វិធីបុណ្យភ្ជុំបិណ្ឌ គឺជាពិធីបុណ្យសាសនាធំមួយក្នុងប្រទេសកម្ពុជា ដែលប្រារព្ធធ្វើឡើងចាប់ពីថ្ងៃ១រោច ដល់ថ្ងៃ១៥រោច ខែភទ្របទជារៀងរាល់ឆ្នាំ។ ក្នុងរដូវភ្ជុំបិណ្ឌ ប្រជាពលរដ្ឋខ្មែរ តែងរៀបចំម្ហូបអាហារ នំនែកជាច្រើនមុខ ច្រើនប្រភេទ ដើម្បីយកប្រគេនព្រះសង្ឃដែលគង់នៅតាមវត្តនានា។

បើតាមជារៀងរាល់ឆ្នាំពុទ្ធសាសនិក តែងសម្រិតសម្រាំងធ្វើម្ហូប ដែលគិតថា មិនទ្រលាន់ ដើម្បីយកប្រគេនព្រះសង្ឃ តែបើយើងក្រឡេកមើលទៅមុខម្ហូបដែលគ្រប់គ្នាយកមកពីផ្ទះនោះ ខ្លះធ្វើជាន់គ្នាឡើងចាក់គរទៅហើយ។ ពេលខ្លះព្រះសង្ឃក៏ចង់ស្គាល់មុខម្ហូបប្លែកៗច្រើនដែរ ព្រោះរយៈពេល១៥ថ្ងៃ ព្រះសង្ឃខ្លះឃើញម្ហូបហើយ លែងចង់ឆាន់ក៏មានដែរ។ ដូចនេះដើម្បីកុំឲ្យជាន់គ្នាដដែលៗ ថ្ងៃនេះ កញ្ញា បានលើកយកមុខម្ហូបជាច្រើនមុខ សុទ្ធតែម្ហូបឆ្ងាញ់ៗ ដើម្បីឲ្យបងប្អូនត្រៀមយកមុខម្ហូបទាំងនោះធ្វើទៅវត្តផងដែរ។