បទពិសោធន៍កូនប្រសាស្រី ៨ រូបដែលធ្វើឲ្យឪពុកម្ដាយក្មេកស្រលាញ់ជាងកូនបង្កើតទៅទៀត

2017-03-06 04:21:39
ចំនួនមតិ 0 | ចំនួនចែករំលែក 0

ស្រីៗពេលរៀបការរួច តែងព្រួយបារម្ភពីទំនាក់ទំនងខ្លួនជាមួយឪពុកម្ដាយក្មេក ព្រោះមិនធ្លាប់រស់នៅជាមួយ ឬដឹងចិត្តពួកគាត់។ ដូចនេះស្រីៗយើងគួររៀនសូត្រពីអ្នកមានបទពិសោធន៍ទាំង ៨ រូបខាងក្រោម ដើម្បីធ្វើឲ្យឪពុកម្ដាយក្មេកស្រលាញ់៖

សុម៉ាលី៖ «អ្វីដែលធ្វើឲ្យបងយកឈ្នះចិត្តម្ដាយក្មេកបងបាន គឺការបំពេញកិច្ចការជាកូនប្រសាល្អ។ អូនដូចដឹងស្រាប់ហើយខ្មែរយើងឲ្យតម្លៃលើកូនប្រសាស្រីណាដែលបំពេញការងារក្នុងផ្ទះបានល្អ ហើយបើទោះជាបងមានការងារធ្វើក្រៅផ្ទះហត់នឿយយ៉ាងណាក៏ដោយ ពេលចូលមកដល់ក្នុងផ្ទះភ្លាមបងត្រូវបំពេញភារកិច្ចជាកូនប្រសា, ជាប្រពន្ធ, ជាម្ដាយ ព្រោះចាស់ៗស្រលាញ់កូនប្រសាស្រីដែលចេះរៀបចំទុកដាក់ផ្ទះសំបែង»។

សុខទៀង៖ «ជីវិតពិតមិនដូចក្នុងរឿងភាគទូរទស្សន៍ទេ មិនប្រាកដថាឪពុកម្ដាយក្មេកទាំងអស់សុទ្ធតែស្រួល ឬពិបាកឡើយ។ ធ្វើខ្លួនធម្មតាៗដូចពេលនៅជាមួយឪពុកម្ដាយយើងទៅ ហើយជៀសវាងធ្វើរឿងដែលពួកគាត់មិនចូលចិត្ត។ ម្យ៉ាងទៀតត្រូវចេះជួយកិច្ចការគាត់ ទោះជាគាត់មិនប្រើក៏ដោយ»។

រូបតំណាង

**វិច្ឆិកា**៖ «ឪពុកម្ដាយក្មេក មិនដូចឪពុកម្ដាយបង្កើតយើងទេអូន ដូចនេះត្រូវតែយកចិត្តតិចហើយ។ មុនរៀបការយើងត្រូវដឹងឲ្យច្បាស់ពីពួកគាត់ជាមុនសិន ទើបការរួចគ្មានភាពរកាំរកូសគ្នា។ ក្នុងនាមយើងជាកូនប្រសាស្រីត្រូវដឹងថាពួកគាត់ចូលចិត្ត ឬមិនចូលចិត្តញ៉ាំម្ហូបអ្វី, ពណ៌អ្វី, កាយវិការ ឬការនិយាយស្ដីបែបណាខ្លះ ចឹងទើបធ្វើមិនខុសចិត្តគាត់»។

ស្រីអូន៖ «បើចំពោះប៉ាម៉ាក់ក្មេកខ្ញុំគាត់ជាមនុស្សស្រួលណាស់ ពួកគាត់អត់ចេះមើលបំណាំកូនប្រសាស្រីទេ។ ពួកយើងធ្វើធម្មតាៗ មិនបាច់រៀបឫកពាទេ ហើយកុំធ្វើជាមនុស្សនៅមុខគាត់ធ្វើផ្សេង ក្រោយខ្នងធ្វើផ្សឹងទៅបានហើយ ព្រោះពួកគាត់ចាស់ៗគាត់អាចមើលធ្លុះពីអត្តចរិតមនុស្សបាន»។

ស្រីម៉ុច៖ «វិធីធ្វើឲ្យម៉ាក់ប៉ាក្មេកបងស្រលាញ់គឺងាយបំផុត បង្កើតកូនឲ្យច្រើនៗដើម្បីឲ្យគាត់បានមើលប្រឡែងលេងជាការស្រេច។ ពួកគាត់ចាស់ៗអស់ហើយ ហើយមានកូនប្រុសតែមួយទៀត ហើយកូនស្រីពីនាក់ទៀតនៅបរទេស ចឹងពួកគាត់នៅផ្ទះអផ្សុកណាស់ ពេលមានចៅពរចឹងទៅគ្មានត្អូញអីម៉ាតិចទេ មានតែឲ្យសុំឲ្យបងយកកូនពីរ បីនាក់ទៀតទៅ»។

សុខា៖ «ការពិតខ្ញុំជាមនុស្សនិយាយលេងសើចច្រើន ហើយពូកែងក់ងរជាមួយប្ដីណាស់។ តែនៅចំពោះមុខប៉ាក្មេក ខ្ញុំមិនដែលធ្វើចារិកអស់ទាំងនេះមកឲ្យឃើញឡើយ ធ្វើសុភាពៗទៅ។ ធ្វើបែបនេះអាចថាខ្ញុំជាមនុស្សរៀបឫកពាក៏ថា តែក្នុងនាមកូនប្រសាស្រីត្រូវដឹងថាចាស់ៗចូលចិត្តអ្នកសុភាពៗ»។

សម្ផស្ស៖ «ក្នុងនាមជាកូនប្រសាស្រីមិនមែនជារឿងងាយស្រួលឡើយអូន សម្រាប់បងវិធីដែលធ្វើឲ្យពួកគាត់ស្រលាញ់បងបាន គឺភាពតស៊ូអត់ធ្មត់ ពុះពារកិច្ចការសព្វបែបសព្វយ៉ាង។ ម្យ៉ាងទៀតបើគាត់ស្ដីបន្ទោសរឿងអ្វីមួយត្រូវខាំមាត់សង្កត់ចិត្ត មិនតតាំងតបវិញទ្រាំទទួលយកទាំងខ្លួនមិនខុស»។

រតនា៖ «ចង់ឲ្យគ្រួសារសុខសាន្ត គឺយើងជាកូនប្រសាស្រីនេះឯងត្រូវចុះសម្រុងជាមួយឪពុកម្ដាយក្មេក។ វិធីដែលធ្វើឲ្យម៉ាក់ក្មេកខ្ញុំស្រលាញ់គឺភាពរឹងមាំ។ ទោះជាមានរឿងអ្វីក៏ខ្ញុំមិនងាយសុំជំនួសពីប្ដី ឬនរណាទាំងអស់ បង្ហាញពីភាពខ្លាំងឲ្យសាច់ញាតិគាត់ឃើញថា យើងពិតជាមានសមត្ថភាព»៕

ចុះមិត្តៗស្រ្តីដទៃទៀតមានវិធីអ្វីផ្សេងអត់?

អត្ថបទ៖ ទ្រី រ៉ាវី