មូលហេតុជាច្រើនដែលធ្វើឲ្យ មនុស្សស្រីមានអារម្មណ៍ឯកោ

2017-04-26 09:07:45
ចំនួនមតិ 0 | ចំនួនចែករំលែក 0

ពេលខ្លះសំណួរលេចឡើងក្នុងខួរក្បាល «ហេតុអ្វីខ្លុំឯកោម្ល៉េះ?» «ហេតុអ្វីបានជាជីវិតទៅជាយ៉ាងនេះ?» ប៉ុន្តែយើងបែរជារកចម្លើយដ៏ពេញចិត្តមួយមិនឃើញទៅវិញ។ ចំណុចខាងក្រោមនេះអាចជាមូលហេតុដែលធ្វើឲ្យអ្នកមានអារម្មណ៍បែបនេះ៖

១. បាក់ទឹកចិត្ត៖ ពេលកើតទុក្ខ យើងពិបាកមើលឃើញពីអ្វីៗដែលនៅជុំវិញខ្លួនណាស់មិនថាមានមនុស្សប៉ុន្មាននាក់នោះទេ។ វាជាកត្តាជំរុញសំខាន់បំផុតទៅរកអារម្មណ៍ឯកោ។

២. បំភ្លេចអតីតកាលមិនបាន៖ គឺប្រវត្តិដែលធ្លាប់ឈឺចាប់។ វាជាសញ្ញាថាយើងកំពុងរស់នៅក្រោមស្រមោលនៃអតីតកាលដែលធ្វើឲ្យអារម្មណ៍មិនសប្បាយសោះ។ បើអាច គួរបំភ្លេចវាឲ្យបាន។

៣. មិនស្គាល់ខ្លួនឯង៖ ជួនកាលយើងភ្ញាក់មកជាមួយភាពមិនច្បាស់លាស់ក្នុងជីវិតថាខ្លួនឯងចង់បានអ្វី? នេះជាកត្តានាំទៅរកអារម្មណ៍កណ្ដោចកណ្ដែង។ យើងមិនស្គាល់ខ្លួនឯងថែមទាំងមិនស្គាល់ចំណុចខ្លាំងរបស់ខ្លួនទៀតផង។

៤. មិនបានបំពេញតាមក្ដីប្រាថ្នា៖ គឺការបន្ទោសខ្លួនឯងនោះឯងពេលមិនអាចសម្រេចបំណងបាន។ បើអ្នកកំពុងស្ថិតក្នុងស្ថានភាពបែបនេះ វាដល់ពេលហើយដែលត្រូវបោះបង់វាចោល ហើយធ្វើជាខ្លួនឯង រស់ឲ្យសប្បាយ។

៥. មានអារម្មណ៍ថាបានធ្វើកំហុស៖ បើយើងសម្លឹងតែផ្លូវអាក្រក់ ហើយបន្ទោសខ្លួនរហូតយើងគ្មានពេលមើលឃើញទង្វើល្អរបស់អ្នកដទៃដែលធ្វើមកលើយើងទេ។

៦. ខ្លាចជ្រុល៖ ឧទាហរណ៍ដូចជារឿងស្នេហា។ ដោយសារកំហុសពីមុន យើងក៏មិនហ៊ានប្រឈមនឹងវាទៀតរហូតមិនហ៊ានឲ្យនរណាម្នាក់ចូលមកជីវិតយើងតែម្ដង។

៧. ញៀននឹងបណ្ដាញសង្គម៖ វាកំពុងទាញជីវិតយើងចេញពីពិភពពិតបន្តិចម្ដងៗដោយមិនដឹងខ្លួន។ ពេលឃើញគេជប់លៀង ដើរលេង ឬធ្វើអ្វីផ្សេងៗសប្បាយៗ យើងក៏ចាប់ផ្ដើមប្រៀបធៀបមកជីវិតខ្លួនឯងទាំងដែលយើងភ្លេចថាគ្មាននរណាបង្ហាញរូបពេលគេបរាជ័យ ឬឯកោនោះទេ។

ដូចនេះ បើមានអារម្មណ៍ឯកោ មានតែខ្លួនយើងទេដែលអាចដោះស្រាយបញ្ហានោះដោយខ្លួនឯងបាន។ គួរឈប់សួរខ្លួនឯង ហើយរស់នៅក្នុងពិភពពិតមួយដែលរីករាយ និងព្យាយាមមើលអ្វីៗក្នុងផ្លូវវិជ្ជមានជានិច្ច៕