អាការៈផ្ដាសាយធម្មតា និងផ្ដាសាយធំលើកុមារខុសគ្នាម៉េច?

2023-12-09 00:00:00
ចំនួនមតិ 0 | ចំនួនចែករំលែក 0

កុមារតូចអាយុក្រោមប្រាំឆ្នាំ អាចប្រឈមនឹងការរលាកសួតទៀតបើកើតជំងឺផ្ដាសាយធំ ខណៈជំងឺផ្ដាសាយធម្មតាអាចនឹងបាត់ទៅវិញដោយខ្លួនឯង។

លោកវេជ្ជបណ្ឌិត សយ បញ្ញា ឯកទេសរោគកុមារ និងទារកនៃមន្ទីរសម្ភពរ៉ូស មានប្រសាសន៍ថាជំងឺផ្ដាសាយធម្មតាកើតលើកុមារតូចអាចមានអាការៈដូចជាក្អក កណ្ដាស់ និងហៀរសំបោរតិចតួច ហើយអាចនឹងបាត់ទៅវិញដោយខ្លួនឯង។

ចំពោះផ្ដាសាយធំវិញលោកវេជ្ជបណ្ឌិតបញ្ជាក់ថាអាចមានអាការៈដូចជាក្ដៅខ្លួន ក្អក កណ្ដាស់ និងហៀរសំបោរខ្លាំង ព្រមជាមួយការឈឺចាប់សាច់ដុំ ឈឺក្បាល អស់កម្លាំងល្ហិតល្ហៃជាដើម។

លោកឲ្យដឹងថា៖ «ដែលជាទូទៅ[ផ្ដាសាយធំ] ក្រុមមនុស្សមានសុខភាពល្អ ជំងឺហ្នឹងនឹងវិវត្តល្អអាចជាទៅវិញ គ្រាន់តែចំណាយពេលយូរបន្តិច ប៉ុន្តែក្នុងករណីជំងឺហ្នឹងកើតលើក្រុមមនុស្សដែលប្រឈមដែលគេអាចរាប់ថាអាចវិវត្តទៅជាធ្ងន់ធ្ងររហូតរលាកសួតរលាកអីហ្នឹង ឧទាហរណ៍ក្រុមមនុស្សក្មេងមានអាយុក្រោមប្រាំឆ្នាំ...និងមនុស្សចំណាស់មានអាយុលើសពី៦០ឬ៦៥ឆ្នាំ»។

ដើម្បីបង្ការជំងឺផ្ដាសាយលោកវេជ្ជបណ្ឌិតបានលើកទឹកចិត្តឲ្យឪពុកម្ដាយនាំកូនដែលមានអាយុលើសពីប្រាំមួយខែទៅចាក់វ៉ាក់សាំងបង្ការជំងឺផ្ដាសាយ។

លោកពន្យល់ថា៖ «ជាធម្មតាការផ្ដល់វ៉ាក់សាំងការពារផ្ដាសាយហ្នឹងយើងអាចចាក់លើក្មេងដែលមានអាយុ៦ខែឡើងទៅ...ជាទូទៅយើងអាចចាក់ពីរដង គម្លាតពីចាក់លើកទី១ទៅលើកទី២មានរយៈពេលបួនអាទិត្យ បន្ទាប់មកយើងអាចចាក់រំឭករៀងរាល់ឆ្នាំអីចឹងទៅ ដើម្បីឲ្យគាត់មានប្រព័ន្ធភាពស៊ាំការពារខ្លួនបានពេញមួយឆ្នាំ»។

លោកវេជ្ជបណ្ឌិតក៏បានណែនាំដែរថាបើសិនជាកូនមានអាការៈផ្ដាសាយធំ ឪពុកម្ដាយគួរនាំកូនទៅជួបគ្រូពេទ្យដើម្បីបានទទួលការពិនិត្យ និងព្យាបាលបានត្រឹមត្រូវ។

ទស្សនាវីដេអូពេញចុចទីនេះ!

អត្ថបទ៖ សុខា