ពេលសង្សារមិនសូវយល់ចិត្ត ៦ វិធីនេះអាចធ្វើឲ្យគាត់កែប្រែមកយល់ពីអ្នកទាំងស្រុងវិញ

2018-05-24 04:30:00
ចំនួនមតិ 0 | ចំនួនចែករំលែក 0

ស្នេហាកើតឡើងដោយសារស្រលាញ់ និងការយល់ចិត្តរវាងមនុស្សពីរនាក់ ប៉ុន្តែពេលខ្លះខាងបុរសៗមិនសូវយល់ពីបញ្ហានេះឡើយ ដោយចេះតែរករឿងថា គ្មានពេលនៅជាមួយគ្នាបានច្រើន។ តែស្រីៗមិនបាច់បារម្ភពេកទេ បើសង្សារមិនយល់ចិត្តអ្នក អាចប្រើ ៦ វិធីនេះឲ្យគាត់កែប្រែគំនិតបាន៖

១.ឲ្យគាត់យល់ពីពេលវេលា

ប្រសិនបើគាត់ច្រើនតែមានប្រតិកម្មនឹងពេលវេលារបស់អ្នកទាំងពីរ អ្នកក៏គួរតែពន្យល់ណែនាំឲ្យគាត់ដឹងពីរឿងការងារ និងជីវិតឯកជនរៀងខ្លួន។ មួយវិញទៀតបើសង្សារចង់ឲ្យនៅក្បែរគ្រប់ពេល អ្នកត្រូវលើកហេតុផលថា ពេលគាត់ទៅជប់លៀងជាមួយអ្នកនៅកន្លែងធ្វើការ ទៅលេងបាល់ ឬកម្មវិធីផ្សេងៗ អ្នកក៏មិនបានតោងទាមចង់ទៅដែរ។

២.កុំស្រែក កុំហាម គ្រាន់តែញញឹម

នៅពេលមនុស្សប្រុសបង្ហាញអាការមិនយល់ចិត្ត ចូរអ្នកកុំតបតវិញដោយការនិយាយខ្លាំងៗដូចស្រែក ឬហាមឃាត់សកម្មភាពរបស់ដៃគូ។ គូស្នេហ៍មួយចំនួន គឺតែងជួបប្រទះបញ្ហាមិនដឹងចិត្តគ្នានេះឯង ហើយអ្នកគ្រាន់តែបណ្ដោយឲ្យគាត់អស់មួយខ្យល់ រួចញញឹមរកគ្នាឡើងវិញ បន្ទាប់មកធ្វើការអធិប្បាយដោយសម្ដីទន់ភ្លន់ បែងលួងលោម។ ការស្រែកគំហកនឹងជំរុញគាត់ឲ្យគិតទៅរកភាពអវិជ្ជមាន ដែលបណ្ដាលឲ្យស្នេហាឈានទៅការប្រេះស្រាំទៅវិញទេ។

៣.គោរពគាត់

គ្រាន់តែការមិនយល់ចិត្តបន្តិចបន្តួច អ្នកធ្វើឫកឆ្មើងឆ្មៃដាក់គាត់វិញនោះ ព្រោះគិតថាមិនសមនឹងអ្នកគោរព។ តែនោះជាការយល់ខុសទៅវិញទេ បុរសសមនឹងទទួលវាខ្លាំងណាស់ ព្រោះតែគាត់ស្រលាញ់ និងចង់នៅក្បែរអ្នក ទើបមានបញ្ហាបែបនេះ។

៤.ផ្ដល់ព័ត៌មានពីចរិតអ្នកដល់គាត់

អ្នកនឹងគិតថា គាត់គួរតែដឹងពីអត្តចរិតរបស់អ្នក មុននឹងចាប់ផ្ដើមស្រលាញ់គ្នា ប៉ុន្តែអ្នកប្រាកដចិត្តទេថា ធ្លាប់ផ្ដល់ព័ត៌មានទាំងនោះទៅគាត់គ្រប់គ្រាន់អស់ហើយនោះ។ អ្នកអាចនឹងមានចរិតសោះអង្គើយ មិនសូវផ្អែមល្ហែម ដូចនេះគួរតែប្រាប់គ្នាជាមុនសិន តែមនុស្សពេលមានស្នេហាទៅ អាចនឹងផ្លាស់ប្ដូរតិចតួចដែរ។ ទោះជាយ៉ាងណា ពេលអ្នកស្មុគស្មាញរឿងអ្វីមួយ អត្តចរិតដើមនឹងលេចឡើងជាមិនខាន ហើយបុរសឃើញដូចនោះ ស្មានថាអ្នកឈប់ស្រលាញ់គាត់។

៥.និយាយឲ្យដឹងហេតុផល ពេលទំនេរ

ប្រសិនបើអ្នកនិយាយទៅគាត់នៅពេលកំពុងធ្វើការ ឬពេលកំពុងមើលទូរទស្សន៍ អ្នកត្រូវតែដឹងថា ពាក្យទាំងនោះនឹងមិនចូលត្រចៀកមនុស្សប្រុសឡើយ ព្រោះកំពុងតែមួម៉ៅស្រាប់។ អ្នកដកដង្ហើមឲ្យវែងៗ រួចរង់ចាំដល់គាត់ទំនេរ ចាំនិយាយគ្នាម្ដងទៀត ព្រោះអ្នកទាំងពីរនឹងផ្ដោតលើវាខ្លាំងជាងមុន។

៦.ឲ្យគាត់សួរសំណួរក្នុងចិត្ត

ក្នុងចិត្តគាត់អាចមានសំណួរជាច្រើន ចង់ដឹង តែមិនហ៊ានសួរហាមាត់ប៉ុណ្ណោះ។ ដូចនេះរកពេលអង្គុយនិយាយតទល់គ្នា និងឲ្យគាត់សួររឿងដែលគាត់ចង់ដឹងទាំងប៉ុន្មានមក។ នៅពេលជជែកគ្នា សូមអ្នកព្យាយាមលើកទឹកចិត្តគាត់ឲ្យសួរសំណួរអំពីជីវិតការងារ និងទំនាក់ទំនងរបស់ជាមួយមនុស្សជុំវិញខ្លួន ទើបអាចជម្រុះមន្ទិលសង្ស័យបាន៕

ចុចអាន៖ពេលស្រីៗធ្វើរឿងតូចៗដ៏គួរឲ្យស្រលាញ់នេះ អាចធ្វើឲ្យបេះដូងបុរសរលាយខ្ទេចបាន

ប្រភព៖ Likelovequotes ប្រែសម្រួល៖ ទ្រី រ៉ាវី