃឥលូវនេះ ព្រោះថានៅពេលដែលយើងមានអាយុកាន់តែច្រើន យើងនឹងយល់ថាពេលវេលាកន្លងទៅលឿនខ្លាំងណាស់។ ត្រូវកាត់បន្ថយការព្រួយបារម្ភ ជាពិសេសការព្រួយបារម្ភទៅលើអ្វីដែលមិនកើតឡើង។

៨. ក្ដីសុខគឺជាអ្វីដែលយើងជ្រើសរើស មិនមែនអ្វីដែលកើតឡើងដោយសារលក្ខខ័ណ្ឌផ្សេងៗនោះទេ។ ដំបូន្មាននៅត្រង់នេះគឺ ត្រូវទទួលខុសត្រូវចំពោះក្ដីសុខរបស់ខ្លួនមួយជីវិត កុំរំពឹងចាំទទួលវាពីអ្នកដទៃ ៕

ចុចអាន៖

ប្រភព៖ updatetoday ប្រែសម្រួល៖ ស្វាយ វ៉ាន់ថន