ចូលឆ្នាំថ្មីៗ អពមង្គល ៣យ៉ាងហាមធ្វើដាច់ខាត បើចង់ឲ្យមាសប្រាក់ហូរចូលពេញមួយឆ្នាំ

2018-02-19 08:19:30
ចំនួនមតិ 0 | ចំនួនចែករំលែក 0

ចាប់ផ្ដើមឆ្នាំថ្មីតាមជំនឿជនជាតិចិន អ្នកមិនគួរបង្ហាញឲ្យឃើញពីភាពហ្មងសៅ ទុក្ខសោក ឬបង្ហូរទឹកភ្នែកអ្វីនោះទេ ព្រោះវាធ្វើឲ្យផ្លូវចិត្តរបស់យើងដក់ជាប់តែភាពទុក្ខសោកពេញមួយឆ្នាំ ជាពិសេសពាក្យថា ហត់នឿយ បាត់បង់ ឬគ្មានលុយ គឺនឹងធ្វើឲ្យឆ្នាំរបស់អ្នកហត់នឿយជាមួយអ្វីៗជាច្រើន បាត់បង់ច្រើនតាមនោះដែរ។ ដូច្នេះត្រូវឲ្យចិត្តគិតតែរឿងក្ដីសុខ សមបំណង និងភាពមានបានដែលនឹងកើតមានក្នុងឆ្នាំនោះ។ បើទោះបីអ្នកមានអារម្មណ៍មិនល្អ ក៏ត្រូវលាក់អារម្មណ៍មិនល្អទាំងនោះទុកសិន កុំបង្ហាញវាចេញមក ហើយព្យាយាមរំដោះវាចេញឲ្យបានលឿនបំផុត និងព្យាយាមធ្វើតាម ៣ចំណុចខាងក្រោមនេះ៖

១. កុំនិយាយពាក្យអពមង្គល

ពាក្យចាស់ថាសិរីសួស្ដីគឺនៅនឹងមាត់នេះហើយ ព្រោះពាក្យសម្ដីទាំងឡាយដែលចេញពីមាត់គឺអាចនាំមកទាំងការបង្កើត និងការបំផ្លាញ មិនថាជាពាក្យ ជាប្រយោគ ដូចជាពាក្យ ឈឺ ស្លាប់ រលំរលាយ ខ្មោច ព្រាយ ។ល។ គឺសុទ្ធតែពាក្យអវិជ្ជមាន ដែលនាំតែភាពអកុសល និងរាំងស្ទះដល់ភាពរីកចម្រើនថែមទៀត។ ដូច្នេះហើយបានជាពេលចូលឆ្នាំថ្មី គេច្រើនឮជនជាតិចិននិយាយតែពាក្យ ហេងៗ មានមាស មានប្រាក់ហូរចូល។

២. កុំគិតរឿងទុក្ខ

ប្រាកដណាស់ថាមនុស្សគ្រប់គ្នាសុទ្ធតែមានបញ្ហារៀងៗខ្លួនក្នុងជីវិត ហើយដែលសំខាន់នោះគឺបើចង់ឲ្យឈប់គិតពីបញ្ហាទាំងអស់នោះគឺពិតជាពិបាក ប៉ុន្តែកំឡុងពេលដើមឆ្នាំបែបនេះ អ្នកមិនគួរគិតដល់រឿងបញ្ហា ឬឧបសគ្គរាំងស្ទះ ព្រោះជនជាតិចិនជឿថាអ្នកដែលគិតបែបនេះនឹងអាចជួបប្រទះទាំងឧបសគ្គចាស់ និងឧបសគ្គថ្មីរហូតពេញមួយឆ្នាំ។ ជំនួសមកវិញ អ្នកគួរគិតតែរឿងល្អៗ មានក្ដីសង្ឃឹម តាំងចិត្ត និងការតស៊ូពុះពារទៅកាន់អនាគតភ្លឺស្វាង គិតថាខ្លួនឯងនឹងមានប្រាក់ មានជោគ មានលាភ នោះយើងនឹងមានកម្លាំងចិត្តកាន់តែច្រើនតាំងពីដើមឆ្នាំ។

៣. កុំកាត់ជោគ កាត់លាភ របស់ខ្លួនឯង

ចំណុចនេះគឺសំដៅលើការកាត់សក់ និងការប្រើកន្ត្រៃ ព្រោះជនជាតិចិនជឿថាការកាត់សក់ ឬកក់សក់ក្នុងកំឡុងពេលបុណ្យចូលឆ្នាំចិននឹងជាការជម្រះសំណាងល្អដែលត្រៀមចូលមកឲ្យចេញអស់ទៅវិញ។ ចំណែកការប្រើកន្ត្រៃម្ដងហើយម្ដងទៀតនៅថ្ងៃចូលឆ្នាំចិន ត្រូវបានគេជឿថាគឺជាការកាត់ជោគលាភដែលខ្លួននឹងទទួលបាន ៕