៤កំហុសឆ្គងក្នុងការផាត់មុខដែលធ្វើអ្នកមើលទៅកាន់តែចាស់ជាងមុន

2018-01-29 03:18:25
ចំនួនមតិ 0 | ចំនួនចែករំលែក 0

ការផាត់មុខគឺគន្លឹះដែលជួយឲ្យនារីគ្រប់រូបមើលទៅស្រស់ស្អាត ផូរផង់ជាងមុន ប្រសិនបើនារីនោះប៉ិនប្រសប់ក្នុងការប្រើប្រាស់វា។ យ៉ាងណាក្ដី ប្រសិនបើអ្នកគ្មានជំនាញច្បាស់លាស់ក្នុងការប្រើប្រាស់គ្រឿងសំអាងនោះទេ អ្នកអាចប្រឈមមុខនឹងកំហុសក្នុងការផាត់ទាំង៤ខាងក្រោមនេះ ដែលនឹងធ្វើឲ្យមុខរបស់យើងកាន់តែចាស់ជាងមុន។

១. ប្រើ Style ផាត់មុខតែមួយក្នុងរយៈពេលច្រើនឆ្នាំ

Style ផាត់មុខបែបភ្នែកខ្មៅដិតខ្លាំងគឺស័ក្ដិសមជាមួយនឹងនារីក្នុងវ័យ២០ប្លាយ ហើយនឹងលែងស័ក្ដិសមនៅពេលអ្នកមានអាយុ៤០ប្លាយ។ នៅពេលដែលយើងមានអាយុជ្រេទៅ ស្បែកយើងនឹងមិនស្រស់ថ្លាដូចមុនទេ ដូចនេះប្រសិនបើផាត់មុខដិតពេក វាកាន់តែបង្ហាញភាពចាស់ជរាលើស្បែកចេញក្រៅតែប៉ុណ្ណោះ។

២. ប្រើម្សៅបិទបាំងស្លាកស្នាមតែមួយប្រភេទ

ម្សៅបិទបាំងស្លាកស្នាមគឺមាន២ប្រភេទ នោះគឺមួយប្រើសម្រាប់បិទបាំងស្នាមស្លក់ក្រោមភ្នែក និងមួយទៀតបិទបាំងស្នាមដទៃទៀតនៅលើមុខ។ អ្នកមិនអាចយកម្សៅបិទបាំងស្នាមមុនមកលាបក្រោមភ្នែកនោះទេ ព្រោះសាច់ម្សៅវាក្រាស់ពេក ធ្វើឲ្យស្នាមជ្រួញក្រោមភ្នែកបង្ហាញចេញមកច្បាស់លើគោក។

៣. ប្រើគ្រឿងសំអាងខុសកន្លែង

ឧទាហរណ៍ដូចជា គូល័រថ្ពាល់គឺត្រូវប្រើនៅលើថ្ពាល់ តែដោយសារតែចង់មើលទៅប្លែក និងទាន់សម័យ អ្នកខ្លះបានលាបវាខ្ពស់រហូតដល់សៀតផ្កា។ ការផាត់មុខបែបនេះ នឹងធ្វើឲ្យមុខយើងផតខូងចូលក្នុង ចាស់មុនអាយុ។

៤. រើសម្សៅទ្រនាប់ខុស

នៅពេលអ្នកស្ថិតក្នុងវ័យយុវវ័យ ស្បែកអ្នកអាចនឹងបញ្ចេញជាតិខ្លាញ់លើសកម្រិតដែលធ្វើឲ្យអ្នកត្រូវប្រើប្រភេទម្សៅទ្រនាប់ស្ងួត ទប់ស្កាត់ជាតិខ្លាញ់។ យ៉ាងណាក្ដី នៅពេលឈានចូលវ័យកណ្ដាល ស្បែកយើងអាចនឹងមានជាតិខ្លាញ់តិច ឬគ្មានតែម្ដង ដូចនេះបើនៅតែបន្តប្រើម្សៅទ្រនាប់ប្រភេទនេះ ស្បែករបស់អ្នកនឹងត្រូវហួតហែងខ្វះជាតិទឹក បង្កឲ្យមានស្នាមជ្រួញមុនអាយុ៕

ចុចអាន៖

ប្រភព៖ Phunuonline ប្រែសម្រួល៖ Caramel