របបអាហារសុខភាពសម្រាប់អ្នកសម្រាលកូនរួច ម៉ាក់ៗគួរដឹង

2023-08-16 04:10:05
ចំនួនមតិ 0 | ចំនួនចែករំលែក 0

របបអាហារល្អដើរតួសំខាន់ណាស់សម្រាប់ការធានាឲ្យសុខភាពម៉ាក់ៗវិលមករកសភាពធម្មតាវិញបន្ទាប់ពីសម្រាលកូនរួច។ របបអាហារល្អសម្ដៅលើអាហារប្រភេទណាខ្លះ? តស់ស្វែងយល់នៅទីនេះ!

១. ញ៉ាំអាហារចម្រុះមុខ៖ ការញ៉ាំអាហារចម្រុះមុខនេះសម្ដៅដល់ការញ៉ាំអាហារមានទាំងបន្លែ ផ្លែឈើ គ្រាប់ធញ្ញជាតិ ប្រូតេអ៊ីនបានពីសណ្ដែក និងផលិតផលទឹកដោះគោជាដើម។ ក្រៅពីនេះអាហារមួយចំនួនទៀតក៏សម្បូរសារជាតិចិញ្ចឹមដែលម៉ាក់ៗមិនគួររំលងដែរ។ អាហារទាំងនោះមានដូចជាសាច់មាន់ ត្រី តៅហ៊ូ និងអង្ករសម្រូប។ អាហារទាំងនេះផ្ដល់នូវសារជាតុចិញ្ចឹមសំខាន់ៗដល់សុខភាពម៉ាក់ៗ និងការបំបៅដោះកូន។

២. រក្សាជាតិទឹក៖ ញ៉ាំទឹកបានគ្រប់គ្រាន់ក៏ជារឿងសំខាន់មួយទៀតដែរសម្រាប់ម៉ាក់ៗទើបសម្រាលកូនរួច។ ការញ៉ាំទឹកមិនត្រឹមតែជួយទ្រទ្រង់ដល់សុខភាពម៉ាក់ៗទេ តែក៏ជួយដល់ការផលិតទឹកដោះសម្រាប់កូនបៅផងដែរ។ ជាធម្យមម៉ាក់ៗគួរញ៉ាំទឹកឲ្យបានយ៉ាងតិចចន្លោះពី៦ទៅ១០កែវក្នុងមួយថ្ងៃ។

៣. កុំទាន់តមអាហារភ្លាមៗ៖ ម៉ាក់ៗមួយចំនួនអាចបារម្ភថាញ៉ាំច្រើនធ្វើឲ្យឡើងគីឡូរាងមិនស្អាត តែសម្រាប់អ្នកទើបសម្រាលកូនហើយមិនគួរកាត់បន្ថយការញ៉ាំអាហារលឿនពេកទេ។ ការកាត់បន្ថយបរិមាណកាឡូរីលឿនពេកអាចប៉ះពាល់ដល់ការវិលទៅរកសុខភាពធម្មតារបស់ម៉ាក់ៗ និងការបំបៅដោះកូន។ អាហារម៉ាក់ៗញ៉ាំមានផ្ទុកកាឡូរីដែលចាំបាច់សម្រាប់ការធានានូវសុខភាពម្ដាយ និងការផលិតទឹកដោះសម្រាប់កូនបៅ។ ដូចគ្នាដែរម៉ាក់ៗត្រូវសង្កេតខ្លួនឯងថាតើការញ៉ាំអាហារកម្រិតណាសមល្មមមិនធ្វើឲ្យនៅឃ្លាន ឬក៏ឆ្អែតពេក។ ជាធម្មតាម៉ាក់ៗបំបៅដោះកូនអាចនឹងត្រូវការញ៉ាំអាហារច្រើនជាងម៉ាក់ៗដែលមិនបំបៅដោះកូន។

៤. ប្រឹក្សាជាមួយគ្រូពេទ្យ៖ បើសិនជាម៉ាក់ៗមានបំណងចង់តមអាហារ ឬមានសំណួរទាក់ទងនឹងរបបអាហារ គឺចាំបាច់ស្វែងរកការប្រឹក្សាជាមួយគ្រូពេទ្យ ដើម្បីបានដឹងច្បាស់ថាសុខភាពម៉ាក់ៗអាចកាត់បន្ថយអាហារបានឬនៅ ឬក៏ត្រូវញ៉ាំអាហារប្រភេទណាដែលរាងកាយម៉ាក់ៗត្រូវការពិតប្រាកដ។

ម៉ាក់ៗគួរចាំថាការថែទាំក្រោយសម្រាលមិនមែនត្រឹមតែធ្វើឲ្យរាងកាយស្រកគីឡូវិញប៉ុណ្ណោះទេ ប៉ុន្តែក៏ត្រូវយកចិត្តទុកដាក់ផ្ដល់សារជាតិចិញ្ចឹមដល់រាងកាយផងដែរ។ ការទទួលបានរបបអាហារសុខភាព និងមានតុល្យភាព ជួយឲ្យម៉ាក់ៗបានធូរស្បើយលឿន និងមានសុខភាពមាំមួនផងដែរ។

អត្ថបទគួរអាន៖ FDA អាមេរិកអនុញ្ញាតឲ្យប្រើថ្នាំលេបសម្រាប់ព្យាបាលជំងឺបាក់ទឹកចិត្តក្រោយសម្រាល

ប្រភព៖ healthline | Cleveland Clinic អត្ថបទ៖ ទូច សុខា