គន្លឹះថែទាំសុខភាពឆ្អឹង សម្រាប់ស្រីៗក្រោយអស់រដូវ

2023-11-15 00:30:00
ចំនួនមតិ 0 | ចំនួនចែករំលែក 0

អំឡុងពេលអស់រដូវ ឬអំឡុងពេល១២ខែក្រោយការមានរដូវលើកចុងក្រោយ ដង់ស៊ីតេឆ្អឹងរបស់ស្រីៗនឹងចាប់ផ្ដើមថយចុះ ដោយសារតែអ័រម៉ូនអឺស្រ្តូសែនថយចុះ។ ប្រាំឆ្នាំបន្ទាប់ក្រោយពេលអស់រដូវ (បន្ទាប់ពី១២ខែដែលគ្មានរដូវ) ស្រ្តីអាចបាត់បង់ម៉ាសឆ្អឹងរហូតដល់១០ភាគរយ ហើយស្រ្តីម្នាក់ក្នុងចំណោមពីរនាក់អាចជួបបញ្ហាបាក់ឆ្អឹងយ៉ាងតិចម្ដងនៅវ័យ៦០ឆ្នាំឡើង ដែលនេះកើតចេញពីបញ្ហាពុកឆ្អឹង។

ហេតុអ្វីអ័រម៉ូនអឺស្រ្តូសែនសំខាន់សម្រាប់សុខភាពឆ្អឹង?

អ័រម៉ូនអឺស្រ្តូសែនមាននាទីរក្សាដង់ស៊ីតេឆ្អឹង និងជួយគ្រប់គ្រងកោសិកាបង្កើតឆ្អឹង និងកោសិកាដែលបំបែកឆ្អឹង។ ពេលស្រ្តីចូលដល់វ័យអស់រដូវ អ័រម៉ូនអឺស្រ្តូសែនថយចុះ ដែលអាចជាហេតុនាំឲ្យដង់ស៊ីតេឆ្អឹងក៏ថយចុះទៅតាមហ្នឹងដែរ។ ការថយចុះនៃអ័រម៉ូនអឺស្រ្តូសែន ក៏ជាកត្តាហានិភ័យមួយដែលធ្វើឲ្យស្រ្តីក្នុងវ័យអស់រដូវប្រឈមនឹងបញ្ហាពុកឆ្អឹង ហើយបញ្ហាពុកឆ្អឹងនេះធ្វើឲ្យមានហានិភ័យនៃការបាក់ឆ្អឹង។

គន្លឹះថែរក្សាសុខភាពឆ្អឹងសម្រាប់ស្រ្តីក្រោយអស់រដូវ

ពិនិត្យដង់ស៊ីតេឆ្អឹង៖ ស្រ្តីក្រោយពីអស់រដូវ ភាគច្រើនត្រូវគ្រូពេទ្យណែនាំឲ្យពិនិត្យដង់ស៊ីតេឆ្អឹង ពិសេសចំពោះស្រ្តីដែលមានកត្តាប្រឈម ដូចជាមានប្រវត្តិគ្រួសារមានជំងឺពុកឆ្អឹង ឬមានប្រវត្តិបាក់ឆ្អឹងជាដើម។ ដូចគ្នាដែរស្រ្តីក្នុងវ័យនេះ គួរប្រឹក្សាជាមួយគ្រូពេទ្យអំពីសុខភាពឆ្អឹង និងហានិភ័យនានាដែលអាចកើតមានលើសុខភាពឆ្អឹងឲ្យបានជាប្រចាំផងដែរ។

ញ៉ាំកាល់ស្យូម និងវីតាមីន D៖ ស្រ្តីចូលដល់វ័យអស់រដូវ គួរញ៉ាំអាហារសម្បូរដោយវីតាមីនD និងកាល់ស្យូម ដើម្បីឲ្យសុខភាពឆ្អឹងរឹងមាំ។ កាល់ស្យូមជាសារធាតុសំខាន់ជួយដល់ជាលិកាឆ្អឹង ហើយវីតាមីន D ជួយឲ្យរាងកាយស្រូបកាល់ស្យូមបានល្អ។ ក្រៅពីអាហារ ស្រ្តីក្នុងវ័យអស់រដូវក៏អាចរកអាហារបំប៉នដែលមានផ្ទុកវីតាមីនD និងកាល់ស្យូមសម្រាប់ញ៉ាំបន្ថែមបានដែរ តែគួរប្រឹក្សាជាមួយគ្រូពេទ្យជាមុន។

ហាត់ប្រាណជាប្រចាំ៖ ការហាត់ប្រាណដូចជាដើរ ឬរត់ត្រឹកៗ អាចជួយរក្សាដង់ស៊ីតេឆ្អឹង និងកាត់បន្ថយហានិភ័យបាក់ឆ្អឹងផងដែរ។ លំហាត់ប្រាណក៏ជួយឲ្យសុខភាពទូទៅល្អផងដែរ។

ប្រភព៖ webmd ប្រែសម្រួល៖ សុខា