បើអាការគិតច្រើនតាមលងបន្លាចអ្នកញឹកញាប់ពេក ទាំងនេះហើយជាអ្វីដែលគួរធ្វើ

2018-02-21 08:43:00
ចំនួនមតិ 0 | ចំនួនចែករំលែក 0

បើទោះជាយើងមិនចង់ តែគ្មាននរណាម្នាក់អាចជៀសផុតពីអាការៈដ៏គួរឲ្យស្អប់មួយនេះបានឡើយ វាបានតាមលងបន្លាចមនុស្សគ្រប់គ្នាស្ទើរតែគ្រប់ពេល។ ប៉ុន្តែយើងក៏មិនអាចបណ្តែតបណ្តោយឲ្យអាការៈធម្មជាតិនេះគ្របដណ្តប់លើយើងទាំងស្រុងដែរ ព្រោះនៅថ្ងៃណាមួយយើងអាចនឹងប្រឈមគ្រោះថ្នាក់ខ្លាំងខាងផ្នែកផ្លូវចិត្ត។ ខាងក្រោមនេះជាអ្វីដែលគួរធ្វើ ប្រសិនបើការគិតច្រើនកំពុងវាយលុកក្នុងខួរក្បាលរបស់អ្នក៖

១. កុំធ្វើខ្លួនឲ្យនៅទំនេរ៖ អាចថាអ្នកប្រហែលជាមិនសូវមានការងារធ្វើច្រើនហើយ ទើបបានជាខួរក្បាលអាចគេចវេសទៅគិតរឿងផ្តេសផ្តាសបាន។ ប៉ុន្តែបើអ្នកព្យាយាមធ្វើការអ្វីផ្សេងដើម្បីឲ្យខ្លួនឯងរវល់ ការគិតច្រើនស្មុគស្មាញបែបនោះ ប្រហែលជានឹងរសាយមួយគ្រាដែរ។

រូបតំណាង

**២. ស្វែងរកការគិតបែបវិជ្ជមាន៖** ក្នុងលក្ខខណ្ឌការងារប្រចាំថ្ងៃ ច្បាស់ណាស់ថាយើងអាចជួបទាំងរឿងល្អនិងរឿងអាក្រក់ តែសម្រាប់អ្នកដែលឧស្សាហ៍មានទម្លាប់គិតច្រើនគួរតែធ្វើមិនដឹងមិនឮចំពោះការងារកំប៉ិកកំប៉ុកមួយចំនួនទៅ។ ចូរធ្វើរឿងដែលខ្លួនឯងពេញចិត្តហើយស្វែងរកការគិតបែបវិជ្ជមានមកដាក់ខួរក្បាលវិញ។

៣. ធ្វើឲ្យខ្លួនបាត់ភាពភ័យខ្លាច៖ មនុស្សមួយចំនួនដែលចូលចិត្តគិតច្រើន សុទ្ធតែបង្កប់ភាពភ័យខ្លាចនៅជាប់ខ្លួន។ អ្នកខ្លះខ្លាចព្រោះរឿងអតីតកាល ខ្លះខ្លាចបច្ចុប្បន្នភាពដែលមិនជោគជ័យ ខ្លះទៀតខ្លាចអនាគតដែលមិនទាន់មកដល់។ សម្រួមកាយចិត្តឲ្យល្អប្រសើរ ដើរលេងឲ្យសប្បាយចិត្ត ឈូសចោលអ្វីដែលសៅហ្មងចេញ ហើយរីករាយជាមួយអ្វីដែលខ្លួនកំពុងមាន។

រូបតំណាង

៤. កុំចាំតែល្អទើបធ្វើ៖ អ្នកខ្លះមានទម្លាប់គិតច្រើនព្រោះតែចង់ឲ្យការងារល្អគ្រប់ដប់ពេក ពួកគេរង់ចាំបណ្តើរគិតបណ្តើរដែលជាហេតុធ្វើឲ្យសម្ពាធកាន់តែមានច្រើន។

៥. ទុកពេលឲ្យខ្លួន៖ អ្នកអាចពិបាកចិត្តបាន គិតច្រើនចុះ តែសុំឲ្យមានពេលវេលាត្រឹមត្រូវ។ មិនមែនទោរទន់ទៅតាមចិត្តរហូតបាត់ភាពរឹងមាំអស់រលីងពីខ្លួនទេ ត្រូវកំណត់ថាក្នុងពេលណាមួយអ្នកត្រូវក្រោកឈរក្លាយជាខ្លួនឯងដូចពីមុនឡើងវិញ៕

ចុចអាន៖ចំណាយពេលធ្វើរឿងតិចតួចទាំងនេះរាល់ថ្ងៃ អ្នកនឹងមានអារម្មណ៍ថាជីវិតមានន័យ

ប្រភព៖ hackspirit ប្រែសម្រួល៖ អ៊ុង រ័ត្នបញ្ញា