បច្ចុប្បន្នមានមនុស្សជាច្រើន មិនថាចាស់ ឬវ័យជំទង់កំពុងជួបប្រទះនូវបញ្ហាហើម ឬឈឺសន្លាក់ ដោយពួកគេពុំបានដឹងពីឬសគល់នៃបញ្ហានេះឡើយ។ ថ្ងៃនេះ កញ្ញានឹងចែករំលែកអំពីជំងឹឡើងជាតិអាស៊ីតអ៊ុយរិកក្នុងឈាមដែលជាមូលហេតុបណ្តាលឲ្យយើងមានអាការៈដូចរៀបរាប់ខាងលើ។

អ្វីទៅជាអាស៊ីតអ៊ុយរិក?

អាស៊ីតអ៊ុយរិក ជាកាកសំណល់មេតាបូលីស ដែលកកើតចេញពីការផលិតរបស់សរីរាង្គ ការបរិភោគអាហារសម្បូរជាតិពុយរីនច្រើនហួស ឬដោយសាររាងកាយអសមត្ថភាពក្នុងការបញ្ចេញសារធាតុនេះពីក្នុងខ្លួន។ កម្រិតជាតិអាស៊ីតអ៊ុយរិកខ្ពស់នៅក្នុងឈាម (Hyperuricemia) ជាវិបត្តិមេតាបូលិក ដែលមានផលប៉ះពាល់ខ្លាំងទៅលើ សន្លាក់ និងតម្រងនោម។

តើអាហារណាសម្បូរដោយសារធាតុពុយរីន ដែលបណ្តាលឲ្យកើនជាតិអាស៊ីតអ៊ុយរិក?

ប្រភេទអាហារដែលសំបូរដោយសារធាតុពុយរីន (purines) មានដូចជា៖

• ប្រភេទសាច់៖ គ្រឿងក្នុងសត្វ (ថ្លើម, កោះ, ខួរ...)
• គ្រឿងសមុទ្រ
• ភេសជ្ជៈផ្អែម និងគ្រឿងស្រវឹង
• ប្រភេទបន្លែផ្លែឈើ៖ • ផ្សិត • ស្ពៃក្ដោប • ខាត់ណា • ផ្កាខាត់ណា • ទំពាំងបារាំង និងសណ្ដែកខៀវ...។

** អាហារដែលមិនសូវសំបូរជាតិ** ពុយរីន មានដូចជាៈ

• នំបុ័ង
• ផ្លែឈើ
• ទឹកដោះគោ
• ស៊ុត
• តែ កាហ្វេជាដើម។

តើរោគសញ្ញានៃជំងឺឡើងជាតិអាស៊ីតអ៊ុយរិកក្នុងឈាមមានអ្វីខ្លះ?

ជំងឺឡើងជាតិអាស៊ីតអ៊ុយរិកក្នុងឈាម មានរោគសញ្ញាដូចជា៖

• ការឈឺសន្លាក់ ភាគច្រើនឈឺតែម្ខាង (ម្រាមមេជើង, កជើង, ជង្គង់, កដៃ, កែងដៃ...) ជាពិសេសម្រាមមេជើង
• ការហើមនៅសន្លាក់ដែលឈឺ ពិសេសពេលយប់
• ក្ដៅខ្លួន
• ឈឺសន្លាក់ខ្លាំងក្រោយពីពិសា ស្រា ស្រាបៀរ គ្រឿងសមុទ្រ សាច់ក្រហម គ្រឿងក្នុងសាច់សត្វ
• ឡើងដុំពកក្រោមស្បែក (ដុំកំណកជាតិអាស៊ីត)

តើជំងឺឡើងជាតិអាស៊ីតអ៊ុយរិកក្នុងឈាម បណ្តាលមកពីមូលហេតុអ្វីខ្លះ?

មូលហេតុ និងកត្តារួមផ្សំដែលបង្កឲ្យមានជំងឺឡើងជាតិអាស៊ីតអ៊ុយរិកក្នុងឈាមរួមមាន៖

• ជំងឺឡើងជាតិអាស៊ីតនៅក្នុងឈាម ច្រើនកើតលើមនុស្សប្រុសវ័យលើសពី ៥០ឆ្នាំ
• លើសពី ៩៥% នៃជំងឺមិនមានមូលហេតុជាក់លាក់ទេ
• មានមូលហេតុមួយចំនួន ដែលអាចបណ្ដាលឲ្យមានវិបត្តិលើសជាតិអាស៊ីតអ៊ុយរិកដែរ ដូចជាជំងឺខ្សោយតម្រងនោមរ៉ាំរ៉ៃ ជំងឺបែកគ្រាប់ឈាម ជំងឺក្រពេញទីរ៉ូអ៊ីត និងការប្រើថ្នាំដោយគ្មានការពិគ្រោះជាមួយគ្រូពេទ្យបានត្រឹមត្រូវ។

តើជំងឺឡើងជាតិអាស៊ីតអ៊ុយរិកក្នុងឈាមមានការព្យាបាលយ៉ាងដូចម្តេច?

ការព្យាបាលជំងឺឡើងជាតិអាស៊ីតអ៊ុយរិកក្នុងឈាម មានដូចជា៖

• បន្ថយជាតិអាស៊ីតក្នុងឈាមដោយប្រើថ្នាំ ដោយមានការវាយតម្លៃភាពចាំបាច់ពីគ្រូពេទ្យ
• បន្ថយការឈឺចាប់សន្លាក់
• ការពារនូវការវិវត្តដល់ការខូច ទ្រង់ទ្រាយសន្លាក់ និងខូចតម្រងនោម

ខាងក្រោមជាដំបូន្មានសម្រាប់អ្នកជំងឺឡើងជាតិអាស៊ីត៖

• ជៀសវាងការបរិភោគអាហារដែលសម្បូរជាតិពុយរីន (ដូចបានរៀបរាប់ខាងលើ)
• ពិសាទឹក តិចបំផុត ២លីត្រ ក្នុង១ថ្ងៃ
• ជៀសវាងការពិសាគ្រឿងស្រវឹង
• ពិគ្រោះ និងទទួលការព្យាបាលត្រឹមត្រូវជាមួយគ្រូពេទ្យឯកទេស ដើម្បីការឈានរកមូលហេតុនៃជំងឺ និងផលប៉ះពាល់សរីរាង្គផ្សេងៗដែលអាចកើតមាន៕