ទម្លាប់៦យ៉ាងស្រីៗធ្វើរាល់ថ្ងៃ នាំឱ្យបាក់សម្រស់ ឆាប់ចាស់មុនអាយុ

2018-06-16 02:53:00
ចំនួនមតិ 0 | ចំនួនចែករំលែក 0

ទម្លាប់ប្រចាំថ្ងៃមួយចំនួនរបស់នារីបានបំផ្លាញរូបសម្រស់ និងសុខភាពយ៉ាងស្ងៀមស្ងាត់ដែលអ្នកមិនធ្លាប់ចាប់អារម្មណ៍។ នារីខ្លះចេះតែឆ្ងល់ថា ហេតុអ្វីសម្រស់របស់ខ្លួនចេះតែយ៉ាប់ទៅៗ ទាំងដែលញ៉ាំក៏បានច្រើន គេងក៏ច្រើន។ ប៉ុន្តែអ្នកគួរតែយកពេលវិភាគជាថ្មី លើសកម្មភាពប្រចាំថ្ងៃរបស់អ្នក ថាតើធ្លាប់ធ្វើរឿងដូចខាងក្រោមនេះឬអត់ ទើបសម្រស់លែងស្អាតបែបនេះ?

ញ៉ាំតាមឃ្លាន ឬតាមអារម្មណ៍

ពាក្យស្លោកមួយរបស់នារីៗ គឺការញ៉ាំធ្វើឱ្យសប្បាយចិត្ត។ មែនហើយ ការញ៉ាំអាចឱ្យមនុស្សស្រីយើងរីករាយបានមែន ប៉ុន្តែបើញ៉ាំដោយមិនបានគិត ឬគ្រប់គ្រងត្រឹមត្រូវ វានឹងបង្កទៅជាទុក្ខលំបាកសម្រាប់ខ្លួនទៅវិញ។ ជាពិសេសការញ៉ាំអាហារដែលគ្មានជីវជាតិគ្រប់គ្រាន់ អាហារដែលមានជាតិខ្លាញ់ ជាតិស្ករខ្ពស់ ឬជាតិអាល់កុលជាដើម នឹងធ្វើឱ្យរាងកាយងាយនឹងកើតជំងឺ ហើយរូបសម្រស់ក៏លែងស្រស់ស្អាតបានដែរ ព្រោះវាចូលទៅបង្កជាមេរោគ។

ដូច្នេះ គួរញ៉ាំអាហារឱ្យបានការកំណត់ច្បាស់លាស់ និងបន្ថែមជាមួយការរំសាយអារម្មណ៍ដោយការហាត់ប្រាណ លេងកីឡា ស្ដាប់ចម្រៀង ឬចេញទៅក្រៅលំហែកាយ។

មានស្នេហាដោយគ្មានការការពារ

ការឆ្លងរោគដោយសារការរួមភេទនឹងធ្វើឱ្យសុខភាព និងរូបសម្រស់របស់នារីទ្រុឌទ្រោមខ្លាំងបន្តិចៗម្ដង។ ដូច្នេះគួរប្រើស្រោមអនាម័យ និងចេះវិធីការពារឱ្យបានត្រឹមត្រូវនៅរាល់ពេលរួមភេទ។

ចុចអាន៖ ក្រោកពីឈឺបាក់សម្រស់មែនទេ? តិកនិកទាំងនេះ អាចជួយឲ្យមុខភ្លឺថ្លាបានវិញភ្លាម

គេងទាំងសក់នៅសើម

ការគេងដោយទុកទាំងសក់នៅសើមនឹងធ្វើឱ្យសក់ឆាប់ខូចខ្ទេច និងជ្រុះខ្លាំង ឬបង្កជាបញ្ហាស្បែកក្បាលផ្សេងៗ។ ក្រៅពីនេះ វាក៏អាចបង្កទៅជាផ្សិតនៅលើខ្នើយ និងមានក្លិនមិនល្អនៅជាប់ស្បែកក្បាល និងសរសៃសក់ផងដែរ។

ប្រើថ្នាំពន្យារកំណើតមិនបានត្រឹមត្រូវ

នារីមួយចំនួនជ្រើសយកវិធីប្រើថ្នាំពន្យារកំណើតដើម្បីថែរក្សាសម្រស់ ដូចជាដើម្បីបំបាត់មុន និងធ្វើឱ្យស្បែកស្អាត។ ប៉ុន្តែការប្រើដោយគ្មានការប្រឹក្សាពីវេជ្ជបណ្ឌិតត្រឹមត្រូវ ឬប្រើលើសកម្រិតនឹងធ្វើឱ្យប៉ះពាល់ដល់ស្បូន និងឈានដល់បញ្ហានៃការមានកូននៅពេលក្រោយទៀតផង។

ពាក់អាវទ្រនាប់ខុសពីទ្រង់ទ្រាយដើមទ្រូង

ប្រហែល៧០%នៃស្ត្រីលើពិភពលោកកំពុងប្រើអាវទ្រនាប់ដែលមិនត្រូវនឹងទំហំដើមទ្រូងរបស់ខ្លួន។ ការប្រើមិនខុសខ្នាតបែបនេះ វាអាចបណ្ដាលឱ្យខូចសុដន់ រហូតឈានដល់ការកើតមហារីកសុដន់ ឈឺឆ្អឹងខ្នង ព្រោះតែភាពទាញនៃខ្សែអាវទ្រនាប់ ឈឺកញ្ចឹងក ឈឺក្បាល និងបញ្ហាផ្សេងទៀត។

មិនបានលាងសម្អាតកន្លែងសម្ងាត់ឱ្យល្អ

ប្រដាប់ភេទគឺជាកន្លែងដែលត្រូវយកចិត្តទុកដាក់បំផុត ព្រោះបាក់តេរីអាចចូលទៅក្នុងនោះ និងបង្កជាជំងឺផ្សេងៗ ហើយក៏មិនងាយព្យាបាលដូចកន្លែងដទៃទៀតដែរ។ ដូច្នេះរាល់ពេលងូតទឹក ឬក្រោយពេលរួមភេទ អ្នកគួរលាងសម្អាតតំបន់នោះឱ្យបានស្អាតល្អ និងជូតឱ្យស្ងួតល្អទើបជាការប្រសើរ៕

ចុចអាន៖ កំហុសជាប្រចាំស្រីៗតែងធ្វើ ដូចបំផ្លាញមុខខ្លួនឯងដោយមិនដឹងខ្លួន

ប្រភព៖ stylecaster | womenbeautyextra ប្រែសម្រួល៖ សរ សុគន្ធី