រឿងមិនបានការ ៦ដែលធ្វើឲ្យគូស្នេហ៍ឈ្លោះគ្នាបែកផ្សែងញឹកញាប់

2018-05-04 09:21:58
ចំនួនមតិ 0 | ចំនួនចែករំលែក 0

ព្រោះស្រលាញ់ខ្លាំង គិតថាគេសំខាន់ខ្លាំង ទើបគ្រប់រឿងពាក់ព័ន្ធនឹងមនុស្សដែលអ្នកស្រលាញ់ ក្លាយជារឿងសំខាន់សម្រាប់អ្នកជានិច្ច។ គូស្នេហ៍ជាច្រើនគូឈ្លោះគ្នាជាញឹកញាប់ ដោយសាររឿងដែលអ្នកខាងក្រៅអាចនឹងមើលឃើញថា វាជារឿងឥតប្រយោជន៍សោះ។ ប៉ុន្តែគ្មានស្នេហាអ្នកណាល្អជាមួយគ្នាបានរាល់ថ្ងៃទេ ការឈ្លោះគ្នាខ្លះគឺជារឿងធម្មតាសម្រាប់គូស្នេហ៍គ្រប់គូ។ ថ្ងៃនេះ យើងមកមើលរឿងគ្មានប្រយោជន៍ចំនួន ៦ដែលគូស្នេហ៍ឈ្លោះគ្នាច្រើនខ្លាំង។

១. មិនទទួលទូរសព្ទ / Reply សារយឺត

ហេតុអ្វីមិនទទួលទូរសព្ទ? Chat ទៅហេតុអីមិនតប? បើអ្នកជួបសំនួរបែបនេះ ហើយរកហេតុផលឆ្លើយតបវិញល្អៗមិនបាននោះ ត្រៀមខ្លួនឲ្យហើយទៅ ព្រោះវានឹងមានសំនួរជាច្រើនទៀតបន្តកន្ទុយគ្នា។ កុំធុញទ្រាន់ បើមានអ្នកណាឈ្លោះជាមួយអ្នកដោយសាររឿងនេះ ព្រោះវាបង្ហាញថាគេស្រលាញ់ គេនឹក និងបារម្ភ ខ្លាចអ្នកជួបបញ្ហាអ្វីមួយ។

២. គិតខ្លួនឯង

ការគិតរវើរវាយរបស់មនុស្សស្រីអាចកើតឡើងពិបាកកំណត់។ ពេលខ្លះ គ្មានរឿងអ្វីកើតឡើងសោះ ក៏នាងគិតច្រើន ហើយសន្និដ្ឋានដោយខ្លួនឯង។ អ្នកខ្លះគ្រាន់តែយល់សប្តិឃើញគូស្នេហ៍ក្បត់ចិត្តសោះ ភ្ញាក់ឡើងក៏ស្រែកឡូឡា ឬឈ្លោះគ្នាដោយសារចុច Love លើរូបអ្នកដទៃ។ គេដឹងហើយថាស្រលាញ់ ហួងហែង ប៉ុន្តែការពូកែប្រច័ណ្ឌតាមចាប់ខ្លាំងពេក ក្រៅពីធ្វើឲ្យខ្លួនឯងមិនសប្បាយចិត្តហើយ វាក៏ធ្វើឲ្យអ្នកម្ខាងទៀតពិបាកទ្រាំដែរ។

៣. រឿងញ៉ាំ

ធ្លាប់អត់ ឈ្លោះគ្នាដោយសារតែរឿងញ៉ាំអី? សំនួរ “ថ្ងៃនេះយើងញ៉ាំអីល្អ?” ចាត់ទុកថាជាសំនួរនាំទៅរកការឈ្លោះគ្នាមួយ ពេលរកចម្លើយមិនឃើញ ឬមិនស្រប។ ពេលខ្លះឃ្លានហើយ មិនបានញ៉ាំខឹងចិត្ត ក៏ឈ្លោះគ្នា ជួនកាលចង់ញ៉ាំ តែមិនបានញ៉ាំក៏ឈ្លោះគ្នា ញ៉ាំហើយធាត់ក៏បន្ទោសដៃគូ... នេះក៏ព្រោះសម្រាប់មនុស្សមួយចំនួន ការញ៉ាំគឺជាបញ្ហាដ៏ធំបំផុត។

៤. រឿងលុយ

លុយមិនមែនសំខាន់បំផុតទេ ប៉ុន្តែវាក៏សំខាន់ខ្លាំងខ្វះមិនបាន ជាពិសេសនៅពេលលុយពិបាករក។ គូស្នេហ៍ជាច្រើនធ្លាប់ឈ្លោះគ្នាព្រោះរឿងលុយ ឈ្លោះគ្នាថាអ្នកណារកលុយបានច្រើនជាង ដល់ពេលរកលុយជាមួយគ្នាក៏ឈ្លោះគ្នាថាអ្នកណាចាយលុយច្រើនជាង។ និយាយគ្នាមិនត្រូវ ជួនកាលអាចដល់ថ្នាក់ចែកផ្លូវក៏មាន។

៥. ទម្លាប់រស់នៅ

ធំឡើងក្នុងគ្រួសារខុសគ្នា សង្គមខុសគ្នា ដូច្នេះហើយការប្រព្រឹត្ត អាកប្បកិរិយា និងមារយាទក៏មាននោះក៏ខុសគ្នាតាមនោះដែរ។ អ្នកខ្លះយល់ថា ការចូលបន្ទប់ទឹកមិនបិទទ្វារ ការភើ ផោម ឬនិយាយស្ដីមិនពីរោះគឺជារឿងធម្មតា ប៉ុន្តែសម្រាប់អ្នកម្ខាងទៀត គឺអាចយល់ថាគឺជាទង្វើគ្មានសុជីវធម៌ ដែលនាំឲ្យមានការឈ្លោះគ្នា។

៦. រឿងសង្សារចាស់

សង្សារចាស់មិនខុសរងើកភ្លើងនោះទេ គឺគ្រាន់តែឆ្កឹះបន្តិចនឹងមានអារម្មណ៍មិនល្អភ្លាម។ អ្នកខ្លះឈ្លោះគ្នា មិនដឹងនិយាយអ្វី ក៏យកអ្នកបច្ចុប្បន្នទៅប្រៀបធៀបជាមួយអ្នកចាស់ ទាំងដែលគេមិនបានចូលមកពាក់ព័ន្ធទាល់តែសោះ។

ចុះគូស្នេហ៍របស់អ្នកធ្លាប់ឈ្លោះគ្នាដោយសាររឿងទាំងអស់ហ្នឹងញឹកអត់?

ចុចអាន៖

ប្រភព៖ gangbeauty ប្រែសម្រួល៖ ស្វាយ វ៉ាន់ថន