របៀបរើសពណ៌កាបូបលុយទៅតាមថ្ងៃកំណើតឲ្យមានរាសីខ្ពស់ និងលុយហូរចូលមិនដាច់

2018-05-11 03:21:42
ចំនួនមតិ 0 | ចំនួនចែករំលែក 0

កាបូបលុយជារបស់ដែលមនុស្សទូទៅមិនអាចខ្វះបានដើម្បីទុកដាក់លុយឲ្យមានរបៀបរៀបរយ តែយ៉ាងណាក៏ដោយបើអ្នកចេះជ្រើសរើសវាទៅតាមក្បួនទៀតនោះកាន់តែល្អ។ ខាងក្រេោមនេះជារបៀបរើសពណ៌កាបូបលុយទៅតាមថ្ងៃកំណើតឲ្យមានលុយហូរចូលមិនដាច់៖

១. អ្នកកើតថ្ងៃអាទិត្យ

ពណ៌ដែលអ្នកគួររើសគឺពណ៌ងងឹតៗដូចជាពណ៌ខ្មៅ ពណ៌ស្វាយចាស់ ពណ៌បៃតងចាស់ជាដើម។ ពណ៌បែបនេះគឺជួយឲ្យជោគជតាអ្នកឡើងខ្ពស់ និងថែរក្សាលុយក្នុងកាបូបមិនឲ្យដាច់។

រីឯពណ៌ដែលមិនគួរប្រើគឺពណ៌ក្រហម ពណ៌ខៀវព្រោះអាចកាត់រាសីអ្នកឲ្យថមថយបាន។ វាមិនអាចថែរក្សាលុយដែលមាននោះទេ ហើយក៏ជួយឲ្យរបរការងារចុះថយដែរ។

២. អ្នកកើតថ្ងៃច័ន្ទ

អ្នកដែលកើតចំថ្ងៃនេះគួរតែរើសយកកាបូបលុយពណ៌លឿង ស និងពណ៌ត្នោត ព្រោះពណ៌បែបនេះជួយឲ្យអ្នកមានភាពលេចធ្លោ ខ្ពង់ខ្ពស់ក្នុងភ្នែកអ្នកផង។ ម្យ៉ាងទៀតវាអាចទាក់ទាញលុយឲ្យហូរចូលមកក្នុងកាបូបមិនឲ្យខានទៀតផង។

ពណ៌ដែលមិនគួរប្រើគឺពណ៌ក្រហម ពណ៌ផ្កាឈូក ព្រោះពណ៌ទាំងនេះមិនល្អសម្រាប់អ្នកកើតថ្ងៃនេះឡើយ។

៣. អ្នកកើតថ្ងៃអង្គារ

កាបូបលុយគួរតែជាពណ៌ប្រផេះ ពណ៌ប្រាក់ ដើម្បីឲ្យលុយហូរចូលបានច្រើន។ លើសពីនេះក៏អាចប្រើពណ៌ផ្កាឈូក ពណ៌លឿង ពណ៌ខៀវបានដែរ។

ពណ៌ដែលមិនគួរប្រើនោះគឺពណ៌ដូចអ្នកថ្ងៃច័ន្ទ និងខ្មៅ ពណ៌ស្វាយ ព្រោះវាអាចឲ្យលុយហូរចេញ មិនឲ្យសល់។

៤. អ្នកកើតថ្ងៃពុធ

ពណ៌ដែលល្អសម្រាប់អ្នកកើតថ្ងៃនេះគឺពណ៌ផ្ទៃមេឃ ពណ៌លឿង ព្រោះវាជួយឲ្យអ្នកជុំវិញខ្លួនស្រឡាញ់ចូលចិត្ត ជួយយកអាសា។ សម្រាប់អ្នកដែលចង់ឲ្យលុយហូរចូលច្រើនគួរតែរើសយកពណ៌ខៀវ។

ពណ៌ដែលមិនគួរប្រើគឺពណ៌ប្រផេះ ពណ៌ត្នោត និងពណ៌ផ្កាឈូក ព្រោះវាអាចឲ្យអ្នកបាត់បង់លុយដែលខំរកបានមក។

៥. អ្នកកើតថ្ងៃព្រហស្បតិ៍

អ្នកកើតថ្ងៃនេះគួរតែប្រើកាបូបលុយពណ៌ផ្កាឈូក ពណ៌ក្រហម និងពណ៌ខៀវដើម្បីឲ្យលុយសល់ច្រើនមិនងាយចេញ។

ពណ៌ដែលមិនគួរប្រើគឺពណ៌ប្រាក់ ពណ៌ស ឬពណ៌ស្រាលៗព្រោះនាំឲ្យកើតភ័យ និងរារាំងមិនឲ្យលុយហូរចូល។

៦. អ្នកកើតថ្ងៃសុក្រ

អ្នកកើតថ្ងៃនេះគឺអាចប្រើបានសឹងតែគ្រប់ពណ៌តែបើល្អគួរតែប្រើពណ៌ត្នោត ពណ៌ទឹកក្រូច ពណ៌ផ្កាឈូកព្រោះវាជួយឲ្យមានលុយគ្រប់រដូវកាល និងមានគេស្រឡាញ់ច្រើន។

ពណ៌ដែលមិនគួរប្រើនោះគឺពណ៌បែបប្រផេះព្រោះបើប្រើពណ៌នេះអាចឲ្យអ្នកមានទុក្ខ មិនសប្បាយចិត្តជាដើម។

៧. អ្នកកើតថ្ងៃសៅរ៍

សម្រាប់ពណ៌ដែលគួរប្រើនោះគឺពណ៌ក្រហម ពណ៌ប្រផេះ និងពណ៌ប្រាក់។ ពណ៌ទាំងនេះអាចជួយឲ្យអ្នកមានលាភមានលុយចាយមិនដែលដាច់។ លើសពីនេះពណ៌ស្វាយក៏ជាពណ៌ល្អសម្រាប់អ្នកកើតថ្ងៃនេះដែរ។