ក្មេងធំឡើងក្នុងគ្រួសារ ៤ប្រភេទដែលប្រឈមមុខបរាជ័យក្នុងជីវិតច្រើនទៅអនាគត
- 2017-10-12 08:04:58
- ចំនួនមតិ 0 | ចំនួនចែករំលែក 0
ក្មេងធំឡើងក្នុងគ្រួសារ ៤ប្រភេទដែលប្រឈមមុខបរាជ័យក្នុងជីវិតច្រើនទៅអនាគត
ការសិក្សារបស់ក្រុមគ្រូពេទ្យចិត្តវិទ្យាបានបង្ហាញថា ក្មេងៗដែលឆ្លងកាត់ការចិញ្ចឹមបីបាច់ ៤យ៉ាងអាចប្រឈមមុខនឹងភាពបរាជ័យច្រើនបំផុតទៅអនាគត។ ថាតើ ៤យ៉ាងនោះមានអ្វីខ្លះ សូមតាមដានជាមួយ កញ្ញា ដូចតទៅ៖
១. កូនដែលធំឡើងដោយឪពុកម្ដាយយកចិត្តគ្រប់បែបយ៉ាង
ការធ្វើតាមចិត្តកូនគ្រប់យ៉ាង មិនដែលឲ្យកូនលំបាក ឬចាំជួយកូនរហូតមិនធ្លាប់ផ្ដល់ឱកាសឲ្យកូនបានជួយខ្លួនឯង ឬជួបភាពខកចិត្តខ្លះ នឹងធ្វើឲ្យពួកគេមិនស្គាល់តម្លៃពិតនៃជីវិត ក្លាយជាក្មេងដែលយកតែចិត្តខ្លួនឯង មិនចេះគ្រប់គ្រងអារម្មណ៍ ដែលធ្វើឲ្យមានបញ្ហាជាច្រើនតាមមកជាមួយ។
**២. កូនដែលធំឡើងជាមួយឪពុកម្ដាយដែលគ្មានវិន័យ**
ឪពុកម្ដាយដែលមិនអាចផ្ដល់គំរូល្អឲ្យកូនបានឃើញ ឬមិនអាចគ្រប់គ្រងកូនឲ្យរស់នៅមានរបៀបវិន័យបាន ព្រោះយល់ថា ការគ្រប់គ្រងឲ្យកូនមានវិន័យជាការធ្វើបាបកូន នឹងធ្វើឲ្យកូនងាយប្រឈមបរាជ័យទៅអនាគត ដោយសារការរស់នៅគ្មានច្បាប់ទម្លាប់ គ្មានគោលដៅក្នុងជីវិត និងមិនមានភាពអត់ធន់នឹងឧបសគ្គនានា។
៣. កូនដែលធំឡើងដោយខ្វះក្ដីស្រឡាញ់
ការតាមចិត្តកូន ហើយប្រាប់ថាស្រឡាញ់ ឬចិញ្ចឹមកូនដោយការផ្ដល់ប្រាក់ឲ្យគេចាយ គឺមិនអាចស្មើនឹងពេលវេលាដែលឪពុកម្ដាយផ្ដល់ឲ្យកូននោះទេ។ ក្មេងដែលខ្វះក្ដីស្រឡាញ់នឹងអាចមានអារម្មណ៍ក្រៀមក្រំច្រើន តូចចិត្ត គ្មានជំនឿចិត្ត ច្រណែនអ្នកដទៃ ហើយខ្លះធ្ងន់ធ្ងរដល់ថ្នាក់គិតខ្លីសម្លាប់ខ្លួនក៏មាន។
៤. កូនដែលធំឡើងក្នុងគ្រួសារខ្វះគុណធម៌
ចំណុចនេះសំខាន់ខ្លាំងណាស់។ ការស្រាវជ្រាវបង្ហាញថាក្មេងដែលកើតមកក្នុងគ្រួសារ ឬមានសមាជិកណាម្នាក់ក្នុងគ្រួសារដែលខ្វះគុណធម៌ សីលធម៌ នឹងអាចចាប់យកចរិតបែបនេះជាត្រីមុខ ដែលធ្វើឲ្យគេពិបាករស់នៅក្នុងសង្គម ឬឈានដល់ការធ្វើបាបយាយីអ្នកដទៃតាមរយៈការឆក់ ប្លន់ជាដើម។
ការបណ្ដាក់ទុនចិញ្ចឹមកូនដោយចេញពីចិត្ត ពិតជាសំខាន់ជាងការផ្ដល់មាសប្រាក់ ហើយក្រៅពីនេះ ការមានរបៀបវិន័យក៏ជារឿងសំខាន់ក្នុងគ្រួសារ។ ឪពុកម្ដាយត្រូវធ្វើជាគំរូល្អឲ្យកូនបានឃើញ នៅពេលនោះកូននឹងធំឡើងដោយមានស្មារតីល្អ និងមោទនភាពចំពោះខ្លួនឯង ហើយអនាគតរបស់គេនឹងរុងរឿងល្អ ៕