ប្រពន្ធចូលចិត្តប្រចណ្ឌប្តី ត្រូវដឹងពីរឿង ៧ យ៉ាងនេះសិន ដើម្បីកុំឲ្យឈានទៅបែកបាក់គ្នា

2018-06-04 08:10:00
ចំនួនមតិ 0 | ចំនួនចែករំលែក 0

ស្នេហាកើតចេញពីសេចក្ដីស្រលាញ់ មានការស្រលាញ់ តែងមានការប្រចណ្ឌ បើប្រចណ្ឌក៏ត្រូវឲ្យមានហេតុផល សមរម្យមួយអាចទទួលយកបាន ទើបគ្មានរឿងឈ្លោះទាស់ទែង រហូតដល់បែកបាក់គ្នា ដោយសារតែ ការប្រចណ្ឌនេះ។

១. មិនសម្ដែងទឹកមុខក្រញេវក្រញូវ

ពេលប្តីនៅខាងក្រៅយូរ ហើយត្រូវត្រលប់មកផ្ទះវិញយឺតយ៉ាវ ពិតណាស់វាពិបាកបន្តិចមែនក្នុងការ ធ្វើចិត្តឲ្យនឹងថ្កល់មិនខឹង ប៉ុន្តែទោះបីជាខឹងដល់កម្រិតណាក៏ដោយ ត្រូវតែទ្រាំទប់សិន ព្រោះប្រពន្ធដែលឆ្លាត គឺទុកពេលឲ្យប្តីរ៉ាយរ៉ាប់ហេតុផល តាមដានមើល ថ្លឹងថ្លែងឲ្យបានច្បាស់លាស់សិន មុនឆេវឆាវច្រឡោតដាក់។ ជួនកាលអ្វីៗវាមិនមែនដូចការស្មានទាំងអស់នោះទេ គាត់អាចរវល់ជាមួយការងារ ឬមានកិច្ចការអ្វីផ្សេងដែលត្រូវបញ្ចប់បន្ទាន់។

២. រករឿងបានលុះត្រាតែមានភស្តុតាងជាក់ស្ដែងនៅក្នុងដៃ

នារីភាគច្រើនតែងធ្វើឲ្យខ្លួនឯងក្លាយជាជនរងគ្រោះ ដោយសារតែអារម្មណ៍ទី៦ គ្រាន់តែសង្កេតឃើញថាប្តីប្លែកអីបន្តិច គឺគិតដល់រឿងមានស្រីក្រៅភ្លែតតែម្ដង។ បើអ្នកមិនចង់ឲ្យខ្លួនឯង ក្លាយជាអ្នកមានកំហុសដោយសារតែប្រចណ្ឌខុសរឿង កុំវាយតម្លៃទម្លាក់កំហុសលើប្តី ដោយគ្មានភស្តុតាង ព្រោះអាចធ្វើឲ្យគាត់កាន់តែធុញ និងគិតថាអ្នកគ្មានជំនឿទុកចិត្តនៅក្នុងជីវិតគូ។ យ៉ាងណាមិញ អ្នកមានសិទ្ធិនិយាយ វែកញែកតតាំងបាន លុះត្រាណាតែមាន ភស្តុតាងជាក់ស្ដែងនៅក្នុងដៃសិន។

៣. កុំជឿពាក្យគេឆ្កឹះឆ្កៀលដោយមិនបានឃើញនឹងភ្នែកផ្ទាល់

នៅក្នុងសង្គមយើងនេះសម្បូរណាស់អ្នកដែលចូលចិត្តខ្វាយខ្វល់ចេះដឹងរឿងគេហួសហេតុ អ្នកខ្លះចង់ឲ្យប្តីប្រពន្ធគេឈ្លោះគ្នា ឃើញ១ រាយការណ៍ថា១០ ឬក៏គ្មានច្បាស់ការផង តែធ្វើដូចជាជាក់លាក់ណាស់ ប៉ុន្តែអ្វីដែលសំខាន់គឺស្ថិតនៅលើខ្លួនយើងទេ ហេតុអ្វីគ្រាន់តែស្តាប់ឮត្រូវឆេះដូចភ្លើងនោះ ព្រោះអត់ទាន់បានឃើញនឹងភ្នែកខ្លួនឯងផ្ទាល់ផងហ្នឹង។ បើមានអ្នកមកប្រាប់អីចឹងមែន អ្នកត្រូវញញឹមហើយនិយាយតបថា ខ្ញុំជឿជាក់លើប្តីខ្ញុំ។ ពេលជួបមុខប្តី ក៏កុំទាន់អាលខឹងដែរ ត្រូវធ្វើជានិយាយលេង ហើយសួរធម្មតាៗពីអ្វីដែលអ្នកបានឮ។

៤. រឹងមាំជាមួយនឹងភាពទន់ភ្លន់

ជាមនុស្សស្រីរឹងមាំ បង្ហាញពីភាពទន់ភ្លន់ មិនមែនទន់ជ្រាយ ព្រោះវាជាពេលមួយដែលអ្នក អាចបញ្ជាក់ប្រាប់គាត់ថា អ្នកមិនមែនមិនដឹងថាគាត់កំពុងតែធ្វើអ្វីនោះទេ គ្រាន់តែត្រូវរង់ចាំមើលដោយភាពអត់ធ្មត់ នោះគាត់អាចនឹងភ្ញាក់រឭក ខ្មាសខ្លួនឯង និងមានអារម្មណ៍ថាបានធ្វើខុសចំពោះអ្នក។

៥. ថែរក្សាខ្លួនឯងឲ្យបានល្អ

បើអ្នកយល់ថា ស្វាមីរបស់មើលទៅហាក់បីដូចជាធុញទ្រាន់ កុំទាន់អាលចោទប្រកាន់ផ្តេសផ្តាស ពេលខ្លះ អាចមកពីអ្នកមិនបានយកចិត្តដាក់ ផ្អែមល្ហែមជាមួយគាត់ដូចពីមុន។ អ្វីដែលត្រូវធ្វើ គឺថែរក្សាខ្លួនឯង ទាំងសុខភាពនិងសម្រស់ ប្រសើរជាងការគិតរករឿងឈ្លោះ ឬរកវិធីសងសឹកឥតប្រយោជន៍។

៦. ផ្តល់ឧកាសឲ្យកែកំហុស

កុំឲ្យចំណងអាពាហ៍ពិពាហ៍ដែលខំរក្សាអស់រយៈពេលជាយូរឆ្នាំ មកបែកបាក់ក្នុងពេលតែមួយនាទី។ ប្រាកដណាស់អ្នកនៅតែមានចិត្តស្រលាញ់គាត់ អីចឹងហេតុអីក៏មិនសាកបើកចិត្ត ផ្តល់ឧកាសឲ្យគាត់កែខ្លួនសិនទៅ។ បើគាត់ដឹងកំហុសហើយ អ្នកត្រូវព្យាយាមទុកចិត្ត ស្រលាញ់គាត់ ដើម្បីឲ្យគាត់មានអារម្មណ៍ថាភ័យខ្លាចក្នុងការបាត់បង់អ្នក។

៧. បន្តភាពផ្អែមល្ហែម និងភាពកក់ក្តៅ

ជនទី៣អាចចូលមកជ្រៀតជ្រែកបាន ប្រសិនបើអ្នក គ្មានពេលវេលាគ្រប់គ្រាន់នៅក្បែរគាត់ មិនសូវបានយកចិត្តទុកដាក់ ឬមានអារម្មណ៍ធុញនឹងគ្នា។ ដើម្បីជៀសកុំឲ្យរឿងបែបនោះ អាចកើតឡើងបាន ទោបីជារៀបការយូរប៉ុនណាក៏ដោយ ត្រូវបន្តភាពផ្អែមល្ហែម ផ្តល់ភាពកក់ក្តៅ ប្រើពេលវេលានៅក្បែរគ្នាឲ្យបានច្រើន ដើរលេងខាងក្រៅជាមួយកូនៗ រំលឹកអនុស្សាវរីយ៍ល្អៗ ទើបធ្វើឲ្យគាត់ដឹងថា គ្រួសារមានន័យនិងសំខាន់យ៉ាងណា។

ចុចអានបន្ត៖

ប្រភព៖ bestie ប្រែសម្រួល៖ ដេត ឈុនអ៉ី