ស្រឡាញ់ប្រុសត្រូវចេះមើលមនុស្សប្រុស! បុរសស្រឡាញ់ស្មោះត្រូវមាន 3P នេះចាំបាច់

2018-01-03 06:21:12
ចំនួនមតិ 0 | ចំនួនចែករំលែក 0

អ្វីដែលគួរឲ្យស្ដាយបំផុតក្នុងលោកនេះគឺ ការដែលមនុស្សស្រីមើលមិនឃើញតម្លៃរបស់ខ្លួនឯង ដោយគិតថាខ្លួនត្រូវតែ “ព្រម” ដើម្បីឲ្យមនុស្សប្រុសស្រឡាញ់ ព្រមធ្វើគ្រប់យ៉ាង ទាំងកាយទាំងចិត្ត ហើយធ្ងន់ធ្ងរបំផុតនោះគឺ មនុស្សស្រីមួយចំនួនសុខចិត្តបោះបង់ជំហររបស់ខ្លួនឯង បោះបង់ក្ដីស្រឡាញ់ ចំណង់ចំណូលចិត្ត និងក្ដីស្រមៃទាំងឡាយ ដើម្បីមនុស្សប្រុសដែលខ្លួនស្រឡាញ់ ដែលរឿងទាំងអស់នេះ បើបុរសស្រឡាញ់យើងពិតនឹងមិនទាមទារឲ្យយើងធ្វើនោះទេ។ មនុស្សប្រុសដែលស្រឡាញ់យើងពិត...

នឹងមិនធ្វើ ឲ្យយើងបាត់បង់ភាពជាខ្លួនឯង

នឹងមិនធ្វើ ឲ្យយើងបាត់បង់កិត្តិយស

នឹងមិន ប្រមាថភាពជាមនុស្សស្រីរបស់យើង

រូបតំណាង

មាន ៣យ៉ាងដែលអាចប្រាប់បានយ៉ាងងាយ ថាមនុស្សប្រុសម្នាក់នោះ មានភាពប្រាកដប្រជាកម្រិតណាក្នុងទំនាក់ទំនងស្នេហាជាមួយយើង ដែល ៣យ៉ាងនេះយើងអាចនិយាយខ្លីថា 3 P’s រួមមាន៖

1. Protect

2. Profess

3. Provide

ទង្វើទាំង ៣នេះមានន័យថា៖

១. Protect ស្រឡាញ់ពិត ត្រូវអាចការពារ ទាំងរាងកាយ ផ្លូវចិត្ត និងកិត្តិយសរបស់យើង។ មនុស្សប្រុសមួយចំនួន មិនត្រឹមតែមិនការពារយើងពីអ្នកដទៃនោះទេ ប៉ុន្តែថែមទាំងធ្វើឲ្យយើងមានអារម្មណ៍ថាត្រូវការពារខ្លួនឯងពីគេទៀត។ តើនេះហៅថាស្នេហ៍ពិតយ៉ាងម៉េចទៅ?

២. Profess នោះគឺ ត្រៀមខ្លួនជានិច្ចក្នុងការប្រកាសប្រាប់ពិភពលោកថា យើងគឺជាសង្សារ ជាគូដណ្ដឹង ឬជាប្រពន្ធរបស់គេ ទៅតាមការឯកភាពរបស់ភាគីទាំងសងខាង។ ដូច្នេះមនុស្សប្រុសណាដែលលាក់ទុកយើងក្នុងកន្លែងមួយងងឹត មិនព្រមចេញមុខចេញមាត់ ប្រាប់មិត្តភ័ក្ដិ សុំស្រឡាញ់យូរហើយនៅតែសុំរក្សាជាការសម្ងាត់... មិនបាច់ស្វែងរកហេតុផលការពារគេច្រើនទេ បើគេលាក់ទុកយើងបែបនេះ មានន័យថាគេមិនស្រឡាញ់យើងពិតប្រាកដហើយ។ សូមកុំពន្លិចជីវិតដ៏មានតម្លៃរបស់យើង ជាមួយមនុស្សប្រុសដែលមិនមើលឃើញតម្លៃរបស់យើង ដែលអាចឲ្យគេប្រកាសប្រាប់គ្រប់គ្នាថា “នេះគឺជាមនុស្សស្រីរបស់ខ្ញុំ”។

រូបតំណាង

៣. Provide គឺផ្ដល់ ផ្ដល់ក្ដីស្រឡាញ់ ភាពកក់ក្ដៅ ពេលវេលា ទ្រព្យសម្បត្តិ។ល។ មនុស្សប្រុសដែលស្រឡាញ់យើងពិត ប្រាកដជាមិនកំណាញ់សូញសាញជាមួយយើងឡើយ សម្រាប់រឿងធម្មតា និងសមស្របតាមលទ្ធភាពរបស់គេ។ សង្កេតបានងាយៗ ប្រសិនបើ date ម្ដងណាក៏ទាមទារឲ្យយើងចេញលុយ 50/50 នោះ ភាគច្រើនគឺប្រាកដជាទុកយើងត្រឹមជាជម្រើសមួយរបស់គេប៉ុណ្ណោះ ព្រោះមនុស្សប្រុសដែលស្រឡាញ់យើងពិត ទោះបីក្រយ៉ាងណា ក៏ចង់បង្ហាញពីភាពជាកូនប្រុសដោយការមើលថែយើងគ្រប់សព្វ សុខចិត្តមិនទៅកន្លែងថ្លៃ ប៉ុន្តែមិនចង់ឲ្យខាងស្រីចាយលុយនោះទេ។

វាជារឿងល្អដែលយើងអាចរកបានមនុស្សដែលខ្លួនស្រឡាញ់ រៀបការ កសាងគ្រួសារមួយដែលមានគុណភាព ប៉ុន្តែវាមិនត្រឹមត្រូវសោះឡើយ បើមានសង្សារដើម្បីតែមាន ឬមានហើយលំបាកជាងនៅខ្លួនមួយទៅទៀត។ បើបែបនេះមិនបាច់មានក៏បាន តែបើមនុស្សប្រុសម្នាក់នោះបានពិសោធន៍ឲ្យអ្នកមើលឃើញហើយថាគេមាន “តម្លៃគ្រប់គ្រាន់” សឹមពិចារណា មើលចិត្តឲ្យបានយូរ យ៉ាងហោចលើសពីមួយឆ្នាំ សឹមសម្រេចចិត្តបន្ត ព្រោះមនុស្សយើងភាគច្រើនលាក់ធាតុពិតរបស់ខ្លួនឯងមិនបានលើសពីមួយឆ្នាំទេ ៕

ចុចអាន៖

ប្រភព៖ Mthai ប្រែសម្រួល៖ ស្វាយ វ៉ាន់ថន