ទម្លាប់ចិញ្ចឹមកូនបែបខុសៗ ៤យ៉ាងធ្វើឲ្យកូនធំឡើងទំនើង កោងកាច

2018-02-28 08:46:07
ចំនួនមតិ 0 | ចំនួនចែករំលែក 0

កូនទំនើងសំដៅលើកូនដែលកើតមកក្រោមការមើលថែយកចិត្តទុកដាក់យ៉ាងល្អពីអាណាព្យាបាល ប្រៀបបីដូចជាទេវតាមកចាប់កំណើត ដោយឪពុកម្ដាយមិនហ៊ានឲ្យឃ្នើសចិត្តនោះទេ មានអ្វីក៏តែងប្រគេនថ្វាយជានិច្ច។ កូនបែបនេះភាគច្រើនពេលដែលធំឡើងនឹងក្លាយជាមនុស្សពិបាកស្ដីប្រដៅ មានភាពមានៈរឹងរូស ចូលចិត្តខ្សែលើអ្នកដទៃ ដែលបច្ចុប្បន្នគេសង្កេតឃើញថាកូន ឬក៏មនុស្សប្រភេទនេះមានការកើនឡើងជាលំដាប់។ របៀបចិញ្ចឹមកូនដែលធ្វើឲ្យកូនក្លាយជាកូនទេវតាដូចរៀបរាប់មកនេះ មានដូចជា៖

រូបតំណាង

**១. តាមចិត្តកូនដោយគ្មានមូលហេតុ**

កូនចង់បានអ្វីក៏ទិញឲ្យដោយគ្មានលក្ខខណ្ឌ ចង់ញ៉ាំអ្វីក៏ទិញឲ្យ ចង់ដើរលេងកន្លែងណា បែបណាក៏បានឲ្យតែកូនប្រាប់ ទោះបីជាឪពុកម្ដាយមិនមានលុយក៏ដោយប៉ុន្តែនឹងរកមកឲ្យកូនឲ្យបាន ដោយមិនព្រមបង្រៀនឲ្យកូនចេះអត់ធ្មត់ អត់ទ្រាំ ឬមិនបង្រៀនកូនឲ្យចេះសន្សំលុយ ឬរករបស់ទាំងនោះមកដោយកម្លាំងខ្លួនឯង។

២. ទិញរបស់ដែលខ្លួនធ្លាប់ប្រាថ្នាកាលពីក្មេងឲ្យកូន

ដោយសារយល់ថាខ្លួនឯងពីក្មេងលំបាក ចង់បានអ្វីជាច្រើនក៏មិនបានដូចចិត្ត ដូច្នេះពេលមានកូនឪពុកម្ដាយខ្លះក៏ទិញរបស់អស់ទាំងនោះឲ្យកូន ដោយមិនខ្វល់ថារបស់ទាំងនោះចាំបាច់ ឬមិនចាំបាច់សម្រាប់ក្មេងឡើយ។ ការធ្វើបែបនេះគឺជាការធ្វើបាបកូនទៅវិញទេ ព្រោះធ្វើឲ្យកូនក្លាយជាមនុស្សខ្ជះខ្ជាយ មិនចេះរកលុយ ចង់បានអ្វីក៏បាននោះ ស្រដៀងនឹងចំណុចទី១ខាងលើដែរ។

៣. ពេលកូនធ្វើខុសក៏មិនណែនាំ

ចំណុចនេះសំដៅលើឪពុកម្ដាយដែលកូនធ្វើខុសហើយក៏មិនណែនាំ មិនស្ដីមិនថា បែរជាឲ្យកូនធ្វើថែម ឬសើចដោយគិតថាជារឿងកំប្លែងទៅវិញនោះ រួមទាំងពេលលោកគ្រូអ្នកគ្រូណែនាំ ឬស្ដីបន្ទោសក៏មិនព្រមស៊ើបសួរដើម្បីដឹងរឿងពិតប្រាកដ តែបែរជាកាន់ជើងកូនជានិច្ច។ ធ្វើបែបនេះនឹងធ្វើឲ្យកូនធំឡើងក្លាយជាមនុស្សដែលមិនទទួលខុសត្រូវ មិនដឹងល្អអាក្រក់ ដែលជាបញ្ហាដ៏ធំសម្រាប់សង្គម។

៤. ធ្វើគ្រប់យ៉ាងជំនួសកូន ដោះស្រាយបញ្ហាជំនួសកូនគ្រប់យ៉ាង

ឪពុកម្ដាយខ្លះខំប្រឹងធ្វើកិច្ចការសាលាឲ្យកូន ជួយកែនេះកែនោះឲ្យកូនសព្វគ្រប់ ដោយសារខ្លាចកូនរៀនមិនជាប់ ឬមិនបានពិន្ទុខ្ពស់ ប៉ុន្តែទីបំផុតការធ្វើបែបនេះនឹងធ្វើឲ្យកូនក្លាយជាមនុស្សដែលមិនចេះធ្វើអ្វីទាំងអស់នៅពេលគ្មានម្ដាយឪពុក ៕

ចុចអាន៖

ប្រភព៖ kruvoice ប្រែសម្រួល៖ ស្វាយ វ៉ាន់ថន