សញ្ញាទាំង ៩ ដែលជីវិតប្ដីប្រពន្ធអាចឈានដល់ការលែងលះ

2017-02-06 04:45:41
ចំនួនមតិ 0 | ចំនួនចែករំលែក 0

មនុស្សស្រីមិនប្រាថ្នាអ្វីក្រៅពីសេចក្ដីសុខក្នុងរង្វង់ក្រុមគ្រួសារដែលមានប្ដីប្រពន្ធចេះស្រលាញ់គ្នា និងមានកូនៗដើរតាមដំបូន្មានរបស់ឪពុកម្ដាយឡើយ។ មិនខុសពីពាក្យចាស់តែងពោលថាចានក្នុងរាវតែងមានការប៉ះទង្គិចយ៉ាងណាមិញជីវិតប្ដីប្រពន្ធក៏ដូចគ្នាដែរ តែបើមានសញ្ញាទាំង៩ខាងក្រោមនេះ បញ្ជាក់ជីវិតប្ដីប្រពន្ធអាចឈានដល់ផ្លូវបំបែក៖

១ គាត់មិនខ្វល់ពីអារម្មណ៍របស់អ្នក៖ នេះមានន័យថាគាត់មិនចាប់អារម្មណ៍នឹងអ្នកទៀតឡើយ គាត់នឹងមិនខ្វាយខ្វល់អំពីអ្នកថា តើអ្នកពេញចិត្តនឹងទង្វើដែលគាត់ធ្វើឬក៏អត់នោះដែរ។ ពេលខ្លះគាត់ដឹងថាអ្នកមិនចូលចិត្តឱ្យគាត់ធ្វើបែបនេះឡើយប៉ុន្តែគាត់នៅតែមានះធ្វើដដែល។

២ គាត់លែងព្យាយាមដោះស្រាយវិវាទ៖ កាលពីមុននៅពេលដែលអ្នកទាំងពីរកំពុងតែស្រលាញ់គ្នាល្អូកល្អឺន គឺគាត់ព្យាយាមធ្វើយ៉ាងណាឱ្យអ្នកសប្បាយចិត្ត នៅពេលដែលអ្នកខឹង គាត់នឹងព្យាយាមលួងលោមអ្នក អង្វរកឱ្យអ្នកឈប់ខឹងនឹងគាត់ ប៉ុន្តែនៅពេលដែលស្នេហាអ្នកទាំងពីរដល់ពេលប្រកាសអាសន្ន គាត់នឹងលែងធ្វើអ្វីទាំងអស់។

៣ គាត់តែងធ្វើឱ្យអ្នកបាក់ទឹកចិត្ត៖ គាត់នឹងលែងលើកទឹកចិត្តអ្នក លើកសរសើរអ្នក និងជួយជម្រុញអ្នកទៀតឡើយ។ ទាំងគោលដៅ មហិច្ចតា និងការគិតរបស់អ្នកគឺលែងជាការចាប់អារម្មណ៍របស់គាត់ទៀតហើយ។ គាត់តែងបំបាក់ទឹកចិត្តអ្នកដោយពាក្យសម្ដីនិងការបង្ហាញចេញនូវកាយវិការផងដែរ។

៤ គាត់តែងទៅកម្សាន្តនៅខាងក្រៅដោយគ្មានវត្តមានរបស់អ្នក៖ គាត់លែងមានអារម្មណ៍ល្អក្នុងការចេញទៅកម្សាន្តនៅខាងក្រៅជាមួយអ្នក គាត់លែងគិតគូអំពីអ្នក នេះអាចមកពីគាត់តែងមានអារម្មណ៍មិនល្អនៅពេលនៅក្បែរអ្នក។ គាត់តែងទុកអ្នកចោលនៅផ្ទះម្នាក់ឯង ឬជាមួយកូនៗ ហើយគាត់ទៅក្រៅសប្បាយជាមួយមិត្តភ័ក្ដិ ឬមនុស្សស្រីផ្សេងក៏ថាបាន។

៥ អ្នកទាំងពីរតែងឈ្លោះគ្នាដោយសាររឿងតូចតាចបំផុត៖ ការចេះអត់អោនអធ្យាស្រ័យឱ្យគ្នាទៅវិញទៅមកគឺជាការប្រសើរ ប៉ុន្តែជាធម្មតាមនុស្សតែអស់ការស្រលាញ់ពេញចិត្តហើយ ធ្វើអ្វីក៏មិនត្រូវចិត្តនោះដែរ។ ពេលខ្លះរឿងតូចតាចដែលមិនគួរឱ្យខឹងសម្បារសោះក៏អ្នកទាំងពីរលើកយកមកឈ្លោះប្រកែកគ្នាដែរ។

៦ គាត់លែងចង់និយាយជាមួយអ្នក៖ មនុស្សនៅពេលដែលអស់ចិត្តស្រលាញ់ សូម្បីតែមុខក៏មិនចង់មើលដែរកុំថាឡើយតែនិយាយជាមួយទៀតនោះ។ ពេលខ្លះការដែលនៅតែបណ្ដោយឱ្យការមិននិយាយរកគ្នានេះកាន់តែយូរនោះទំនាក់ទំនងរបស់អ្នកទាំងពីរនឹងកាន់តែខ្សោះកក្រោះនិងកាន់តែឆ្ងាយពីគ្នា។

៧ គាត់តែងខឹងគ្មានក្បាលគ្មានកន្ទុយ៖ គាត់តែងមានអារម្មណ៍ខឹងសម្បារ និងមួមៅ បើទោះជាអ្នកមិនបានធ្វើអ្វីខុសក៏ដោយ។ គាត់ទើសភ្នែករាល់គ្រប់ទង្វើដែលអ្នកបានធ្វើ។ ពេលខ្លះអ្នកខំធ្វើល្អដើម្បីយកចិត្តគាត់ ក៏គាត់មិនពេញចិត្ត ហើយបែរជាធុញទ្រាន់នឹងអ្នកទៅវិញ។

៨ អ្នកលែងចង់ចូលផ្ទះ៖ គ្រួសារមួយដែលប្រកបដោយភាពរីករាយ មិនថាអ្នកណាក៏ដូចអ្នកណាដែរតែងបន់ឱ្យតែឆាប់ដល់ម៉ោងចេញពីផ្ទះ នឹងអាលបានទៅជួបជុំក្រុមគ្រួសារ ប៉ុន្តែនៅពេលមួយដែលអ្នកលែងមានអារម្មណ៍បែបនោះហើយបែរជាមានអារម្មណ៍ថានៅខាងក្រៅប្រសើរជាងទៅផ្ទះ នោះជីវិតប្ដីប្រពន្ធរបស់អ្នកទាំងពីរជិតដើរសល់ផ្លូវបំបែកហើយ។

៩ អ្នកឱ្យអាទិភាពទៅអ្នកដទៃមុនស្វាមីរបស់អ្នក៖ កាលពីពេលដែលស្នេហារបស់អ្នកទាំងពីរនៅផ្អែមល្ហែមអ្នកដែលអ្នកតែងគិតដល់មុនគេគឺស្វាមីរបស់អ្នក។ មិនថាពេលរីករាយ ពេលកើតទុក្ខឡើយអ្នកដែលអ្នកនឹកឃើញមុនគេគឺគាត់។ ប៉ុន្តែនៅពេលដែលស្នេហាហាក់មានតែភាពរកាំរកូស នោះស្វាមីរបស់អ្នកលែងជាអាទិភាពទីមួយក្នុងចិត្តរបស់អ្នកទៀតហើយ។

ប្រភព៖ Womenshealthmag

ប្រែសម្រួលៈ ណាលីតា