រឿងដែលស្រីៗគួរនិងមិនគួរធ្វើ ក្រោយមានអីៗជាមួយដៃគូកុំឱ្យមានគ្រោះថ្នាក់

2018-01-17 08:09:06
ចំនួនមតិ 0 | ចំនួនចែករំលែក 0

មានមតិចម្រូងចម្រាសគ្នាច្រើនមកហើយទាក់ទងនឹងថាតើក្រោយរួមភេទរួច នារីគួរនោមចេញឬក៏អត់? ខាងក្រោមនេះជាអ្វីដែលអ្នកជំនាញបានណែនាំសម្រាប់នារីដែលគួរធ្វើភ្លាមក្រោយរួមភេទ និងរឿងមិនគួរធ្វើដើម្បីកុំឱ្យប៉ះពាល់សុខភាព។

រឿងដែលគួរធ្វើក្រោយរួមភេទ

- ផឹកទឹកក្ដៅឧណ្ហៗ

ក្រោយពេលរួមដំណេក មិនត្រឹមតែខ្លួនប្រាណខាងក្រៅរបស់អ្នកទេដែលញាប់ញ័រដោយអារម្មណ៍ត្រេកត្រអាល ប៉ុន្តែសរីរាង្គខាងក្នុងក៏រញ្ជួយដូចគ្នា។ ដូចគ្នាដែរ ក្នុងអំឡុងពេលនិងក្រោយពីនេះ ប្រព័ន្ធរំលាយអាហារមិនទាន់ដំណើរការវិញបានស្រួលនៅឡើយទេ ដូច្នេះគួរផឹកទឹកក្ដៅឧណ្ហៗក្នុងសីតុណ្ហភាព៤០អង្សា ដើម្បីទៅជួយសម្រួលអារម្មណ៍មកវិញ និងជួយដល់ប្រព័ន្ធរំលាយអាហារផង។

- បត់ជើងតូច

បន្ទាប់ពីដុតបំផ្លាញកាឡូរីជាច្រើនក្នុងភ្លើងស្នេហារួចមក គូស្នេហ៍តែងមានអារម្មណ៍អស់កម្លាំងល្ហិតល្ហៃ ចង់គេងភ្លាមៗ។ ប៉ុន្តែអ្នកជំនាញបានណែនាំថា វាមិនមែនជាការល្អនោះទេ ព្រោះក្រោយរួមភេទ៥ទៅ១០នាទី នារីគួរទៅបន្ទប់ទឹកនោមចេញ និងលាងសម្អាតទ្វារមាសដើម្បីកម្ចាត់បាក់តេរីពីខាងក្នុង។ ហេតុផលសំខាន់គឺ ដើម្បីការពារការឆ្លងមេរោគចូលទៅក្នុងតម្រង់នោម បើសិនទុករយៈពេលយូរពេក ប៉ុន្តែក៏មិនមែនត្រូវតែក្រោកភ្លាមៗក្រោយបញ្ចប់ការរួមភេទដែរ នារីៗអាចសម្រាកមួយសន្ទុះដើម្បីឱ្យបាត់ហត់ សឹមងើបទៅលាងសម្អាតចេញក៏បាន។

- គេងឱបគ្នា

អ្នកជំនាញផ្លូវភេទបានណែនាំថា គូស្នេហ៍គួរនៅគេងឱបគ្នា និងថើបគ្នាដើម្បីផ្ដល់ភាពកក់ក្ដៅបន្ថែមបន្ទាប់ពីបានចំណាយកម្លាំងដ៏ពុះកញ្ជ្រោលមុននេះ។ អ្នកទាំងពីរអាចថើបថ្ងាស ឬថ្ពាល់ថើៗ យកដៃច្រូងសក់ថ្នមៗ និងនិយាយពាក្យផ្អែមល្ហែមដាក់គ្នា។ ធ្វើបែបនេះវាអាចជួយបង្កើនចំណងស្នេហ៍កាន់តែរឹងមាំ និងបំបាត់អារម្មណ៍ឈឺចាប់ ឬហត់នឿយបាន។

- ផ្ដល់ភាពកក់ក្ដៅដល់ខ្លួនឯង

កុំបណ្ដោយឱ្យខ្លួនអ្នកត្រូវកម្ដៅ ឬត្រូវចំហាយម៉ាស៊ីនត្រជាក់ខ្លាំងពេក ក្រោយបញ្ចប់ការរួមភេទ។ វាអាចធ្វើឱ្យអ្នកទៅជាគ្រុនឬផ្ដាសាយ។ គួរដណ្ដប់ភួយឱ្យបានជិត ឬស្លៀកពាក់វិញកុំឱ្យត្រូវខ្យល់។

- ហាត់ប្រាណផ្នែកចង្កេះចុះក្រោម

ធម្មតាការរួមភេទអាចជួយឱ្យដៃគូគេងលក់ស្រួល ប៉ុន្តែបើនារីៗបែរជាមិនមានអារម្មណ៍ងងុយគេង អ្នកគួរធ្វើលំហាត់ប្រាណផ្នែកចង្កេះចុះក្រោម ដោយគេងផ្ងារហើយបញ្ឈរជង្គង់រួចបង្ហើបគូទចុះៗវឡើងមួយសន្ទុះសិន។ ក្រោយរួមភេទ ស្បូនរបស់ស្ត្រីក៏ធ្វើចលនាដែរ ដូច្នេះការហាត់ប្រាណបែបនេះអាចជួយទៅរម្ងាប់ចលនារបស់ស្បូនឱ្យត្រលប់មករកសភាពដើមវិញ និងមានអារម្មណ៍ស្រាកស្រាន្តបាន។

រឿងដែលមិនគួរធ្វើ

- ងូតទឹកភ្លាម

មនុស្សភាគច្រើនតែងមានអារម្មណ៍ស្អិតខ្លួន ហើយក៏ប្រញាប់ទៅងូតទឹកចេញភ្លាម។ ប៉ុន្តែការធ្វើបែបនេះអាចនឹងមានគ្រោះថ្នាក់ ព្រោះរាងកាយរបស់អ្នកកំពុងតែឡើងកម្ដៅ ហើយការងូតទឹកនឹងចូលទៅផ្លាស់ប្ដូរកម្ដៅក្នុងរាងកាយភ្លាមៗ ដែលអាចប៉ះពាល់ដល់សរសៃឈាមទៅជាស្ទះសរសៃឈាមក៏ថាបាន ចំណែកចង្វាក់បេះដូងក៏អាចលោតខុសធម្មតាបាន។ មួយវិញទៀត ហាមទៅអង្គុយមុខកង្ហារភ្លាមៗ ព្រោះវានឹងធ្វើឱ្យអ្នកស្រៀវរងា ធ្វើឱ្យរាងកាយកាន់តែអស់កម្លាំង។

- គេងលក់មិនខ្វល់ពីដៃគូ

ការគេងភ្លាមក្រោយបង្កាត់ភ្លើងស្នេហ៍រួចដោយមិនខ្វល់ពីដៃគូ គឺជារឿងអាត្មានិយមបំផុត។ អ្នកអាចនឹងធ្វើឱ្យភាគីម្ខាងទៀតអន់ចិត្ត។ ដូចបានរៀបរាប់នៅចំណុចខាងលើ គួរចំណាយពេលយ៉ាងហោចណាស់១០នាទីឱបក្រសោប ផ្ដល់ភាពកក់ក្ដៅដល់គ្នាទៅវិញទៅមក។

- រិះគន់ពីសមត្ថភាពផ្លូវភេទរបស់ភាគីម្ខាងទៀត

បើទោះបីអ្នកជាអ្នកប៉ិនប្រសប់រឿងលើគ្រែក៏ដោយ មិនគួរយកសមត្ថភាពផ្លូវភេទរបស់ដៃគូមកវែកញែកភ្លាមក្រោយបញ្ចប់ការប្រយុទ្ធរួមគ្នានោះទេ ព្រោះវាអាចប៉ះពាល់ផ្លូវចិត្តរបស់ម្ខាងទៀត ហើយបើធ្វើវាញឹកញយអាចបណ្ដាលឱ្យទៅជាជំងឺបាក់ទឹកចិត្តបាន៕

ចុចអាន៖

ប្រភព៖ bestie ប្រែសម្រួល៖ សរ សុគន្ធី