ជីវិតអ្នកធ្វើការហត់ខ្លាំង ស្ត្រេសខ្លាំងគឺដោយសារហេតុផលធំៗ ៥យ៉ាងនេះ

2018-04-11 01:00:00
ចំនួនមតិ 0 | ចំនួនចែករំលែក 0

ជីវិតអ្នកធ្វើការការិយាល័យគឺពោរពេញទៅដោយការលំបាកជាច្រើន ជាពិសេសក្នុងសម័យបច្ចប្បន្នដែលមនុស្សម្នាក់ៗសុទ្ធតែមានភាពប្រញាប់ប្រញាល់ ក្រោកតាំងពីព្រឹក ចេញដំណើរទៅធ្វើការ ចូលប្រជុំមួយទៅមួយ គិតពី Project ធ្វើ Report រហូតដល់ម៉ោងចេញ គឺត្រូវស្ទះចរាចរណ៍ទៀតទម្រាំបានទៅដល់ផ្ទះ គឺព្រលប់រាល់ថ្ងៃ។ ក្នុងចន្លោះពេលនោះដែរ គឺមានរឿងនានាដែលកើតឡើងធ្វើឲ្យពួកគេហត់នឿយខ្លាំង ទាំងកាយទាំងចិត្ត។ តួយ៉ាងខាងក្រោមនេះ គឺជាកត្តាធំៗចំនួន ៥ដែលធ្វើឲ្យអ្នកធ្វើការការិយាល័យហត់នឿយខ្លាំងបំផុត រួមជាមួយវិធីដោះស្រាយងាយៗ៖

១. ហត់នឿយដោយសារគេងយប់ជ្រៅ ហើយក្រោកពីព្រឹក

មិនថាដោយសារតួនាទីការងារដែលតម្រូវឲ្យនៅអង្គុយធ្វើការរហូតដល់យប់ជ្រៅ ឬរវល់តាមដានរឿងភាគ លេងហ្វេសប៊ុកជ្រុលក៏ដោយ នៅពេលរាងកាយមិនបានទទួលការសម្រាកគ្រប់គ្រាន់ (យ៉ាងហោច ៦ម៉ោងក្នុងមួយថ្ងៃ សម្រាប់វ័យអ្នកធ្វើការ) នោះវានឹងជះឥទ្ធិពលធ្វើឲ្យរាងកាយមានអារម្មណ៍ខ្សោយ ងោកងុយ នៅពេលព្រឹកបន្ទាប់។ បើសិនមិនអាចជៀសវាងការចូលគេងយប់ជ្រៅបាន អ្នកត្រូវបម្រុងរាងកាយបន្ថែម ដោយការទទួលទានអាហារប្រភេទប្រូតេអ៊ីនពីសាច់សត្វ ទឹកដោះគោ ស៊ុត ឬអាហារដែលមានវីតាមីនស៊ី ក៏ជួយជំរុញឲ្យរាងកាយស្រស់ស្រាយឡើងដែរ។

២. ហត់នឿយដោយសារការធ្វើដំណើរ

អ្នកធ្វើការភាគច្រើនត្រូវចំណាយពេលចោលច្រើនម៉ោងក្នុងមួយថ្ងៃៗទៅលើការធ្វើដំណើរ។ អ្នកដែលជិះឡាន ម៉ូតូ ទៅធ្វើការរមែងរអ៊ូជារឿយៗពីរឿងស្ទះផ្លូវ ខណៈដែលអ្នកប្រើប្រាស់សេវាធ្វើដំណើរសាធារណៈ ក៏ត្រូវជួបបញ្ហាទៀតជាច្រើន ដូចជាមនុស្សចង្អៀត ស្ទះផ្លូវ រង់ចាំយូរ -ល-។ សាកល្បងដោះស្រាយបញ្ហានេះដោយការកំណត់ពេលចេញដំណើរមុនម៉ោងជាងមុនបន្តិច ដើម្បីឲ្យទៅដល់កន្លែងធ្វើការមុនម៉ោង នោះនឹងមិនសូវតក់ក្រហល់ពេលទៅដល់កន្លែងធ្វើការ និងអាចមានពេលសម្រាកច្រើន។

៣. ហត់នឿយដោយសារមនុស្ស

មនុស្សគឺជាបច្ច័យសំខាន់មួយដែលធ្វើឲ្យអ្នកធ្វើការមានអារម្មណ៍ហត់នឿយ អស់កម្លាំង។ មិនថាជាអ្នកដឹកនាំ ឬមិត្តរួមការងារ ដែលពិបាកធ្វើការជាមួយ ឬអ្នកដែលនាំរឿងឈឺក្បាលមកឲ្យយើងមួយថ្ងៃៗ បានធ្វើឲ្យមនុស្សជាច្រើនហត់ចិត្តរហូតមិនចង់ទៅធ្វើការ ឬចង់លាឈប់តែម្ដង។ ដូច្នេះហើយបើសិនមិនចង់ហត់នឿយជាមួយមនុស្សទាំងអស់នេះ ក្រៅពីគួរចៀសវាងរាប់អាន និងពាក់ព័ន្ធជាមួយពួកគេហើយ គឺយើងត្រូវសម្រួលការគិតរបស់យើងឲ្យងាកមកផ្លូវវិជ្ជមានឲ្យបានច្រើន ព្រមទទួលយកភាពខុសគ្នារបស់មនុស្សម្នាក់ៗ ហើយបំពេញតួនាទីរបស់ខ្លួនឲ្យបានល្អបំផុតគឺគ្រប់គ្រាន់ហើយ។

៤. ហត់នឿយដោយសារគ្មានតុល្យភាពរវាងជីវិត និងការងារ

អ្នកធ្វើការស៊ីប្រាក់ខែជាច្រើនអ្នកអាចនឹងជួបប្រទះបញ្ហាជីវិតផ្ទាល់ខ្លួន និងមានពេលវេលាជាមួយគ្រួសារកាន់តែតិច ដោយសារការចំណាយពេលច្រើនទៅលើការធ្វើដំណើរផង ព្រមទាំងត្រូវជួបបញ្ហាបន្ទាន់ៗផង ដែលភាគច្រើនធ្វើឲ្យពួកគេត្រូវធ្វើការលើសម៉ោងជានិច្ច។ បញ្ហាទាំងអស់នេះ អាចកើតពីការចាត់ចែងពេលវេលាមិនបានល្អ។ អ្នកគួរចែកឲ្យដាច់រវាងជីវិតផ្ទាល់ខ្លួន និងការធ្វើការ។ រកពេលវេលាឲ្យខ្លួនឯងសម្រាកខ្លះ ដើម្បីជីវិតមានថាមពលគ្រប់គ្រាន់។

៥. ហត់នឿយដោយសារខ្វះជាតិទឹក

អ្នកណាថាការអង្គុយធ្វើការនឹងតុក្នុងអូហ្វីស មានម៉ាស៊ីនត្រជាក់ មិនអាចធ្វើឲ្យមានអារម្មណ៍អស់កម្លាំង? បើទោះបីមិនបានបញ្ចេញញើសក៏ដោយ ប៉ុន្តែរាងកាយរបស់យើងគឺបាត់បង់ជាតិទឹកជានិច្ច។ ប្រសិនបើផឹកទឹកមិនបានគ្រប់គ្រាន់ទេ នោះនឹងធ្វើឲ្យយើងមានអារម្មណ៍អស់កម្លាំង។

រឿងហត់នឿយទាំងអស់នេះសុទ្ធតែជាអ្វីដែលយើងមិនអាចចៀសវាងបានក្នុងជីវិតការងារ ដូច្នេះយើងគួររកវិធីដោះស្រាយដូចបានរៀបរាប់ខាងលើ ឬបើត្រូវការអារម្មណ៍ស្រស់ស្រាយ អ្នកអាចសាកល្បងជ្រើសរើសភេសជ្ជៈពីផ្លែឈើនិងបន្លែមួយចំនួនដូចជាទឹកក្រូចស្រស់ ក្រូចឆ្មារ ការ៉ុត ប៉ោម ឬផាសិនក៏បាន ៕

ចុចអាន៖

អត្ថបទ៖ ស្វាយ វ៉ាន់ថន