ទង្វើតូចតាចរបស់ប៉ាប៉ា តែជួយឱ្យកូនក្នុងផ្ទៃលូតលាស់បានល្អ កើតមកឆ្លាត

2018-03-12 07:30:00
ចំនួនមតិ 0 | ចំនួនចែករំលែក 0

ការពរពោះនិងបង្កើតកូនគឺជាភារកិច្ចរបស់ប្រពន្ធ ប៉ុន្តែស្វាមីក៏ត្រូវមានតួនាទីសំខាន់ក្នុងការទំនុកបម្រុង និងថែទាំការលូតលាស់របស់កូននៅក្នុងផ្ទៃផងដែរ។ គ្រាន់តែទង្វើយកចិត្តទុកដាក់បន្តិចបន្តួច តែវាអាចនឹងមានផលល្អច្រើនលើសលប់ដល់សុខភាពទាំងផ្លូវកាយ និងផ្លូវចិត្តរបស់កូននិងប្រពន្ធបាន។

មិនដែលភ្លេចជូនប្រពន្ធទៅពិនិត្យផ្ទៃពោះឱ្យបានទៀងទាត់

ដំណាក់កាលសំខាន់ៗសម្រាប់ការពិនិត្យផ្ទៃពោះមានដូចជា ខែដំបូងបន្ទាប់ពីបាត់រដូវ សប្ដាហ៍ទី១១-១៤ សប្ដាហ៍ទី២១-២៤ និងសប្ដាហ៍ទី៣០-៣២។ ទាំងនេះគឺជាដំណាក់កាលដែលចាំបាច់ដែលត្រូវតាមដានការវិវត្តន៍របស់គភ៌ថាប្រក្រតី ឬមានអ្វីដែលត្រូវយកចិត្តទុកដាក់បន្ថែម។ ការដែលមានប្ដីទៅជាមួយ គឺជាភាពកក់ក្ដៅដែលស្ត្រីមានផ្ទៃពោះត្រូវការរាល់ពេលតាមដានសុខភាពកូន។ កាលណាម្ដាយមានសុខភាពផ្លូវអារម្មណ៍ល្អ កូនក្នុងផ្ទៃក៏អាចលូតលាស់បានល្អដូចគ្នា។

ចុចអាន៖ ស្វែងយកពីគភ៌ក្នុងផ្ទៃតាំងពីខែទី ១-៩ សម្រាប់អ្នកត្រៀមខ្លួនធ្វើជាម្ដាយឪពុកគេ

ម៉ាស្សា

ទន្ទឹមនឹងភាពរីករាយចំពោះការក្លាយជាម្ដាយឪពុកគេ ស្ត្រីក៏ត្រូវប្រឈមនឹងអាការៈឈឺចាប់មួយចំនួនក្នុងពេលកំពុងពរពោះ ដូចជាឈឺខ្នង ធុញថប់ រោគយឺតសរសៃឈាម រមួលក្រពើ ឬពិបាកបន្ទោបង់ជាដើម។ ការម៉ាស្សា គក់ច្របាច់ថ្នមៗ ដែលស្វាមីអាចផ្ដល់ឱ្យភរិយាជារៀងរាល់ថ្ងៃអាចជួយកាត់បន្ថយអារម្មណ៍តានតឹងនិងឈឺចាប់ទាំងនោះបានយ៉ាងច្រើន។

ថើបពោះប្រពន្ធ

យោងតាមអ្នកវិទ្យាសាស្ត្រជាច្រើនបានឱ្យដឹងថា ឪពុកដែលចូលចិត្តប្រឡែងលេង ថ្នាក់ថ្នមម្ដាយដោយការថើប ច្រៀងបំពេ ឬនិយាយពាក្យសម្ដីផ្អែមល្ហែមនឹងជួយឱ្យកូននៅក្នុងផ្ទៃទទួលបានការប្រាស្រ័យទាក់ទងនេះដោយផ្ទាល់ ហើយមានអារម្មណ៍ល្អ មិនក្រេវក្រោធ។ នេះគឺជាវិធីសាស្ត្រជួយក្នុងការរីកចម្រើនផ្នែក IQ របស់ទារកតាមរយៈសកម្មភាពរបស់ឪពុកម្ដាយនៅខាងក្រៅនេះហើយ។

មិនបង្អាប់សម្រស់ប្រពន្ធ

អំឡុងពេលមានផ្ទៃពោះ ស្ត្រីត្រូវជួបប្រទះការប្រែប្រួលរាងកាយដូចជា កើតមុន ស្បែកស្រអាប់ ឡើងទម្ងន់ ចេញសង្វារជាដើម។ ដូច្នេះអ្វីដែលបុរសគួរធ្វើគឺលើកទឹកចិត្តនាង មិនមែនបង្អាប់ ឬបង្ហាញភាពព្រងើយកន្តើយដោយសារតែការបាត់បង់សម្រស់របស់នាងនោះទេ។

ជួយការងារផ្ទះ

ពេលកំពុងពរពោះ នារីត្រូវជួបការលំបាកស្ទើរតែគ្រប់យ៉ាងដោយសារពោះចេះតែធំទៅ រូបរាងក៏ធាត់ជាងមុន ហេតុនេះស្វាមីគួរចេះចែករំលែកការងារផ្ទះដូចជា ការងារដែលត្រូវប្រើកម្លាំងធ្ងន់ បោកគក់ លាងចាន ធ្វើម្ហូប ដុសលាងរបស់របរផ្សេងៗដែលត្រូវប្រើសារជាតិគីមី ជាតិកាត់ជាដើម ព្រោះវាអាចប៉ះពាល់ដល់កូនក្នុងផ្ទៃ៕

ចុចអាន៖ គ្រោះថ្នាក់! ទឹកដោះគោកូនក្មេង៣ម៉ាក ក្រសួងសុខាភិបាលប្រកាសថាមានមេរោគឆ្លង

អត្ថបទ៖ សរ សុគន្ធី