៩វិធីបង្រៀនកូនឲ្យពូកែ និងរឹងមាំជាងយើងទៅអនាគត

2018-05-04 05:07:49
ចំនួនមតិ 0 | ចំនួនចែករំលែក 0

ដោយសារការលំបាកកាលពីក្មេង ឪពុកម្ដាយមួយចំនួនក៏យល់ថានៅពេលមានកូន គឺត្រូវធ្វើយ៉ាងណាឲ្យកូនៗរបស់ពួកគេមានជីវិតស្រណុកស្រួលបំផុត។ នេះដោយសារតែក្ដីស្រលាញ់ ប៉ុន្តែវាអាចជាកំហុសអចេតនាដ៏ធំដែលធ្វើឲ្យកូនធំឡើង គ្មានភាពរឹងមាំ មិនអាចឈរដោយជើងរបស់ខ្លួនឯងបាន។ ដើម្បីបានយល់កាន់តែច្បាស់ ខាងក្រោមនេះ កញ្ញា នឹងចែករំលែកពីវិធីសាស្រ្តមួយចំនួនក្នុងការបង្រៀនកូនឲ្យក្លាយជាមនុស្សពូកែមួយរូបក្នុងយុគសម័យឌីជីថលនេះ៖

១. បង្រៀនឲ្យទទួលកំហុស

អ្នកដែលអាចរៀនសូត្រពីបទពិសោធន៍ដែលខ្លួនជួបប្រទះបានគឺអ្នកដែលដឹងខ្លួនថាខុសហើយមានគំនិតកែខ្លួន។ ចំណែកអ្នកដែលមិនទទួលស្គាល់កំហុសគឺអ្នកដែលគ្មានទំនួលខុសត្រូវឡើយក្នុងជីវិត ហើយក៏មិនមានគំនិតកែប្រែដែរ។

២. បង្រៀនឲ្យបង្កើតការងារ

ឪពុកម្ដាយភាគច្រើនបញ្ជូនកូនឲ្យទៅសាលារៀន ដើម្បីឲ្យពេលគេធំឡើងអាចរកការងារធ្វើបាន ប៉ុន្តែបើចង់ឲ្យកូនមានជីវិតល្អក្នុងយុគសកលភាវូបនីយកម្មនេះ គឺត្រូវឲ្យបណ្ដុះគំនិតឲ្យគេបង្កើតការងារ បង្កើតអាជីព ដើម្បីរកប្រាក់ចំណូលដោយខ្លួនឯង។ សូមកុំបង្រៀនឲ្យគេរកការងារធ្វើតែម្យ៉ាង ប៉ុន្តែត្រូវបង្រៀនឲ្យគេដឹងពីវិធីបង្កើតការងារផងដែរ។

៣. បង្ហាត់ឲ្យគេធ្វើការតាំងពីតូច

អ្នកដែលទទួលបានជោគជ័យខ្ពស់ភាគច្រើន ត្រូវចាប់ផ្ដើមធ្វើការតាំងពីអាយុនៅតិច។ មិនមែនដោយសារតែគេពូកែធ្វើការមួយមុខនោះទេ ប៉ុន្តែដោយសារអ្នកដែលធ្វើការតាំងពីក្មេង នឹងអាចដឹងពីតម្លៃនៃលុយមុនអ្នកណាៗ។

៤. ឲ្យកូនចាត់ចែងរឿងលុយកាក់ដោយខ្លួនឯង

អ្នកដែលមានជីវិតស្រណុកស្រួលគឺអ្នកដែលចេះចាត់ចែងសាច់ប្រាក់ដោយខ្លួនឯង។ អ្នកមិនគួរឲ្យលុយគេចាយ ដោយគេមិនបានធ្វើអ្វីសោះនោះទេ។ ស្ដាប់ទៅដូចជាតឹងរ៉ឹងបន្តិច ប៉ុន្តែជីវិតពិតរបស់យើងក៏បែបហ្នឹងដែរ មែនអត់? ត្រូវបង្រៀនឲ្យគេចេះចាយលុយយ៉ាងមានវិន័យ ហើយបើអាចបង្ហាត់ឲ្យគេយល់ពីការបណ្ដាក់ទុនទៀត គឺកាន់តែល្អ។

៥. ត្រូវចេះសរសើរកូន

កុំចេះតែប្រៀបធៀបកូនជាមួយកូនអ្នកដទៃ វាគ្មានអ្វីល្អនោះទេ។ គួរកាត់បន្ថយការរអ៊ូរ កាត់បន្ថយការបន្តុះបង្អាប់កូនខ្លួនឯង ប៉ុន្តែត្រូវបង្រៀនកូនដោយប្រើហេតុនិងផល។

៦. ដាក់ទោសគេពេលគេធ្វើខុស

ប្រសិនបើឪពុកម្ដាយមិនដែលដាក់ទោសនៅពេលដែលកូនធ្វើខុសទេ ទៅអនាគត សង្គមនឹងដាក់ទោសគេធ្ងន់ធ្ងរជាងនេះទៅទៀត។ ដូច្នេះ បើស្រលាញ់កូន ត្រូវបង្រៀនឲ្យគេស្គាល់ត្រូវខុស កុំរវល់តែទម្រើស។

៧. បង្រៀនឲ្យគេចេះស្រលាញ់ខ្លួនឯង

បញ្ហាធំមួយរបស់ក្មេងសម័យនេះគឺ ការមិនស្រលាញ់ និងមើលមិនឃើញតម្លៃរបស់ខ្លួនឯង ព្រោះមនុស្សសម័យនេះចូលចិត្តប្រើសម្ភារៈ និងលុយដើម្បីវាស់វែងតម្លៃរបស់មនុស្ស។ ការស្រលាញ់ខ្លួនឯង គឺការស្គាល់តម្លៃខ្លួនឯង និងចេះជ្រើសរើសអ្វីដែលខ្លួនឯងត្រូវការពិតប្រាកដ មិនមែនប្រើជីវិតដើម្បីឲ្យល្អមើលក្នុងភ្នែកអ្នកដទៃ ឬផ្គាប់ចិត្តអ្នកដទៃនោះទេ។

៨. បង្រៀនឲ្យចេះ “ឲ្យ”

សម័យនេះឱកាសមានច្រើនសម្រាប់អ្នកដែល “ឲ្យ”។ ត្រូវបង្រៀនកូនឲ្យចេះធ្វើអ្វីដើម្បីអ្នកដទៃដោយមិនបានផលតបស្នងខ្លះផង ដើម្បីឲ្យគេបានសាកល្បងធ្វើការងារ បានអភិវឌ្ឍខ្លួន ចេះជួយអ្នកដទៃ និងចេះបរិច្ចាគ។

៩. បង្រៀនឲ្យកូនចេះសម្លឹងវែងឆ្ងាយ

រឿងសម្លឹងមើលវែងឆ្ងាយគឺជាអ្វីដែលត្រូវតែបង្រៀនឲ្យគេចេះ ព្រោះសង្គមរាល់ថ្ងៃនេះច្រើនទាញឲ្យមនុស្សគិតនិងសម្លឹងមើលខ្លីៗ។ អ្នកដែលជោគជ័យជាងអ្នកដទៃទៅអនាគត គឺអ្នកដែលចេះសម្លឹង ឬមានចក្ខុវិស័យវែងឆ្ងាយ ព្រោះនៅគ្រប់កន្លែងគឺត្រូវការអ្នកដែលចេះគិត និងធ្វើការដើម្បីភាពគង់វង្សក្នុងរយៈពេលយូរ អាចបង្កើតការងារជាប្រយោជន៍ដល់អ្នកនៅជុំវិញខ្លួន ជាការងារដែលធ្វើហើយសប្បាយចិត្ត ថែមទាំងបានប្រាក់ចំណូល ចេះរៀនសូត្រពីកំហុស និងមិនឈប់ដើរ ៕

ចុចអាន៖

ប្រភព៖ rugyim ប្រែសម្រួល៖ ស្វាយ វ៉ាន់ថន